الموضوع: إستفســـار عن العيــوب الشهيــرة فى الجيــب الشيــروكى

المشاركة الأصلية كتبت بواسطة h_hezzah

انا برضه ماقدرش افتى كتير قوى فيها.
بس هى معايا دلوقتى بقالها حوالى اربع شهور وممكن اقولك اللى جمعته عنها.
هى مبدأيا انا جايبها لغرض خاص وهو انى غاوى ادخل فى الصحراء ولقيت ان الشيروكى مناسبة للغرض ده وصيانتها اكيد اسهل بسبب انتشارها .

انا اول ماجبتها غيرت كل الزيوت اللى فيها.
هى فعلا زيوتها كتير قوى بس مش مأسوية زى ما "جندى مجند" بيقول
فيه زيت كورونا قدام، وكورونا خلفية وفتيس الغرز، وده زيت فتيس عادى جبت جركل 4 لتر وكفا الكل سعره حوالى 45 جنيه.
زيت الفتيس الاوتوماتيك بيتغير جزئى مش كله حوالى 6 لتر ولو عايز تغير كله (بس فيه لازم تفك الفتيس من بعضه) حوالى 14 لتر. بس انا قريت عالنت وفى ال Service Manual وقايلين انه بيتغير جزئى بس. وده اللتر ب 14 جنيه
وفيه اضافة لزيت الكرونة الخلفية (علبة دواء كده :) Friction Modifier) دى كانت ب90 جنيه
الموضوع ده كله كلف حوالى 250 جنيه (مش 1600!!) عادى يعنى .
طبعا دى اسعار خارج التوكيل فى مركز خدمة خاص. هو بس الملحوظة اللى قالهالى مهندس المركز ان التغييرة دى كل 20 الف مش 60 وفى ال Serv Manual مكتوب 36!
يعنى ممكن تبقى كل 30-40 الف.

استهلاك البنزين عالى طبعا، بس ده كل العربيات ال 4*4 كده. ماينفعش تقارنها بالاوبترا طبعا. بس ممكن اقولك استهلاكها معايا
الاستهلاك اليومى 13-15 لتر /100 كم مع ملاحظة انى ساكن فى الرحاب فنص طريقى طوالى
فى السفر انا لسه راجع من الغردقة كان الاستهلاك فى الرايح 11.5 لتر/100 والراجع 14/100 (علشان عكس الهواء) وماشى اغلب الوفت على 130-140 فأظن انه معقول لو قارنتها بغريتى السابقة (اوكتافيا) كانت بتستهلك اليومى 9-10 لتر/100 وفى مشوار الغردقة رايح 7.5 وراحع 11 لو ماشى بنفس السرعة او اسرع شوية.
يعنى تعمل حساب مصاريف بنزين حوالى مرة ونص اللى بتدفعه فى عربية 1600.

العيوب بقى .
1- ناشفة جدا فى المطبات واى هزة فى الطريق بتحس بيها
2- ضيقة شوية فى القاعدة وخاصة الكنبة الخلفية
3- طبعا ثبات ماتقارنوش بعربية سيدان بس لو سواقتك معقولة ماتحسش بمشكلة ثبات قوى

الميزات:
1- القاعدة العالية بتخليك كاشف الطريق تماما ومريحاك.
2- قطع الغيار مش غالية قوى (خارج التوكيل) ومتوفرة وفيه منها درجات كتيرة وانت واللى عايز تدفعه.
3- طبعا اهم حاجة انك هاتعدى فى اى حتة وانت مش همك سواء مكسرة او رملة او مدقات
4- اغلب العربيات بتعملك حساب وبتوسع (بما فيهم بعض الميكروباصات)

يعنى. لو ليك اى استفسارات تانية انا فى الخدمة :lol:

حضرتك بتتكلم علي الشيروكي 99 ولا ايه اصل مكتوب في بيانات حضرتك شيروكي 99 لو كده فيحيبقي اكيد في اختلاف عن عربيت حضرتك و عن الشيروكي الليبريتي
و بعدين فين بقي مركز الخدمه اللي حضرتك بتروحوا علشان انا عايز اروحوا بردوا
و شكراً