الموضوع: جروب خالد سعيد جروب صهيونى يهدف الى خلخلة النظام فى مصر

اروجو القراءة كاملة والتعقيب بعد ذلك وللعلم (منقول ) بس الكلام منظم جداا وعجبنى


خالد سعيد، شهيد الطوارئ


يوم 29 يوليو تبدأ فعليا صفحة اسمها
" كلنا خالد سعيد "

الصفحة دي تبدأ لحض الناس على التعاطف مع شاب مات بعد اشتباك مع اتنين مخبرين، الصفحة الإجتماعية كبرت بسرعة ونظمت بعض المظاهرات صغيرة العدد واستخدمت الميديا اللي توافرت منها للدعاية للمظاهرات التالية...
صاحب الصفحة كان بيستخدم كتير شعار بطل فيلم
V for vendetta
اللي في الصورة..


صورة استخدمها ادمن خالد سعيد عشرات المرات في الجروب



وكذا مرة يشبه نفسه ببطل الفيلم " في " ..
قصة الفيلم بإختصار عن رجل فوضوي اسمه حرف " في " .. بيلبس عباءة سوداء دائما ومغطي وشه بقناع أبيض عليه ضحكة عريضة وهي نفس القناع اللي في الصورة، كان عنده تار بايت مع " النظام " و " الحزب " الظالم القمعي اللي كان بيبلطج على الناس ويعمل عليهم تجارب..
فقرر إنه يحدد يوم معين لتفجير مقر النظام وبعض المباني الأخرى، يسيطر لفترة وجيزة على وسيلة أعلام ويوصل للناس كلها أفكاره، في اخر الفيلم ينجح البطل في تفجير المبنى، هل ينتهي الفيلم؟ بتاتا!
أهل المدينة كلهم يخرجوا من بيوتهم لابسين عباءة مستر " في " وقناعه .. وخارجين في خطوات موحدة لتدمير ما تبقى من النظام البائد والرسالة اللي عايز يقولها إن " كلنا مستر في " ...
الفيلم جميل بالمناسبة.


وجه التشابه أكبر من مجرد صورة بروفايل حاططها أدمن جروب خالد سعيد... وجه التشابه يتضمن
1- مستر " في " وشه مظهرش أبدا طول الفيلم حتى بعد ما مات، بينما أدمن خالد سعيد برضه محدش يعرفه لغاية ما اختفى من عالساحة يوم الجمعة 28 يناير واشيع انه تم اعتقاله
2- مستر في بدأ معركة مع النظام واثر في عقول عشرات الالاف من الشباب عن طريق التلفزيون بينما خالد سعيد استخدم الانترنت وعبأهم بكراهية بالغة وعدم ثقة في الحكومة.
3- بدأ أدمن خالد سعيد الفوضى متبنيا دعوة أطلقها شباب 6 إبريل واللي كانوا بيعملوا مظاهرة كل شهر تقريبا مش بيزيد الحضور فيها عن 1000 شخص، تبنى الدعوة وكان نشاطه هو أقوى دافع لنزول الشباب حيث ربط الظلم الاجتماعي بالظلم السياسي وخلى الناس اللي كانت من سنة مش عارفة اي حاجة عن الدستور والسياسة تنزل تطالب باصلاحات دستورية وتشريعية بكل قوة لغاية ما صوتها انبح
اختفى ادمن خالد سعيد وحل مكانه شباب كتير بيقولوا ان "كلهم خالد سعيد" وكلهم بيحملوا نفس مبادئ أدمن خالد سعيد وتولوا إكمال مخططه بالوكالة بدون ما يقصدوا.

