الموضوع: النقل المباشر لاحداث الاضراب

يا جماعه حد يتصل بضحي يطمن عليه و يحاول تاني مع احمد فارما و يارب قويهم علي الظالم و المفتري و ابن الحرام

احمد فارما ملحيئش يوصل على ماظن دا جاىمن الشرقية بردو

تردد الجزيره مباشر كااااااااااااام

المشاركة الأصلية كتبت بواسطة wael17

لسه قافل مع اخويا دلوقتي....هو في المظاهرة في قلب ميدان التحرير مع اخويا التالت و متحاصرين و بيقولي عدد الناس في الميدان بالالاف و الامن محاصرهم و في مجموعات من الدقي و المهندسين بتحاول توصلهم بس مش عارفين و اللي في التحرير ناويين يباتوا في الميدان و كل الشوارع الي بتوصل لوسط البلد مقفولة بالامن و المتظاهرين اللي بيحاولوا يوصلوا لزمايلهم في الميدان

انا دلوقتي نادمان اني مانزلتش مع اخواتي

انا هانزل دلوقتي و هاخد معايا اكل و مية للناس اللي هتبات في ميدان التحرير و غالبا لو عرفت اوصلهم مش هاعرف اخرج تاني و هبات معاهم و كده كده بالمنظر ده ماحدش رايح شغل بكرة لان الشوارع مقفولة

انا لسه راجع دلوقتي من ميدان التحرير زي ما قلتلكم رحت و خدت معايا بطانيات و اكل و مية عشان احاول اوصلها لاخواتي الاتنين اللي هناك من الصبح
مبدئيا الشوارع في القاهرة فاضية لدرجة اني شكيت ان النمظاهرة اتفضت بس لقيت كوبري قصر النيل مقفول للعربيات ركنت و نزلت و مشيت لحد ما وصلت للكردون الامني و اول لما قربت لمييدان التحرير لقيت شبكة الوموبايل فصلت و بعدين لقيت كوردون امن مركزي و بدات اسمع الهتافات من قلب ميدان التحرير...طبعا الكوردون بيعدي الناس في اتجاه واحد يعني تخرج من الميدان ماشي لكن تدخل لأ و طبعا في ناس بتخرج عشان في ناس تعبت و مش عاملة حسابها تبات
و حصل موقف قدامي واحدة شكلها اجنبي عايزة تعدي و بتقول للظابط(3 نجوم) بعربي مكسر " انا عايزة ادخل الفندق بتاعي" قالها ممنوع لفي و ادخاي من عبد المنهعم رياض" و هي اصرت تدخل و بعدين واحد راجل من الناس راح مزعق للظابط و قاله " ماتدخلها دي واحدة ست هاتعمل ايه يعني" لقيت الظابط راح باصصله و انا توقعت ان الظابط هيسب له الدين...لقيت الظابط بيقوله " يعني لو دخلتها مش هاتقولي وانا كمان عايز ادخل| راح الراجل قاله لأ...راح الظابط باصص لبقيت الناس و قالهم ادخلها بس ماحدش يقولي عايز ادخل انا كمان...و الله العظيم مسكت نفسي من الضحك...واضح فعلا ان الشرطة متعاطفة الي حد كبير مع الناس بس مضطرين ينفذوا الاوامر...المهم الست دخلت من هنا و انا لقيت اخواتي الاتنين و اصحابهم خارجين و كانت صدفة جامدة لاني استحالة كنت اوصلهم حتي لو عرفت اعدي الكوردون عشان مفيش موبايلات شغالة و هما ما كانوش مستعدين للبيات و ناويين يروحوا تاني بكرة
و اخويا حكالي انهم اتحركوا من جامعة الدول لميدان التحرير و ماكانوش مصدقين لما وصلوا الميدان لانهم كسروا كذا كوردون و الامن فشل في السيطرة عليهم و دي اول مرة تحصل في مصر
و قالي ان الناس كانت منضبطة جدا و ماحدش اعتدي علي الامن و مفيش اي تكسير في المحلات اللي في ميدان التحرير رغن انها في المنطقة اللي المتظاهرين مسيطرين عليها و مفيش اي امن هناك و حتي لما ناس حاولت تكسر يافطة عليها شعارات الحرب الوطني ناس كتير كانت بتمنعهم و بصورة عامة الناس اللي في المظاهرة شكلهم ناس محترمين مش غوغاء يعني و قالي ان اثناء المسيرة من المهندسين للتحرير كان في اهالي بتنضم ليهم من البيوت و بعض الاهالي حاولوا الاحتكاك بالامن بس المتظاهرين كانوا بيمنعوهم
و اخويا التاني لقيته لابس كمامة و قالي انه اتضربت عليه قنابل غاز كتير و اتعمي من الدخان بس تاثيره بيروح بعد 10 دقائق و حكالي ان في عربية مطافي كانت بترش ميه عليهم و بعض الشباب قدر ينط عليها و خطفوها و نزلوا المجند منها و جريوا بالعربية علي مدخل شارع و وقفوها بالعرض عشان يقفلوا الشارع اللي الامن كان متمركز فيه و حكالي برده علي عربية بوكس لمت شوية شباب و بعد شوية لقوا الشباب راجعين بالبوكس بعد ما ضربوا المجندين و السواق و نزلوهم من العربية

الوضع الحالي: المسالة دلوقتي بقت حياة أو موت و الامن لازم يفض الاعتصام ده باي وسيلة قبل النهار ما يطلع لان بكرة مش اجازة و الناس اللي في الميدان لو فضلوا فيه يبقي العاصمة هاتتشل و ماحدش رايح الشغل بكرة و عددهم هايتضاعف و هاتتحرك مجموعات كبيرة من جميع انحاء القاهرة و هاتكون مجهزة بالاكل و المياه و الناس هاتفضل في الميدان لحد ما الحكومة تستجيب لمطالبهم و علي فكرة الامن المركزي مشتت في كذا مكان علي مستوي الجمهورية و المجندين و الظباط هيتعبوا بعد شوية و اذا كانوا قادرين يسيطروا علي الناس اللي في ميدان التحرير مش هايستحملوا ضغط عليهم من الخارج لو مجموعات كبيرة بدأت تتوجه ناحية الميدان و في الحالة دي الامن هو اللي هيبقي متحاصر و ساعتها هاينهار....و الجيش عمره ما هايضرب الشعب
يعني الساعات اللي جايه هاتكون حاسمة و انا متاكد ان الامن هايستموت و يفض الناس من ميدان التحرير
انا نازل بكرة ان شاء الله لميدان التحرير لو الناس قدرت تصمد لغاية الصبح