الموضوع: هو لية كدة ..فضفضة

الحقيقة دة اول موضوع لبا فى المنتدى الاجتماعى .....و مش عارف يمكن يكون الاخير


حتى ماعرفش مصيرة اية هايتشرك بالاحمر ولا هايختفى بمجرد ظهورة .

انا على وشك انى اخد قرار بس لآول مرة فى قراراتى يبقى داخل فيها عدد كبير كدة من الناس فيهم اللى اعرفة و كتير ماعرفهومش ..عشان كدة فضلت انى اجى هنا و اتكلم معاكوا عشان انتو بعتبركوا ذى اخواتى كلكم يمكن الاقى حاجة ممكن تغير من قرارى .

الحقيقة فى حاجات كتير بتحصل من مدة هنا ومش عارف لية كدة .. ؟ و اية يعنى الهدف السامى من ورا كدة ..؟


وذى ما اتعودتوا منى و على حسب طريقتى فى التفكير هاحطها فى صورة نقط محددة

1- سلبية المشاركات


-واحد يدخل يتفرج ويبقى عندة رآى اتقال لا يقولة ولا حتى يأيد كلام حد ..من مبدأ السلامة .. فاممكن الموضوع يبان انة ماشى فى اتجاة واحد .. بس مش هى دى الحقيقة !


-تقعد تتعب لواحد وتقرا سؤالة مرة و اتنين و تحط نفسك بخبراتك مكانة و تتعب فى الرد علية و فى الاخر .. ولا حتى شكراً ..وحتى لو شكر هايضمك مع الشكر العام فى جملة واحدة ..ذيك ذى اللى دخل ولا فاد بأى حاجة فى الموضوع !


-500 مشاهدة و 28 مشاركة منهم 10 او 12 على الاقل بدون اى فايدة .. طب لية كدة ما تقول مؤيد الكلام اللى بيتقال ولا لا حتى يبقى فى اغلبية ناحية رآى ..الناس تعرف حتى ان هو دة الرآى الغالب ..لكن تسكت وتعدى !

2- مشاركات اعداء النجاح


-يفترض فيك عدم صحة النية فى فتح الموضوع ..بعدين يبداء فى سيناريو غريب بس بقى معروف


أ-ينقد اى حاجة فى (طرح الموضوع او طريقتة ) اصلاَ مش الموضوع نفسة


ب-يطرح اى نقطة هجومية لآستدراجك فى مجادلة متوقعة


ج- يستفذك ببرود ..لتحقيق اى انتصار لة (مش للمصلحة العامة )


ذ- بعد ما ترد علية بمنتهى المنطق و الثوابت .. يقولك احنا بنتكلم فى شوية حديد ..حديد اذاى طيب انت اقعدت تجادل لية من الاول ..و بعدين لما احنا نقول كدة امال اللى ملهومش فى العربيات يقولوا اية !

-واحد تانى يدخل بعد او قبل مجهودك و تعبك اللى( عملتة أوالمتوقع تعملة) ..يقول كلمتين بدون اى تفاصيل لصرف النظر عن اجابنك و اعادة التشكيك و خلاص !


-واحد عارف تميزك واختصاصك يسبقك فى الرد و يكتب مقالة ماتطلعش منها فى الاخر بأى حاجة غير ..و ارشح لسيادتك ..وعندك التلات عربيات اللى بقولهوم فى كل حتة ...!

3- مشاركات الاستفزاز


- ياخد كلامك و يحطلك كام واحد بيضحك .. كسبنا اية... وصلنا لى اية .... ولا حاجة


-الرد بمنتهى البروووود فى موضوع انت متحمس لية ولأهميتة ..يعنى شايفة موضوع عادى اوى كدة اتفرج احسن وخلاص .


-اصل انت بتحب ..اصل انت بتعشق العربية دى .. مع انك بسهولة ممكن تعمل سيرش على مشاركات الراجل دة و تعرف انة عمرة ما رشح العربيات اللى بتقول انة بيموت فيها كدة لحد .. إلا لو اتسأل فيها و فى قسمة او المقارنات فقط لا غير .. هو اى كلام وخلاص.