الصورة دي كان حاطها يوم 29 يوليو


صورة منشورة بتاريخ 29 يوليو في جروب خالد سعيد


وكلنا خدناها ايزي جدا بس مفهمناش مغزاها قوي، مستر "في الفوضوي " ماسك يافطة عليها اسم جروب كلنا خالد سعيد، وفي الخلفية ناس وقوارب بتغرق وغالبا اهرام وبرج القاهرة ومساجد كمان بيغرقوا
وجملة " استعنا عالشقا بالله " ..مش حاسس بحاجة غريبة؟


جروب خالد سعيد نشر بيننا معلومات غريبة جدا وأدعى انها رسالة من أخ تونسي " باللهجة المصرية " عن كيفية التعامل مع الأمن بوسائل بسيطة جدا..
حط التركيب الكيميائي لمادة الغاز المسيل للدموع اللي مصر بتستخدمه وحط وسيلة بسيطة لتفاديه عن طريق استخدام الخل والبيبسي...
حط وسيلة لتفادي عربيات الأمن المركزي وهي زجاجة سبراي اسود تغطي بيها النوافذ فميقدرش السواق يشوف
حط مواقع التجمع وخطتها...
حط مواقع استراتيجية للتجمع النهائي تعتبر " سرة البلد " وفيها وزارات كتير وكمان مقر الحزب والبرلمان والمتحف مراهنا إن التدمير حيطالهم في وسط الهوجة.
حط نصيحة غريبة جدا عن استخدام كوفيات عشان وشنا الكاميرات متصوروش !!! النصيحة ملهاش محل من الاعراب بس احنا نفذناها بدون تفكير مما نتج عنه ان في ناس كتير اندسوا في وسطنا كانوا بيحدفوا قنابل مولوتوف على عربيات الامن المركزي يوم الجمعة28 يناير وملثمين محدش شايف وشهم.
ونتج عن نصائحه ايضا اننا مبقيناش نتفرق بالغاز المسيل للدموع مما نتج عنه اننا بقينا لا نقهر الا بالرصاص الحي للأمن المركزي وتسبب في سقوط قتلى بالإضافة لكسرنا قدرة الداخلية على ردعنا

توقع الأدمن العبقري ان النت والتليفونات حتنقطع وقت المظاهرة وادانا التعليمات قبلها، وقت المظاهرة بقى الساعة 5 بالضبط في رائد شرطة في التلفزيون قال ان اللاسلكي فجأة مبقاش يشتغل ومبقيناش عارفين نتواصل مع بعض .. والموبايلات كانت مقفولة فبقينا معزولين فاضطرينا نهرب...

الأسئلة هنا...
1- إزاي عرف بخبرته المحدودة في المظاهرات العنيفة بحكم انه كان بيقولنا تظاهروا سلميا دائما، وسائل منزلية لقتال الشرطة؟
2- إزاي عرف خبر قطع النت والتليفونات قبل ما يحصل بيومين تلاتة تقريبامع العلم انها أول مرة تحصل في مظاهرة؟
3- إزاي تم التشويش على أجهزة اللاسلكي بتاعت الشرطة فاصبحوا في عزلة الكترونية من الساعة 5 ولغاية انهيار الوزارة كلها؟
4- إزاي تم معرفة التجمعات الكبيرة يوم الثلاثاء للأمن المركزي أمام جامعة القاهرة قبل ما الأمن ينتشر بكذا ساعة وتغيير المكان ده من قائمة اماكن المظاهرات بساعات معدودة؟

بعد استبعاد المستحيلات من نوع ضرب الودع وقراءة الكف... تتبقى الحقيقة الوحيدة المنطقية .. وهو أن وزارة داخليتنا كانت مخترقة بطريقة ما تسببت في نقل خطط الطوارئ بتاعت وزارة الداخلية للجهة اللي مسمية نفسها ادمن خالد سعيد والتشويش على اتصالات الوزارة في الساعة الحاسمة اللي فيها اكبر كثافة تظاهر.



حصل اللي حصل وانهارت الوزارة ... الأحداث التالية عجيبة جدا...
فتح 5 - 6 سجون في 24 ساعة؟؟؟ مع العلم ان السجون منطقة محمية جيدا وتحصيناتها فظيعة وجنودها منسحبوش بدليل ان في جنود كتير ماتوا ؟
هروب كل معتقلي الأخوان المسلمين ومكتب الارشاد من السجون ؟
هروب منفذ ومخطط خلية حزب الله الشيعية وتوجهه لغزة في 4 ساعات؟
حرق اغلب مقرات أمن الدولة في مصر بدءا من السويس وسيناء الحدود الشرقية لمصر؟
حرق أقسام الشرطة كتير جدا وأولهم برضه الجهة الشرقية لمصر؟
حرق مقار الحزب الوطني في مصر كلها؟
والأغرب هو هروب قتلة خالد سعيد - على حد زعمه - والادمن منشرش خبر هروبهم كانهم كانوا خبر ثانوي لهدفه الأن؟
.

