المشاركة الأصلية كتبت بواسطة wassim_nasser
النهاردة وانا قاعد فى امان الله فى الصيدلية .. وبامر علي الرفوف احصر الدوا الناقص والاقى شاب شكله عجيب (اللهم لا اعتراض .. خلقة ربنا) دخل مادد ايده بعشرة جنيه وبيقولي عايز كامباس مقاس كبير !! .. قولتله افندم؟! .. رجع يكرر بنفاد صبر عندك كامباس مقاس كبير ؟ .. انا استعجبت من الاسم والنطق .. يمكن عشان مخارج الفاظه كانت رايحة مع اللي راحوا ف 73 .. المهم جبت اخرى و عصرت علي نفسى نص لمونة وقولتله طب ايه هوة الكامباس ده؟ قاللي بالراحه وببطء زي مايكون بيوضح الحروف مش كامباس .. مش كامباس .. كلبظ .. !!! هنا انفلتت اعصابى وغصب عنى لقتنى بازعق .. كلبظ يابن ال... الله يخرب بيوتكو انتو بتتحدفوا عليا من انهى داهية ؟ غور ياله لاطلع افتح دماغك .. لقيته ضحك كده وقالي يادكتور اهدا انا عايز كلبظ من اللي بتلبسه العيال الصغيرة !!!! .. فين وفيييييين علي ما استوعبت انه عايز بامبرز ! .. المهم انه بعد مامشى من عندي بربع ساعة دخلت واحدة بتقولي عايزة كوتشى مقاس وسط ......... لا تعليق