-يقولك انا داخل اهدى النفوس.... و باين اوى نفسيتة اية و مع مين .. حاجة غريبة !


-تقولوة حضرتك .. يقولك يا ... باسمك ...اية يا.... دى !


-تحاول تنهى الموضوع معاة بشياكة ... تلاقية بيرد بتلامة و بمنتى البرود تانى ولا هو فاهم انك بتحاول تقفل الموضوع بشياكة .. اية دةة!


-يدخل فى نهاية الموضوع و يقولك خلاص يا جماعة تك تك تك ... وأل يعنى بعد كلامة مفروض ننكتم بقى !

4-- المشاركات المعروفة مسبقا


-اول ما تشوف الاسم .. هاتعرف الاجابة مسبقاً .. حاجة كدة سحر .. عايز تعرف اذاى هاقولك


-اخى وحبيبى .. انا ركبت الاتنين .. شرح المتروكة بالعيوب الاول ..و شرح المفضلة بالميزات الاول .. وفى النهاية ارشح لسيادتك


و الله ينور يا باشا .. وشكراً على المجهود !


-بص انا سمعت و اتقالى و حسيت ... وقلبى بيقولى ...!


العربية دى ..كذا حصان و دى يا عينى عندها كام حصان .. يعنى لو خدت الاولانية ممكن تسيب اتنين حصان فى الجراج(الاسطبل ) و تطلع بالعربية ... ونبى دة كلام !


-سيرش ضعيف و هوب قص و لزق .. ومشكور على المعلومات التاريخية و الجغرافيا الاستوائية !


-اليابانى و الالمانى وبداية عرض ... المسلسلات الميكسيكية


- الدخول على العربية ..مش على السؤال من اللى هايبقى صاحب العربية .. يا اخى شوف الظروف و الملابسات و المعادلة بتاعة السؤال و ابقى جاوب ... انما هو مش ترشيح للعربية اللى انت معاها وخلاص .. هو سحب على جوايز ولا اية!

-تلخيص تهييس ...تلاقى بقى حد داخلك فى الاخر يجبلك كل الكلام اللى عجبة بس... بعدين يزود كلمتين من عندة عاجبينة .. و بكدة يبقى الموضوع تمام .. وباقى الناس تدخل ..ياسلام مفيش كلام بعد اللى اتقال !

5-مشاركين من مبدأ السلامة


يشوف الموضوع تيع مين و عامل اية مع الناس ومهما كانت درجة اهميتة .. يفضل انة مايقولش اى حاجة من مبدأ اللى خاف سلم !


مشاركة مع عضو مش مع موضوع .. مع انة كان بيشارك فى مواضيعك و بيشجعك اول ما يشم اهمية ليك يفضل مع المضمون احسن !


يدخل فى الموضوع بمشاركة مجاملة لرأى تانى هو اصلاً مش عارف اى تفاصيل فية و مدى تأثيرة !

6-مشاركات اعمل اللى فى دماغك على حساب سلامتك وارواح اللى معاك وكمان فلوسك


- دايماً تلاقى تفضيل لى لنك تعمل الغلط اللى فى دماغك على حساب سلامة و ارواح الناس وعلى حساب فلوسك اللى هاتدفها أللفات فى صيانة ملهاش لازمة بيتك وولادك اولى بيها


(استخدام خاطىء للعربية - سرعة عالية ملهاش مبرر-حركات حرجة و خطرة على الفاضى –نصايح ساعات تضيع)


-استغلال مدى تحمل العربية و عناصر الامان اللى فيها .. وتبرير دة ان ماحصلش حاجة و عادى ...طب ما تشوف المستعمل اللى فى السوق اللى ما كملش شهرين من الاستعمال حالتة عاملة اذاى .. دة كلام بيودى ارواح و فلوس صيانة و اعادة بيع فى الارض !

7- مواضيع استهلاك مجهود على الفاضى (حرق الجاز)


-فتح مواضيع جدلية ملهاش اى معنى لا فى حوارها ولا فى نهايتها ومعروف قبل فتح الموضوع ان مش هيتقال فية ولا معلومة جديدة ولا هاينتهى بنتيجة واحدة


...طبعاً كل واحد حر فى فتح الموضوع اللى شايفة ..بس المصيبة استهلاك وقت ومجهود من ناس و استدراجهم فى الموضوع ووقعهوم فى الخية


وناس تانية هاتموت عشان حد يقف جنبهم فى سؤالهم و مساعدتم فى مشكلتهم ما يلقوش حد يرد عليهم .

