الموضوع: النقل المباشر لاحداث الاضراب

الى بعد كدا يشترى جرايد اسامه سرايا واعوانه يبقى هان كرامته بعد الى الناس دا بتقوله

المشاركة الأصلية كتبت بواسطة ahmed_su

شبكة رصد صحيفة الأهرام | شيكولاته وورد في عيد الشرطة ..
تبادل المواطنون الشيكولاتة والورد مع رجال الشرطة بالمحافظات, تعبيرا عن البهجة بأعياد الشرطة. وشهدت المحافظات المختلفة إقبالا كبيرا من المواطنين علي نوادي الشرطة لتقديم التهنئة. وكان في انتظارهم أعداد كبيرة من قيادات الأمن التي قامت بتوزيع الحلوي علي المواطنين الذين تسابقوا ...في تقديم الورد. كما قامت الإدارة العامة لشرطة ميناء القاهرة الجوي بتوزيع الورد علي السائحين.


شوفتوا الهجص...!!!!!

كلمة اعتراضية قبيحة !!

تعليق من احد المشاركين فى يوم الغضب

مهما كانت نتيجة الثورة , فأنا سعيد بشعب بلدى جدا , فعلا أنا شوفت نماذج النهارده لوطنيه كنت فاكرها اختفت من قلوب الناس , حتى اللى مش مشاركين حاسيتهم معانا بقلبهم , وسط المظاهرة الصبح قبل ما الأمور تتطور ,روحت أجيب إزازة مياه , الراجل صاحب المحل أول ما شاف العلم فى إيدى جاب كيسين كبار واحد ملاه أزايز مياه و التانى ملاه بسكووت و مرداش ياخد أى فلوس و قاللى روح اعزم على اخواتك والله يا جماعه أخدته بالحضن مكنتش متصور إن لسه فى ناس كده ...

و بليل لما بدأت الاعتقالات و احنا بنجرى فى كل اتجاه عشان نتفرق فوجئت إن عسكرى أمن فى بنك بينده عليا و خبانى عنده فى الكابينه بتاعته لحد ما العربيات المصفحة عدت من الشارع و جابلى مياه أغسل وشى عشان الغازات كان مخليا حالتى صعبة , و لما سألته ليه عمل كده , قاللى أنت فى سن ابنى و لقيتك شايل علم مصر قلت أكيد معملتش حاجه غلط ..

كل احترام و تقدير للشعب الذى أثبت احترامه و تحضره و حبه لبلده ...

فعلا البلد لسة بخير و فى امل

المشاركة الأصلية كتبت بواسطة a7med_pharma

بسم الله
وأنا رايح على الزراعي ..وعلى مشارف القليوبية
لقيت قافلة من سيارات ملاكي لوحات الغربية..مليانة حماسة يحملها شباب.,,وأعلام مصر
وطبعا هتافاااااات سب للنظام ولــ .......إلي مايتسماش
لاوجود لأي فرد أمن على مدخل القاهرة...
دخل على نفق العجوزة...دخاااااااان رهيب
والعربيات كلها بتجري في شوارع الجيزة بجنون...كل العربيات كانت بتجري
تحركات متوترة لسيارات الشرطة..هنا وهناك
كنت سمعت إن فيه ناس في الدقي
دخلت شارع الدقي..لقيته فاضي إلا من إسطووووووول من سيارات الأمن المركزي
ومئات...ولا أبالغ إن كانوا ألاف من جنود الأمن المركزي
كلمت صبحي...قالي الناس في الدقي مشيوا..وراحو التحرير
داخل على طريق الأوبرا
سيارات الشرطة..تقف بعرض الطريق
لفيت وكملت في إتجاه كوبري الجامعة..وحاولت ادخل التحرير من شارع القصر العيني
ونش ضخم يقف بعرض الطريق..وبجواره مدرعة
حاولت الدخول بالعربية
سمعت شتيمة من الظباط...إرجع يابن الــ #%^#^#^#%#

لفيت تاني ..ورجعت ركنت في شارع الدقي في حتة امان
وأخدت الشنطة إلي أنا كنت مجهزها وفيها شاش وقطن وقطرات للعين ومطرهات للجروح وموسعات للشعب الهوائية
وحاولت العبور سيرا على الأقدام من طريق الأوبرا
وكان معي بعض الشباب
وكان من نصيبي شلوت ..من أحد ظباط الأمن المحترمين
وماقدرناش نكسر الطوق وندخل للناس إلي جوه
ووالله الذي لاإله إلا هو
وجوه أفراد الشرطة..تكاد ترى عليها علامات المغضوب عليهم
سفالة..وقلة أدب غير مسبوقة
وكان نصيب كل من يحاول عبور الكوبري..شلاليت وركلات ولكمات من رجال الأمن الشرفاء
وأناكان من نصيبي شلوت(ولله الأمر)
أخدت العربية تاني
وروحت ركنت قدام طب القصر العيني
وحاولت أدخل من ناحية القصر الفرنساوي..لم أفلح
حاولت أدخل من ناحية ميترو السيدة عائشة .. ولم أفلح

وتخيلت منظر هؤلاء خلف الجدار الحديدي لرجال الشرطة الشرفاء...وحدهم
والله دموعي نزلت وأنا مش قادر أعمل حاجة..وأنا متخيل الناس جوه بتنضرب وتتسحل
وخصوصا لما سمعت ضرب النار
طاخ طاخ طاخ
قلبي إنقبض بصورة غير مسبوقة
وللأسف...عرفت من استاذ أحمد سعد..ومن صبحي إن الناس في التحرير إنفضوا
فرجعت
والله المستعان....وأديني رجعت بخفي حنين ..وشلوت مؤلم لكرامتي

صدقنى انت مرجعتش بخفى حنين ولا حاجة ...... انت احسن من ناس كتير فضلت قاعدة فى البيت ورا الكيبورد وانا منهم
كفاية انك حاولت تساعد الناس اللى جوا باللى تقدر عليه وبالادوية

عموما باذن الله بكرة هيبقى فيه كلام تانى ... انا حاسس بكرة هيبقى احسن .... النهاردة كانت مجرد الشرارة باذن الله

تحياتى ليك

المشاركة الأصلية كتبت بواسطة kimo-nubira

شهيد السويس مصطفى رجب الله يرحمه مات راجل

login | facebook

الله يرحمة
انا لله وانا اليه راجعون