ربنا يكون معاك يا دكتور امير بس اغلاق البورصة سيزيد م حالة الذعر اكتر فى البورصة
يعنى الصبح وقفت نص ساعة ولما رجعت نزلت اكتر فمبالك لو اتقفلت يومين تلاتة اللى مكنش ناوى يبيع حيبيع اول متفتح
يابو حميد و النبي فهمني
بالراحه انا محروق من الفساد مش منك ولا من خساره الفلوس
ماهي بكره الاوضاع تستقر كمان شهر اتنين تلاته بس مسير الاسعار ترجع
لما البلد في حاله شبيهه بالعصيان المدني
و الشرطه و الامن المركزي نازلين طحن في الناس في الشوارع ولا افلام الاكشن
يبقي البهوات سايبين البورصه مفتوحه ليه
ده حتي وائل عنبه حالا علي cnbc arabia مستغرب من ردود افعال البورصه
و حاليا الاقتصاد لا دخل له بالبورصه اطلاقا
الحل في قرار سياسي
و فين رئيس الجمهوريه لما اقتصاد جمهوريته بينهار
و الدين العام ارتفع لنسب خطيره
و الجنيه انهار امام الدولار
الاقتصاد و البورصه فعلا مراه للبلد
اللي بيحصل حاليا بيشي ان الثوره الشعبيه انتصرت و النظام بيترنح و يتخبط
البورصه ما تتقفلتش عشان البشوات يبيعو النهارده ويطلعو الفلوس على بره
اللي اشترى في الغالب صناديق مصريه (البا صناديق البنوك الحكوميه ) بتشتري بقرارات سيادية ....
والله حاسس بيك والخسارة فادحة على الناس كلها
بس حضرتك نفترض انك ناوى تحتفظ بالاسهم ومش ناوى تبيع...وفجاة قريت ان البورصة اتقفلت كام يوم...رد فعلك حيبقى ايه؟ حتلاقى نفسك اتقلبت وعايز تبيع ومستنى اول ميفتحوا السوق تانى علشان تبيع
فاكر حضرتك لما قفلنا ايام الازمة العالمية اسبوع ورا بعض -كان توقف طبيعى بسبب اجازات العيد- فى اول يوم فتحنا نزلنا 16% وده اكبر انخفاض فى تاريخ البورصة
فلو قفلنا 3 ايام مثلا والمظاهرات مستمرة ممكن تلاقى نفسك فى اول يوم تفتح خدت كل خسارة الايام اللى فاتت فى يوم واحد وده حيرعب الناس اكتر واكتر ويبيعوا اكتر
يعنى من معرفتى البسيطة ان التداول مبيتوقفش ايام ولكن ممكن يتوقف خلال الجلسة
كل ده مش حيفرق معاك...شوف قرارك ايه من البداية لو بيع يبقى بيع دلوقتى..لو احتفاظ يبقى يفتحوها يقفلوها مش حتاثر معاك
ده والله لا دفاع ولا فتح مناقشات بس محاولة معاك للتهدئة لغاية لما نشوف الجمعة والسبت حيحصل ايه وهل الحكومة ناوية تعمل حاجة ولا المظاهرات حتزيد ولا ايه بالظبط
اهلا و سهلا
علي المتعاملين الباقين علي قيد الحياه برجاء الدخول و مناقشه التصورات للمرحله الحاليه
بنوه مره تانيه
المتعاملين فقط و اصحاب الخبرات الاستثماريه مفيش حد في البلد بطولها و عرضها خسران من راس ماله مباشره زينا فأرجو الانتباه و عدم التطرق لاحاديث جانبيه غير ذات صله بمناقشه التصورات للمرحله الحاليه في البورصه
و شكرا للجميع
لسه شايف الموضوع دلوقتي
أظن هناخد هبدة جامدة أول ما السوق يفتح و ننزل لحد 4000 نقطة و نبدأ نطلع من عندها بشكل سريع على مدى متوسط ...