-مجهود جبار من ناس كتير لمجرد مجاملة صاحب الموضوع واعطاء اهمية كاذبة لموضوع مايستهلش مشاركتين اصلاً

8-مشاركين الخبرة المقنعة


-كان معايا العربية .. سيبك منها .. دى اسمها تجربة ليك تتوقف على عوامل كتير اوى عشان تتعمم و تبقى على كل الناس !


-استشهاد بمعلومات نظرية برة البلد مش هنا ... ليس لها اى مجال للذكر هنا فى مصر و فى العربيات الموجود هنا !


-تطبيق فلسفات عقلية مترسخة ..على كل سؤال مهما كانت ظروفة و ملابسات السؤال وعلاقتة بالواقع الموجود !


-محاولات فرد العضلات بمعلومات و ارقام .. ممكن نحتاجها فى حلبة دبى الدولية للسباقات فقط .!


-موضوع ال سى سى و الاحصنة ... مش معقول كل اللى عندك تقولوة الحصنة و الكنبة ضيقة و الكمالبات اللى مرطرطة واللى تركيبها بربع جنية فى اى حتة ... هو دة الفرق المفروض الناس تعرفة من ناس فاهمة اوى فى العربيات !


العربية مش حصنة و سيسيى بس وإلا كانت كل العربيات بقت مرسيدس و جاكور 7000 سيسيى


-يقولك كلام فى الاول ..تتدخل معاة فية ... يقولك لا انا قصدى مش كدة ..اصل انا كان قصدى !

9-مشاركات قانون اة اصول لا


ذى ما فى قوانيين للمنتدى بتهيألى فى اصول و عرف اى حد بعد خمس او عشر مشاركات هايفهمها

- ما ينفعش واحد بيسأل فى موضوع معين تدخل بدون دراسة لآى حاجة ..لمجرد انك تقول اللى فى دماغك


-مش اصول حد داخل يسأل فى اقسام معينة ..تسيبك من كل اللى بيقولوة فى سؤالة و تقولة ارشحلك و اختارلك و... اؤكد لسيادتك


سيب الناس اللى فى القسم دة لما يزهقوة من العربية دى او يصرف عنها نظر .. هايبقى يعمل اعلان فى الجرايد .. عايز عربية.. ابقى قولوة بقى ساعنها اللى نفسك فية !


-لما تدخل على موضوع و عارف ان اجابتك هايبقى مستواها اية بالنسبة لمستوى ناس تانية ... استنى لما هما يردوا الاول .. بعدين ابقى شوف مدى اهمية مشاركتك بعدها اية !


-لما تدخل موضوع و تلاقى انك استفدت شجع اللى استفدت منة و لو بكلمة .....هو مش مُرغم انة يفيدك و يفيد غيرك


- يا ريت قبل ماترد على واحد اعمل حركة بسيطة (سيرش على مشاركاتة ) و شوف مشاركاتة اد اية مؤثرة و حاول تعرف مدى خبرتة عشان تقدر الكلام معاة وتبقى عارف انة ممكن يرد على كل حرف هاتقولوة لمجرد انك تقول و خلاص

لية بنكرة التميز .. لية عايزين نبقى اربعة خمسة ردرودهم ثابتة و معروفة و متكررة فى كل حتة و نفضل نرود على بعض ..تمام و الله ينور و مشكور يا اخى الكريم ..وفيدنا من علمك يا ريس و خلاص ... ونضحك فى وش بعض واللى جالة احباط ِبعد واكتفى انة يتفرج من بعيد و خلاص .. هل المطلوب نجارى الواقع و نكدب على نفسنا و نقنع نفسنا انة ليس فى الامكان ابدع مما كان ..هى كدة ماشية حلو اوى و مع نفسها !


كدة هانقفد المعنى و السؤال هايبقى معروف اجابتة و تبقى كدة تمثيل !

