الموضوع: هل من تجربة في صيانة 10000 للاسبيرانزا 516

يتم تغير الزيت والفلتر والزيت موبيل ون وبتاخد خمسه كيلو والتكلفه حوالى 200 جنيه المهم انك تحجز ميعاد وتروح بدرى والعربيه بتاخد حوالى خمس ساعات وهما بيراجعوا على كل حاجه وتكون مجهز معاك لسته بملاحيظك عن العربيه وتقولهم عليها وعند الاستلام تتأكد انك اللى طلبته اتعمل

الرساله دى منقوله من وائل عطيه من contactcars

بالأمس قمت بزيارة مركز أبو الفتوح بالصحراوي لعمل صيانة الـ 10000 كم:
أولاً لمن لم يستلم بعد لاحظت هناك وجود كمية هائلة جداً من السيارات التي سيتم عمل PDI لها للتسليم (عدد السيارت فعلاً كان كبير جداً) وأعتقد إن ده هايسرع مواعيد التسليم.
ثانياً بالنسبة للصيانة اللي عملتها:
أنا كنت حاجز يوم الخميس الماضي على الإثنين الســ8ــــــاعة صباحاً، والعربية دخلت الورشة حوالي 9.30 لأنهم استأذنوا من الحاجزين علشان يعملوا PDI لشوية عربيات كانوا هايسلموها
المهم ندهوا اسمي ورحت لمحمد عناني واديتلوا ورقة مكتوبة على الكمبيوتر ومطبوعة بالملاحظات اللي عندي على السيارة:ودي نسخة من الورقة اللي أعطيتها له:
1- الفتيس , مشكلة في النقل وعضعضة و صعوبة خصوصا المرشدير , وصوت زنة شديدة جداً ومزعجة جداً عند الغيار الرابع (الحكاية دي محسساني إن العربية معايا بقالها 10 سنين )
2- ظهور صوت صفارة مع الفرملة (كأن العربية عايزة تيل وطنابير)
3- العفشة خشنة جداً وصوت رجرجة في علبة الدركسيون
4- صوت تنفيس ،
5- ضعف ملحوظ في سحب العربية ،(كانت قد تمت معالجة قطع بالبنزين طرفكم إلا أنني أعتقد أن قد أثر على سحب العربية)
6- الحدفة يمين ،
7- صوت الموتور عالى جداً بعد اربى ام 3000
8- صوت حكة شديدة في الدركسيون وكنتم قد حاولتم إصلاحها في صيانة الألف إلا أن ذلك لم ينجح (لعدم وجود Special tool على حد قول المهندس وليد)والمشكلة دي استحملتها لغاية 10000كم لكنها محسساني بعدم فاعلية الباور، علاوة على الصوت المزعج
9- لمبة الصيانة مضيئة في التابلوه
10- كان الزجاج الأمامي يمين وشمال فيه مشكلة وبيركن عند الرفع سواء بالزراير بتاعه أو من خلال الريموت وفي توكيل جسر السويس قالولي هو محتاج طقم كاوتش وش موجود واحنا خليناه يسلك لغاية مانجيب الكاوتش (بس المشكلة بتتكرر من وقت للتاني)
11- اللمبة اللي في طفاية السجاير لا تعمل وفي نفس الوقت في لمبة بتنور تحت الدركسيون في حيز أقدام السائق ماكانتش موجوده قبل كده (الكلام ده ظهر بعد ماعملت صيانة الـ 5000 في جسر السويس)
12- التكييف ، (ماهي أخبار حل مشكلة التكييف)
13- السماعات لا تعمل كلها
14- لا بد من رزع باب السائق حتى يقفل جيداً
>>>>>> المهم هو سجل الملاحظات السابقة واستثنى منها حكاية العفشة وقال هاتتعالج في مارس وصوت التنفيس قال إن ده طبيعي كده وهو من طلمبة البنزين، وحكاية التكييف لسه برده مغيروش صمام الساخن
بدأوا شغل في العربية بعمل الصيانة وبعدين بدأوا في معالجة الملاحظات بتاعتي وشوفت المهندس وليد كان بيشرف على الشغل فيها وخرج جربها وخرحت أنا كمان مع أحد الفنيين وفعلاً عالجوا الملحوظات وشعرت بفرق في أداء العربية وأهم حاجة إنهم أزالوا صوت الزنة المزعج اللي كان في الفتيس.
الفاتورة كانت 330 جنيه بالضبط 328 (زيت وفلتر ومصنعية الصيانة) وماكانش فيه تكلفة نظير معالجة ملاحظاتي.
ياريت اللي عنده أي استفسار يتفضل دلوقتي لأني هاغادر الموقع في خلال ساعة ونصف تقريباً إنشاء الله
شكراً
وائل عطية