الموضوع: إستفســـار بخصــوص إكسسوارات شيروكــى ليميتــد

أولا أهلا بحضرتك معانا

ثانيا الشيروكي أنا بشوفلها حاجات كثير من أول الجنوط السبور إلا لو هي نازله بيها لغاية الدفندرات بيبقى شكلها عليها متوحش بس حضرتك إنزلي الحرفيين فيه ناس كثير جدا هناك متخصصين في إكسسوارات الشيروكي بس .

ربنا يباركلك فيها .

الدفندرات و العتب (السلالم) تجيبيها من شارع شامبليون
غطاء كفر ستانليس برضة من هناك
___________________________________________

اضائة زينون

انذار بالريموت ووحدات رفع للزجاج

فانوسين شبورة

احلى حاجة من جوة تركبي مشغل اسطوانات دي في دي و شاشة LCD
ومخدع و كونسول سقف فية اضائة و تركبي معطر فواحه حلو

وكل الحاجات دي تشتريها من التوفيقية بارخص الاسعار :D
أو من علي رضا بأغلى الاسعار

المشاركة الأصلية كتبت بواسطة amy soliman

شكرا يا جماعة على الردود بس بما ان انا بنت ممكن حد يقولي على مكان معين أو شخص معين ممكن اروح له و في نفس الوقت ما يدبحنيش في الأسعار

ههههههههه طالما انك بنت و رايحه لوحدك و مابتعرفيش في الاسعار حاتدبحي حاتدبحي


حددي انتي عاوزة تشتري اية و انا اقولك منين بالضبط و بكام و ابعتك لحد مش حايشتغلك ويعللي عليكي السعر, و عالاقل حاتبقى رايحه و انتي عارفة السعر بكام و حاتفاصلي على معرفة بقيمة الاكسسوار الحقيقة

المشاركة الأصلية كتبت بواسطة amy soliman

شكرا أدهم انا عايزة اتنين دي في دي الكراسي الأمامية و فوانيس شبورة بتتركب على السقف و سقف فيه اضائة مع شاشة دي في دي في السقف عايزة ساوند سيستم مع بازوكا و دفندرات

ما شاء الله

دي هتبقي مسرح

بس خلي بالك انهم بيدوا مخالفات الوقتي لو شاف سكرين قدام السواق !!!!

المشاركة الأصلية كتبت بواسطة amy soliman

شكرا أدهم انا عايزة اتنين دي في دي الكراسي الأمامية و فوانيس شبورة بتتركب على السقف و سقف فيه اضائة مع شاشة دي في دي في السقف عايزة ساوند سيستم مع بازوكا و دفندرات

دي في دي للكراسي الامامية هاتي الشماسات اللي فيها شاشات, و منها اللي بيبقى فية مشغل ال دي في دي نفسة وانتي سايقة حاتقفلي الشماسة عالسقف عادي و لا حد شايف الشاشة

الكونسول السقفي اللي فية اضائة و مكان لعلبة الكلينكس من 50 ل 65 جنية

فوانيس شبورة للدفندر تشكيلة كبيرة بقى من 40 جنية و طالع اختاري اللي يعجبك

انما اوعي تركبي فوانيس الشبورة اللي بتتركب عالسقف هما بيبقوا اربعه في كفر فبر اسود بيركب فوق السقف اول القزاز البرابريز الامامي
دول بتتسحب الرخص عليهم فورا (إلا بقى لو كان عندك ضهر جامد قوي)


عامه الساوند سيستم نقي اللي يعجبك بس انا أحبذ الألباين, البيونير او الكلاريون على الترتيب و البازوكا هاتي البازوكا ال JBL موديل CS1204 تمنها في حدود 780 جنية و دي احسن بازوكا في السوق
و هاتي امبليفير محترم يشغلها ممكن الباين, بيونير, كلاريون, كينوود, JBL, بس اوعي تجيبي الماركة اللي اسمها سيمفوني دة لانها زبالة الصناعه الصيني و الواتات اللي عليها كلها فشر ومش بتطلع ربعها حتى

بصي بقى ياستي انا حابعتك لناس اصحابي معرفة من زمان و انا بالفعل كلمتهم عاموبايل دلوقتي و قلتلهم انك حاتيجي و تقوليلهم انك من طرفي و هما حايعملوا معاكي الواجب,

حابعتلك عنوانهم عالخاص

و بالنسبة للدفندرات انزلي 30 شارع شامبليون في نص البلد فية محل اسمة سفاري 4*4 اسألي على مدحت و قوليلة انك من طرف أدهم اللي عندة الفرونتيرا الخضراء برضة

وعلشان تبقى عارفة العتب الجانبي بتاع الشيروكي ليبرتي 700 جنية المستورد اللي لافف من الاجناب و فية دواسات بلاستيك, المصري مش لافف من الجناب(جاي قطش) و الدواسات بتبقى صاج تمنة 380 جنية

و الدفندر الامامي بيختلف شوية حسب موديلة

و الخلفي الاصلي المستورد بتاع الليبرتي اللي حوالين التنك تحت الاكصدام الخلفي بيبقى ب500 او 550
و المصري ممكن ب250 و طالع