يا جماعة و نبى ما حد يقولى دة طبيعى و عادى ..انت بس اللى مكبر المواضيع .. و الظُراف بقى ..اللى هايقولوا ... دى حاجات حصلت معاك انت بس و مفيش حد تانى اتكلم .. و كبر دماغك .. و فوت .. و عاجبك عاجبك... مش عاجبك و الكلام دة

انا بقول الكلام دة عشان ربنا عالم انا بحب المكان دة اذاى مش عشان حاجة ... بس عشان انا بحب العربيات و دماغى فيها من و انا صغير جداً و عملت خبرة و الله لو اتكتبت هتاخد صفحات و بدلت و غيرت عربيات اكتر من اى مشاركات فى اى موضوع و... و ...


وقبل دة كلة انا عندى دة عمل خير و مساعدة لحد محتاجلك و ثواب كبير اوى لما حد وولادة يقعدوا فى عربية يقولك ربنا يبارك فية هو اللى قلنا عليها ولا يشوف صاحبة طالع عينة فى عربية يقول ربنا يجازية خير ما وقعنيش فيها و حذرنى منها و كتير اوى من معانى الخير و الوقوف جنب حد محتاجلك فى مشكلتة و اللى كان ممكن تاخد منة مجهود ووقت طويل عشان يوصلها بعد فوات الاوان ....

ان تربيت على اسلوب الشعراوى .. و دى طريقتى فى العربيات ذى اى حاجة من زمان (من الاخر وببساطة و بمنتهى الدقة المفيدة و الفلسفة اللى توصل)


لو حد شايف ان دى بسيطة و ان الارقام اللى بيكتبها هى دى الحل فياريت يعرف ان ذى ما التانية لها اهميتها الاولى لها اللى مستنيها .

احنا بناخد من وقتنا و مجهودنا و بالنسبة لى انا بالذات الوقت دة بيترجم لفلوس وفلوس مش قليلة ..انت بتفضل فيها مساعدت حد محتاجلك وتقف جنبة عشان تاخد ثواب و كمان تتكلم مع ( اصحابك) فى الحاجة اللى بتحبها و تربيت عليها

والله ساعات الواحد بيقول ربنا بيسترها معاة على الطريق عشان مساعدتة و وقوفة جنب اخوة اللى مايعرفوش فى مشكلتة و انك تديلة خبرتك


من غير اى مقابل .. اة من غير اى حاجة ولا حتى دافع للمساعدة

بعدين انت اية اللى مدايئك لما تلاقى حد متحمس لعربية بالذات او بيشجعها من غير ما بيأثر دة على اقتراحاتة او آرائة وتكون فعلاً هى تستاهل


..و اية يعنى يا اخى.. ذا كان الكورة فيها تشجيع ..يبقى العربيات اللى هى هوايتنا و اللى بنقضى فيها و قتنا لا .. بعدين الشاطر اللى يشجع اللعبة الحلوة و العربية الحلوة مهما كانت ... مش متأكد اعمل على مشاركاتة سيرش قبل ما تتهمة بالتشجيع هتلاقية بيشجع اى حاجة محترمة لمجرد انها محترمة . مش عشان هو بياخد مقابل قصاد كدة احنا فى بلد انت مش هاتستفيد اى حاجة من حد لا توكيل ولا شركة و...لا اى حاجة .

ربنا عالم انى و الله العظيم اقصد كل مصلحة لينا و الفايدة لينا كلنا و اللى مش مصدق يشوف مدة التواجد بتاعتى هايعرف ان الكلام دة من و احد متابع كل حاجة بتحصل و ان الكلام دة مش بيحصل معاة هو بس و يدخل فى كل الاقسام هيلاقى كل اللى بقول علية منتشر و بيزيد ..اية الفايدة منة ولية اللى بيعمل كدة ...بيعمل كدة ولا حد عامل واخد بالة ... او واخد بالة و مابيتكلمش .

و فى النهاية على حسب الردود فى الموضوع دة اللى مش عارف هاينكتبلة النور و لا لأ ..هايكون قرارى ..اللى يمكن هايفرح ناس كتير او يزعل ناس اكتر مش باينين... مش عارف ....معلش طولت عليكم اوى المرة دى ..أكيد لسبب .

سلام