ايه رايكم أنا بفكر أزود أسهم في بايونير و الكابلات و أسكوم ؟
الكارثه ان فتح البورصه يومي 26 و 27 بعد مصادمات يوم 25 يناير و علي الرغم من اندلاع شراره الثوره بطول و عرض البلاد, ادي الي نزيف حاد و قاسي في قيمه الاسهم
و التصريح الغبي بأن البورصه كانت ستفتح يوم الاثنين بعد يوم واحد من فتح البنوك - و هو التصريح الغير مسئول و الذي تم التراجع عنه - كان لا يمكن الا ان يؤدي الي مزيد من الانهيار الحاد
البورصه لا يمكن ان تفتح من عاقل و البلد في حاله ثوره
و لا اظن ان اي جلسه ستشهد ارتفاع ان تم فتح البورصه الا حين تستقر سده الحكم
و عليه فانا بتناقش معاكم كلكم في ما يمكن ان يؤدي له فتح جلسات التداول الفتره الحاليه و امكانيه تنظيم وقفات احتجاجيه امام مبني البورصه لمنع فتح التداول الي ان تستقر الامور
و المطالب بالغاء جميع العمليات المنفذه يومي الاربعاء و الخميس 26 و 27 يناير اراها مطالب مشروعه لأن قرار فتح البورصه وقتها كان قرار في منتهي العبث بأموال المستثمرين
و قرار فتح البورصه اول الاسبوع المقبل لا يمكن في ظل الاوضاع الحاليه الا ان يؤدي الي انهيارات متتاليه
ولا اظن ان احد سيقدم علي الشراء الان لان الاحوال غير مستقره اطلاقا و كل عمليه شراء من الممكن التكهن بخسارتها الحتميه في الفتره المقبله
لو اتلغت عمليات اليومين اللي اتفتح فيهم السوق مش ده معناه الرجوع للأسعار اللي قبل الانهيار ؟ طب ما هوه اللي باع باع بمزاجه محدش جبره ...
طبعا مينفعش شراء الا بعد تالت جلسة عشان يكون اتكون اتجاه للسوق و برضه يكون استقر شوية
المطالبه بالغاء العمليات نابع من ان قرار فتح التداول قرار خاطيء في ظل ما حدث يوم 25 يناير
و معروف ان البورصه مراه الاقتصاد و كون البلد في حاله من الثوره ادعي الي حفظ الكيانات الاقتصاديه و الشركات و الحفاظ عليها من الانهيار
و بالمناسبه يوجد فيما يخص الغاء عمليات يومي 26 و 27 يناير يوجد فريقان
فريق باع ولا يريد الغاء العمليات
و فريق اشتري و يريد الغاء العمليات
و مما هو واضح ان الفريقان و ان اختلفا فيما يخص الالغاء من عدمه الا انهم متفقين اتفاق ضمني ان البورصه علي موعد بالمزيد من التدهور حال فتحها خاصه في ظل عدم الاستقرار
و احب نتناقش فيما يخص دواعي الصعود في ثالث جلسه بعد الفتح
ازاي و الوضع لم يستقر
و البنوك نفسها لا تسمح حاليا بالسحب الا بحدود
و عمال الشركات و الموظفين انفسهم من الممكن ان يكونو من المتظاهرين
الانفلات الامني و ان قل مؤخرا لا زال يهدد الاقتصاد ككل
الاستهلاك و الشراء في حاله ركود
لو فتحت في الكلام هجيب ليك و لجميع المتعاملين نوبه قلبيه حاده لأن مخاوفي الشخصيه لا حدود لها بخصوص فتح البورصه في الفتره الحاليه
انا عن نفسي مستعد للاحتجاج امام مبني البورصه حيال قرار فتحها و المطالبه بالتحقيق للنائب العام ان استلزم الامر
و مش فكره ان راس المال علي وشك التلاشي فقط, لان لو انهارت اسعار الاسهم لقيعان تاريخيه هينتج عن الوضع ده انهيار الشركات نفسها تحت وطأه عجز رهيب في الميزانيات الربع سنويه علي الاقل و وقتها من الممكن ان نشهد انهيار فعلي لكيانات اقتصاديه و شركات
و مجرد التفكير في تسريح العمال و الموظفين في الشركات دي من الممكن ان يؤدي الي اشاعه الفوضي و الدمار خاصه ان جميع الشركات العامله الان تسعي الي تخفيض الاجور و الاستغناء عن بعض عمالتها فما بالك بتشغيل اناس جدد؟!!
الوضع و فكره البورصه الان ستمس بكل قسوه معظم افراد الشعب
و نظرا ان الانهيار ناتج عن تدهور سياسي فلن يقف الا حين تستقر الامور السياسيه
انما تحت ضغط المزيد من الانهيارات في حاله فتح البورصه للتداول الاسبوع المقبل فسوف تزيد الاسباب لتشمل انهيار اقتصادي
يا باشا أنا مقلتش صعود من الجلسة التالتة
أنا قلت استقرار السوق ... يعني معدل الهبوط أو الانهيار هيقل جدا لن أغلب عمليات البيع هتكون مع فتح السوق
و من هنا ليوم الأحد أكيد هيكون فيه أخبار سياسية ايجابية تلم الدور شوية في السوق ...
طبعا أغلب عمليات البيع هتكون مؤسسات و أجانب لأن الأفراد خلاص ميقدروش يخسروا أكتر من كده فهيتجهوا للاحتفاظ الا اللي عايز يبيع عشان يسيل فلوس ...
أظن و الله أعلم بعد جلستين هنشوف فيهم وقف لأسهم كتير الهبوط يبدأ يقل و عمليات البيع هتضعف لكن برضه هتكون مسيطرة بس بدرجة رعب أقل من بداية الأسبوع
و ربنا يستر