اشتريت الميجان امبارح الحمد لله

**solly1979** · 23-01-2011 04:23 PM

السلام عليكم
انا اول مرة اركب رينو كنت راكب اوكتافيا a4 2003
انا الميجان كانت عجبانى من زمان بس مكنتش عايز اشتريها من اى حد علشان خايف من الكلام الكتير الى بيتقال عن العربيه
المهم المدير بتاعى مسافر ومعاة واحدة من الزيرو 2006 بانوراما عامله 45 الف كيلو رحت مخلص معاة ختها بسعر عالى شويه على 73 بس مش مشكله الفلوس قصاد نظافه العربيه
عايز اسأل كام سؤال
العربيه عملت سرفيس ال 60 الف وهى عامله 30 علشان كان عدى عليها 3 سنين
المهم زيت الفتيس بيتغير على كام كيلو علشان الاوكتافيا كانت مقرفه فى موضوع زيت الفتيس دة
وانا عارف ان الفتيس عليه ضمان 100 الف بغض النظر عن الموديل هل علشان ابقا فى الضمان بتاع الفتيس لازم اروح اعمل صيانه فى التوكيل كل 5 الاف كيلو؟
ايه اقرب مركز خدمه محترم اتعامل معاة قريب من مدينة نصر انا ساكن فى المنطقه التاسعه قدام سوق السيارات
علشان مش كل حاجه صغيرة أروح التوكيل ممكن اروح بس فى الصيانات الكبيرة بتاعه ال 60

**ISLAMNOSSIR** · 23-01-2011 08:15 PM

الف مبروك يا باشا على العربيه و فعلا من كلامك على العربيه شكلها نظيفه و معنى كده انها هتبسطك d:
زيت الفتيس سعره من 100 ل 130 جنيه مش عارف المصنعيه كام لكن مهما كان سعرها معتقدش هتجيب نص تكلفة الاوكتافيا لان زيت فتيس الميجان احمر والاوكتافيا ابيض .
واقرب مركز خدمه معتمد هو فرنش موتورز فى مدينة الرحاب و دى ارقامهم عشان تستفسر منهم : 26923165 / 0105402355

**abdoelkot** · 23-01-2011 08:21 PM

الف مبروك ياباشا بس انا لفت انتباهي انك بتقول انها غاليه شويه
على فكره العربيه بالمواصفات اللى بتقول عليها دية لو فبريكه بره تبقى ممتازه جدا وسعرها حلو جدا
بالنسبه لزيت الفتيس بيتغير بعد ال 60الف كيلو
ولو الزيت لازم يتغير بعد تلات سنين يبقى اكيد التوكيل عمله
ونصيحه منى ليك متغيرش زيت الفتيس غير فى التوكيل عندهم زيت معين ليه كثافه معينه
انما فرنش موتورز والافرع المعتمده بتحط زيوت عاديه موبيل 1 فى فرنش موتور مثلا

**solly1979** · 24-01-2011 11:02 AM

تسلموا يا شباب بس انا نفسى فى كام نصيحه كدا علشان انا كنت بعمل عمايل فى الاوكتافيا من شد وحرق وسرعات عليا لغية 200 معرفش امكانيات الميجان بصراحه
هل الميجان سحبها بعد ال 100 ضعيف شويه اصل الاوكتافيا كانت بعد ال 100 وحش كنت بجيب ال 150 فى 4 ثوانى
انا عارف ان صاحبها مكنش بيجرى اخرة 100 او 120
انا مش هقارن كتير اكيد ديه فيها مزايا وديه فيها مزايا ممكن ابقا اعملكوا موضوع مقارنه مابينهم حلو بس لما امشى واسافر بيلميجان مرة على الاقل

**ISLAMNOSSIR** · 24-01-2011 09:02 PM

انا عن نفسي بحب اسافر بالعربيه عشان بحبها على الطريق لان ال rbm لما بيعدى 3 بتدخل فى المود الرياضى و ثبات جميل

**MISS_MONA** · 25-01-2011 02:43 PM

الف مبروك عليك وربنا يباركلك فيها

**HOSSAM99** · 26-01-2011 12:54 AM

الف مبروك عليك الميجان
وربنا يبارك لك فيها ويعطيك من خيرها ما تتوقع وما لم تتوقع ويباعد عنك اية شر منها
ونصيحه ليك بالنسبه للميجان متسمعش للاشاعات
وكمان التزم بجدول الصيانه الخاص بالعربيه في المواعيد والكيلوميتر