السلام عليكم يا رجالة
و كل عام و عمرو بك و سرور بك بخير و انتم جميعا بخير
امبارح رحت المنيا ( 130 كم ) و العربية بسم الله ما شاء الله زى الفل
المهم النهاردة الصبح قلت ارجع على اسيوط تانى ( نفسى الـ 130 كم )
المهم نزلت من الفندق و العربية نضيفة و زى الفل و انا روحت مسخن العربية و كله تمام التمام و اعتمدت على الله و بدات اتحرك
قبل اسيوط بـ 50 كم نفس الحجر الجميل اللى دايما باخدة بالعربية ( قصدى نفس خبطة الحجر و ليس الحجر نفسة و الا هبقى مدمن الحجر دة بعينة )
راح خابط فى العربية من تحت و اا قلت فى سرى لا هقف و لا هنزل و لا هشوف لانة خبط تحتيا يعنى خبط فى المصفحة و طالما صوت العربية مغيرش يبقى كان بعيد عن الشكمان
المهم كملت طريقى حتى من غير ما اقف
و رجعت اسيوط الحمد لله بالسلامة و قولت اروح افول و اشوف العربية هتاخد كام ( اخدت 29 لتر لمسافة 280 كم ) يعنى الصفيحة هتعمل 193 كم و دة قليل طبعا
الغريب انى و انا راجع كنت حاسس ان العربية حيلها واقع يعنى العربية بقيت ضعيفة سنة صغيرة فى السحب و فى الاستجابة و قلت فى سرى يمكن من البنزين الـ 80
بعد كدة روحت البيت و انا بركن العربية تحت البيت قلت ابوص على الخبطة من تحت فين ؟؟؟؟؟؟؟
[overline]و كانت المفاجاة ؟؟؟؟؟؟؟؟؟؟؟؟[/overline]
العربية بتنقط زيت فتيس اتوماتيك ( الفتيس الاولانى باظ لان الكهربائى مربطش الاكور بتاع الفتيس اللى داخل على الردياتير كويس )
طبعا انا جبت 1500 لون فى الحال
و قولت يا رب استرها الحكاية مش كل سنة اغير الفتيس
رحت جرى على الميكانيكى و انا فى الطريق جبت كيلو زيت موبيل زفت لانة غلى و بقى بـ 40 جم
و فضيتة و توكلت على الله على الميكانيكى مباشرة
روحت للميكانيكى و قوتلة العربية بتنقط زيت من الفتيس و فعلا خلا الصبى يبص على العربية من تحت
و كانت المفاجاة التانية ؟؟؟؟؟؟؟؟؟؟؟
الخرطوم اللى طالع من الفتيس الى الردياتير بينقط زيت
فكينا الخرطوم و جبنا حتة ربع متر بـ 6 جنية و 4 قفيز بـ 2 جنية و كيلو زيت موبيل تانى بس دة ارخص ازاى الله اعلم سعر الكيلو 27 جنية و قفلنا العربية و تمام التمام
السؤال الاخير هنا - خلى بالك
( اختر الاجابة الصحيحة )
لو مكنتش اخدت الحجر تحت العربية
أ : كنت هبص على العربية من تحت و اكشف ان الخرطوم دة بايظ
ب : مكنتش بصيت و كانت الفتيس ضرب مرة واحدة
ج : أ و ب