ارجو المساعدة من الخبراء

**a_khamis** · 17-01-2011 10:04 PM

السلام عليكم
انا عايز اشتري عربية اتوماتيك مستعملة في حدود 20 او 25 الف
و لقيت العربية التالية علي كونتكت كار و محتاج مشورتكم
اول عربية هوندا اكورد موديل 1983 كاملة تكيف باور سنتر اتوماتيك 1600 سي سي و مطلوب فيها 23 الف
العربية التانية ديهاتسو شاريد موديل 1990 هاتش باك جنوط اسبور هاف باور تكييف مطلوب فيها 22 الف
العربية التالتة مازدا 323 موديل 1984 مواصفات خليجى كاملة اتوماتيك سنتر بالريموت زجاج كهرباء تكييف جنوط سبور هاف باور و مطلوب فيها 25 الف
طبعا في كذا عربية هوند سيفك موديل 1982 و83 بس شكلها مش حلو
فانا محتار خصوصا ان الهوندا قطع غيارها غالية و مش منتشرة بس عربية شكلها محترم
و الشاريد زى الهوندا من ناحية قطع الغيار بس بشكل اقل شوية
اما المازدا فانا عارف ان قطع غيارها منتشرة شوية
بس برضه من اللي قريته هنا في المنتدى ان العربيات الاوتوماتيك القديمة كلها مشاكل
بس انا محتاج العربية تكون اوتوماتيك علشان انا جديد في السواقة و كمان علشان مراتي برضه هتستعملها و شوارع القاهرة اليومين دول محتاجة عربية اتوماتيك بشدة
فياريت تساعدوني و تدلوني علي الصح خصوصا ان انا تعبت في كل قرش من الفلوس ده و مش حمل اني اجيب حاجة اصرف عليها كتير
و لكم جزيل الشكر

**a_khamis** · 18-01-2011 04:02 PM

محدش عنده معلومة او خبرة يقدر يساعدني بيها

**a_khamis** · 19-01-2011 02:08 AM

هو الموضوع صعب اوى كدا ؟؟

**a_aboelseoud** · 20-01-2011 08:26 PM

بص يا باشا
الموضوع مش صعب و لا حاجة
بس انت دلوقتى بتتكلم على 3 انواع مختلفة من السيارات و ده محتاج منك انك تروح لكل قسم على حده و تشوف السادة الاعضاء القدام كاتبين ايه على كل موديل ده غير ان فيه مواضيع ثابته عن كل الموديلات اللى انت بتتكلم عليها و هى فعلا كافية ليك جدا انك تقدر تحدد
بس انا هافيدك شويه لانى بصراحة عندى نفس مشكلتك و بعت عربيتى و بادور برده على اوتوماتيك فى الحدود دى
- الهوندا الاكورد : السادة الاعضاء فى هوندا بيقولوا عليها اشعار و هى على رأيهم أوتوموبيل حاجة ركوبة من الاخر
عيوبها : لازم تكون بتحب العربية دى جدا عشان هتطلع عينك فى قطع الغيار و خصوصا الاكسسوارات و النواكل بتاعتها
- قطع غيارها كمان غالية شويه عشان مش أى حد بيبيعها .
الشاريد الهاتش باك الاتوماتيك : السادة الاعضاء فى قسم دايهاتسو بينصحوا تماما ان متشتريش شاريد اوتوماتيك هاتشباك عشان هى 1000 سى سى بس و طبعا مع التكييف العربية بطه بلدى على رأيهم
ممكن تشوف هاتشباك 1300 مانيوال أو سيدان 1300 اوتوماتيك (السيدان دايما 1300 و موديل 1992و انت طالع لحد 1997)
طبعا الناس فى دايهاتسو بيقولوا ضرورى تتأكد من حالة العربية قبل ما تشتريها و تتأكد ان كل حاجة فيها شغالة و خصوصا التكييف لانه لو مش شغال هيكلفك حوالى 2000 جنيه.
قطع الغيار الناس بتقول فى قسم دايهاتسو انها موجودة و فى موضوع مثبت عن اماكن بيع قطع غيار دايهاتسو و منهم الشاريد طبعا.
- طبعا المازدا دى اول مرة اسمع ان فيه مازدا 323 موديل 84 و اوتوماتيك يعنى حضرتك هتبقى الشخص الوحيد اللى معاه العريية دى و طبعا انت عارف ده معناه ايه .