في استنتاج عام قد يكون خاطئا بس برضه بعد استبعاد المستحيلات تتبقى الحقائق وهي إن تم استخدام الشباب لشغل وزارة الداخلية وكسر واحد من أقوى الأجهزة الامنية في المنطقة في ساعات معدودة واستغلال الفترة دي لتهريب مساجين مهمين جدا للاخوان المسلمين وحزب الله وحماس وفي نفس الوقت كشف الجبهة الداخلية بتاعت مصر تماما المسئولة عن مراقبة الخلايا النائمة داخل مصر والدفاع عنها ضد التدخل الأجنبي في الأرض المصرية ممثلة في مقرات أمن الدولة بم تحتويه من ملفات مراقبة واجهزة ووسائل مراقبة وتنصت ورابط بين العاملين.
الفترة اللي اتكشفت فيها جبهتنا الداخلية حصل تدمير لاقسام الشرطة بتعمد وتوجه محدد ووقت متزامن بطريقة عجيبة كأنها خطة موضوعة.


الناس ممكن تفتكر إني بالمح إن إسرائيل ورا الموضوع ده..
طيب نستبعد المستحيلات الأول...
1- هل إسرائيل غير راضية عن الرئيس مبارك؟ لا طبعا .. دي راضية جدا !
2- هل إسرائيل من مصلحتها تهريب ناس من حماس وحزب الله والأخوان؟ لا طبعا !!!
3- من له المصلحة الوحيدة في تهريب حماس وحزب الله والأخوان وفي نفس الوقت هو عدو لمصر؟
الإجابة معروفة لأي شخص بيتابع السياسة الخارجية ..
إيران !
عارف إننا إعتدنا نشتم ونسب في أيران في الإعلام الحكومي بتاعنا لأسباب إحنا مكناش عارفينها، بس مكناش بنصدقهم لمجرد انهم حكومة ولمجرد اننا مش بنثق فيهم... طيب افرض انهم كانوا صادقين وفي احتمال فعلا ان إيران كانت عايزة تتدخل خارجيا فينا زي ما بيقولوا؟


إيه مصلحة إيران في اللي حصل؟
أولا يجب الربط إقليميا بين كل اللي حدث خلال الشهرين اللي فاتوا في الشرق الاوسط وبين اللي حصل في مصر.. ثورة اسلامية على النظام العلماني في تونس... ثورة في مصر اقوى محركيها جماعة اسلامية.. إنقلاب في لبنان على الحكومة السنية واستبدالها بحكومة شيعية... إجبار واحد من ألد اعداء ايران وهو الرئيس اليمني علي عبدالله صالح على فرض وقائع سياسية جديدة في بلده...
امسك الاطلس وارسم خط بين مصر ولبنان والاردن واليمن وايران ... مين في النص؟
عليك نور .. السعودية ...



حتقولي طيب وليه اصلا ايران تحاصر السعودية بدول فيها أنظمة موالية لإيران او معندهاش مشكلة في التعامل مع إيران؟

