الموضوع: تقرير صيانه 20000 i10

انهارده عملت صيانه ال20000 للعربيه ال i10 هيه العربيه موديل 2008 اول اصدار نزل انا تقريبا جبتها اول يوم نزلت فيه ,عدادها عامل 17000 دلوقتى ( استخدام المدام فقط) بس هيه كانت محتاجه للصيانه ضرورى قبل ال 20000لان العربيه بقى سحبها وحش جدا واستهلاك البنزين يتاعها زاد وكمان صوتها بقى عالى بس ده نتيجه الركنه الكتير.

المهم روحت مركز كارفان فى الرحاب وقابلنى مهندس الاستقبال وبصراحه راجل محترم جدا وقلتلو على الطلبات الاتيه:
1- تغير زيت وفلتر زيت
2- تغير بوجيهات وفلاتر
3- حل للصوت العالى

المهم المهندس قالى ان الصوت العالى ده نتيجه عدم تغير الزيت من سنه ( العربيه مابتمشيش كتير ) وحلها اضافه سائل اسمه فلاش للزيت الحالى وترك العربيه دايره لمده 10 دقايق وبعدين نغير زيت وفلتر ووافقت

بصراحه هما انجزوا جدا تغير البوجيهات والفلاتر وتنضيف وحده الخنق وفلتر التكيف مع تزويد السوائل ومراجعه الكهرباء كل ده خلص فى 30 دقيقه وانا واقف مع العربيه وبعد كده العربيه اترفعت على الكوريك واتربطت واتنضف التنابير واترجلشت وبعدين اتغير الزيت وبعد كده نزلت واتغسل الموتور بالفوم وكل ده اخد 30 دقيقه تانين

الحساب كالتالى
176 مصنعيه صياته
99 فلتر بنزين ( فكه وتركيبه قصه لوحده لانه مربوط مع ترمبه البنزين والعوامه كوحده واحده تحت الكنبه)
250 زيت
20 فلتر زيت
33 غسيل موتور
53 فلاش
55 بوجيهات
85 فلتر هواء
الاجمالى 738 جنيه شامل الضريبه
بصراحه العربيه فرقت كتير بعد الصيانه ورجعت تجرى تانى والصيانه اخدت ساعه بالظبط وانا واقف مع العربيه وبصراحه كده احسن من غبور الف مره الناس محترمه وفاهمه وبتنجز فى الوقت وكمان مركز معتمد يعنى زى غبور تماما.

المشاركة الأصلية كتبت بواسطة malta

طب ايه اخبار قطع الغيار يعنى طقم دبرياج كامل يعمل كام دلوقتى

واله مسالتش بس المره الجايه ممكن اسال واقللك ان شا الله