مشكله فى الالانترا --------- حصلتلى امبارح

**mmans** · 26-01-2011 01:23 PM

السلام عليكم جميعا اولا

من كام يوم كده حطيت بنزين من كالتكس الى على الطريق فى المنصورة ووانا اول مطلعت من البنزينه حسيت ان العربيه اتكتمت من البنزين و بكبسلها بنزين مش راضيه تجيب فجبت الفتيس على البارك و كبست بنزين عشان لو فيه شوايب فى البوجيه ولا حاجه تروح و بعدين مشيت عادى و كبست السحب جه معايا شويه بس مش زى التفويله الى قبلها ( كانت من بنزينه تانيه ).......

المهم وانا ماشى امبارح حصلت حاجه غريبه اوى كانت فى حته فاضيه كده مفيش عربيات امامى فقولت اكبس بنزين و اشوف السحب عامل ايه برضو بدوس مش راضيه تجيب خالص و بكبس بنزين على الخر مش راضيه برضو قومت ناقل تالت و بدوس برضو مش بتسحب و بعدين مشيت عادى بقه فجأه لقيت العربيه سحبت لوحدها و نطط منى و جريت وانا مش دايس بنزين خالص و بدوس فرامل عشان العربيه تقف و اما اسيب الفرامل ووانا مش دايس بنزين خالص تجرى منى اكنى مكيكلها و الى نجدنى ان الحته كانت فاضيه ووقفتها بصعوبه شديت الهاند و مسكت الطاره جامد مع الفرامل و قومت مبطل العربيه خالص فوقفت ووقفتها على اخر لحظه لو مكنتش بطلتها كانت الحته زحمت فى الاخر كنت هلبس فى الى امامى ........؟؟؟

انا بتهيألى العيب ده كلو من البنزين ال تيييييييت الى انا حطيتو من كالتكس عشان المرة الى قبليها فولت عادى و مفيش حاجه حصلت خااالص ......

يا ترى حلها ايه بقه اسيب البنزين ده احرق فيه و اخلصو و لا انزلو كلو و لا ايه بالظبط و هل اروح اظبط كهربه العربيه و لا دى كهربتها مش بتتظبط و لا ايه ......

و اكيد لازم اغير فلتر البنزين اول حاجه طبعا بعد الحركه البايخه دى الى عملتها فيه الالانترا

ومع العلم ان الزيت لسه مغيرو و لسه كتير عبال ميتغير انا حاطط شل الترا 10 الاف و مغير معاه فلتر الزيت و فلتر الهواء نظفتو بس مغيرتش فلتر البنزين و كمان بوابه الرشاشات روحت للميكانيكى فكها بره و نظفها بجاز و بعدين ركبها تانى قبل الموقف ده بكام اسبوع كده

فالمفروض الى يتعمل ايه عاوز رأيكو يا جماعه؟؟؟؟؟؟

انا هروح اساسى اغير فلتر البنزين و انظف الرشاشات تانى و البوابه و اغير البوجيهات هيه المفروض عند 20 بس انا لازم اغيرها بعد الموقف ده و لا ايه ؟؟؟؟

و اسف على الاطاله

**kar!m** · 26-01-2011 01:48 PM

أنا مستغرب جدا من ان العربية بتجرى و انت مش دايس بنزين بالدرجة اللى انت بتقولها دى .. دى متجيش على حد علمى الا لو دواسة البنزين أو سلك الاكسلاتير معلق.

**hosammoner** · 26-01-2011 02:06 PM

لا مش مستاهله تغير الفلتر طبعا هوا بمجرد البنزين ميخلص من العربيه وتمون تانى هينتهى كل دا بس برده موضوع انها ماشية لوحدها كدا من غير متدوس مالوش علاقة بنوعية البنزين خالص دا حصل معايا قبل كدا بس كانت بتاخر فى الدوارة الصبح بس ومكتومة شويه بعد ما مونت تانى كل شئ انتهى

**mmans** · 26-01-2011 02:10 PM

والله من غير مدوس بنزين خالص بدوس فرامل بس و اما اشيل رجلى من على الفرامل تجرى بس اما اقفلت العربيه و دورتها تانى كل شء ظبط و حسيت ان العربيه اما ادوس سنه بنزين بس بتجرى جامد مش زى الاول هل يبقى الكهربا عليا و لا ده عادى و لا ايه ؟؟؟؟؟؟؟؟

**M.Elhamy** · 27-01-2011 01:26 AM

أكيد ده مش عيب بنزين

**M.Osman** · 27-01-2011 02:06 AM

المشاركة الأصلية كتبت بواسطة m.elhamy

أكيد ده مش عيب بنزين

انا مش هفتي
لكن انا هقول على حاجة حصلت معايا و كان بسبب البنزين

فولت العربية و ركنتها
تاني يوم الصبح دورت لقيت العربية صوتها عالي جداً كأني دايس بنزييييين جاااااااااامد ... عااااااااااا
مؤشر الحرارة نط لفوووق و اتخضيت اصلاً روحت طافيها

دورت تاني و مشيت شوية وراح لوحدها !!
يعني الفكرة ان البنزين هو اللي كان مخليها كأنها بتدوس بنزين لوحدها ..!!

**mmans** · 27-01-2011 08:00 AM

اه فعلا البنزين له اثر بس انا طلبت الميكانيكى بتاعى امبارح و حكيتلو على الموقف ده قالى هتلاقى البنزين الى انت كنت حطو وحش

بس انا بقه اكتشفت حاجه ان البنزين بتاع اخر مرة دى اكتشفت ان هوة الى حلو مش بتاع المرة الى قبليها ف اما حطيتو على القديم مقدرش يستحمل الوساخه الى كانت فيه فعمل كده

بس دلوقتى بقت حاجه تانيه اسرع من الاول بكتيييييير

**ahly** · 25-03-2011 06:57 PM

ده عيييييب بنزين .......وال مايخلص لو لقتي 95 حط 5 ليتر ولا حاجه علشان تنضف ولو في شوائب تروح

**sound** · 26-03-2011 12:33 AM

انا مش مقتنع بان العربيه بتهيس بالشكل ده بسبب البنزين.بس انا حوضحلك خطوات الحل من وجهة نظرى.
1- حاول تحرق وتكبس على دواسة البنزين حتى تصل لاعلى مؤشر الار بى ام.
2- اعمل ريستارت للعربيه .(يعنى فك كابلات البطاريه وبعدين وصلهم تانى ودور العربيه وذلك لمعالجة اى تهنيج لكمبيوتر العربيه)
3- بعدين روح لميكانيكى محترم وخليه ينظف الرشاشات والبوابه وذلك باستخدام اسبراى وليس بغسيل الجاز.
4-اعمل تفويله بنزين 95 ويمكن الاستعاضه عن ذلك باستخدام منظف لدورة الوقود.
مش لازم تغير فلتر بنزين ولا بويجهات جرب الخطوات السابقه وادعيلى .

**M.Akef** · 26-03-2011 11:12 AM

غريبه يا عمرو باشا يعني انت رئيك كلتكس حلوه ولا وحشه!!
انا كنت مسافر القاهره من كام يوم و فولت منها البنزين كان زي الفل معايا
انا الي بيحصل معايا اني لما برفع رجلي من علي البنزين بحس ان العربيه بتفك النقله خالص دي الي سعات بتحصل معايا لكن انها تجري لوحدها غريبه جدا الحقيقه