المشاركة الأصلية كتبت بواسطة ElKattan
بص يا باشا
انا مريت بتجربة أحب أنصحك بيها
أنا كل شهر كنت باصرف مبلغ بحس انه كبير قوي فى اخر الشهر ومابشتريتش حاجة يعني تساوي هذا المبلغ.
فعملت ايه بقى يا سيدي
بس من غير ضحك ولا تريقة
أنا عملت ملف اكسيل باكتب فيه كل مصاريفي بدقة غريبة انا فعلا مستغرب منها لدرجة الخمسين قرش اللى بدفعها لسايس الجراج الصبح.
بعد ما عدى شهر اكتشفت بنود غريبة جدا بتستهلك فيها مبالغ كبيرة زى مثلا المجاملات
فانا أقترح انك أول كل شهر تحسب المصاريف الثابتة بتاعتك (إيجار شقتك - مصروف بيتك - مصروف ولادك وزوجتك) وبعدين تشيل مبلغ معين للادخار تخليه بعيد عنك تماما وتحاول تنساه خالص
وبعدين هيتبقى لك مبلغ لمصاريفك انت الشخصية( زى مثلا مصاريف أكلك فى الشغل ومصاريف العربية والبنزين وخلافه) حاول تشيل 20% من المبلغ ده على جنب وتحاول تصرف نفسك بال 80%
فى الغالب بعد ال 80% ما يخلصو هتدخل فى العشرين ده أمر طبيعي بس حاول ما تدخلش فى ملبغ الادخار خاااالص اللى انت شيلته من الأول.
الاكسيل شييت هايبين لك بنود للانفاق غريبة مش فى بالك خالص فتحاول تقنن المصاريف دي
مع الأخذ فى الاعتبار ان المبلغ اللى انت مرتب تصرفه هتصرفه فلذلك أؤيد اقتراح الجمعية ده بمعنى المبلغ اللى هتحوشه كل شهر تحاول تدخله فى جمعية حتى لا تضطر انك تقرب منه
أرجو أكون قد أفدتك بعض الشيء