1- لان ماركس بيقول إن الثورة في أي بلد بتحمي نفسها عن طريق تصدير الثورة للدول اللي حواليها زي ما عملت روسيا الشيوعية مع الاتحاد السوفيتي وزي ما عمل عبدالناصر القومية العربية مع الجزائر والدول الافريقية والسودان واليمن ودول اخرى... والثورة الإيرانية بقت محاصرة حاليا ولابد لها من تصدير الثورة الاسلامية وخصوصا ان أحمدي نجاد رئيس إيران من قادة الثورة الايرانية اصلا
2- في عداء قديم ومعروف بين الصفويين او الايرانيين والوهابيين او السعودية من ايام الفرس والعرب.. عداء تاريخي مش وقته نقوله هنا بس الخلاصة ان السعودية بتدعم اي حركة ضد ايران زي اليمن او حكومة الحريري او صدام حسين العراق...
3- مصر والاردن والسعودية واليمن بيمثلوا ما يدعى الهلال السني او رأس الحربة السني، الموجه لقلب إيران ... والمعروف إن الانظمة الثورية على انظمة أخرى بتتبنى كل ما يعادي أسس الانظمة القديمة ... يعني لو النظام القديم ملكي الجديد حيبقى جمهوري.. لو القديم بيعادي ايران الجديد حيصاحبها... لو القديم ديني يبقى الجديد علماني.. وهكذا فيما يسمى نظرية الكارثة اللي مكتوبة على وول الجروب.
4- ايران اتهمت مصر كذا مرة انها ساعدت في اغتيال علماء نوويين وانها ايدت مير حسين موسوي اللي كان ضد نجاد في الانتخابات الاخيرة وانها أججت المظاهرات هناك، بالإضافة لكده عمر سليمان في ويكيليكس بيقول للسفيرة الامريكية إن مصر عندها خلايا نائمة في ايران ممكن تستخدمها في اي لحظة، ولو ده صحيح .. ايه اللي يمنع ان ايران برضه تكون عندها خلايا نائمة في مصر؟
5- تهريب عناصر حزب الله وحماس ومكتب الارشاد كله


دلوقتي تخيل دولة بحجم مصر سقط النظام المعادي لايران فيها بتدخل ايراني مباشر وقوي في مصر، هل النظام الجديد سواء الوفد او الاخوان او اي نظام اخر حيعادي ايران برضه؟
هل لما مصر ساعدت الثورة الجزائرية الجزائر بعد النجاح اعتبرتها تدخل خارجي؟
هل لما مصر ساعدت الثورة الجمهورية اليمنية على الملكية .. اليمن اعتبرت مصر عدو بيتدخل خارجيا في شئونها ولا حليف قوي؟
طبعا حليف قوي لانه [Unload]
هو اللي جابهم للنظام ...
ده اللي حيحصل في مصر، النظام الجديد أيا كان حيبقى محالف او موالي لإيران.

واللي يأيد بعض الشكوك دي هي خطاب المرشد الأعلى للثورة الإيرانية في يوم الجمعة السابق واللي تحدث فيه لأول مرة باللغة العربية بدل الفارسية كانه بيبعت رسالة للشعب المصري ان " ايران صديقة الثورة " وبيقول فيها ان الثورة في مصر وتونس هي نتاج الثورة الايرانية وانهم خطوات اولى في اقامة شرق اوسط اسلامي !!!!
ده اعتراف صريح ولا بيتهيألي؟

السؤال القادم اللي انت حتطرحه هو... إيه علاقة جروب خالد سعيد بإيران؟
نحط فرضية لذيذة، قد تكون غريبة شوية ومتطرفة بس في الواقع في اغرب منها واكثر فانتازية في عالم السياسة عبر التاريخ
.
إيران تحط خطة ما ك"تشيك ليست" محددة باستخدام ما يسمى نظرية الفوضى والكارثة، نظرية الكارثة بتقول إن في أي نظام مستقر ( اي نظام سواء اقتصادي او اجتماعي او سياسي ) لو عملت تغيير بطئ حيستوعبه النظام المستقر ببطء ويحتويه كأنك بتميل قزازة مية 30 درجة مثلا ببطء حتلاقيها ترجع مكانها تاني وتثبت ..
بينما لو عملت تغيير سريع في نفس النظام، حتختل التوازن وتقع القزازة او ينكسر النظام
ونظرية الفوضى انك لو تسببت في فوضى صغيرة في نظام ما مستقر، حتنتقل الفوضى دي من مكان لمكان فيما يسمى بتأثير الفراشة، لتخلق في النهاية نظام أخر جديد مستقر يعادي كل ما كان عليه النظام الاقدم منه ومنها العلاقات الخارجية فيما يسمى الفوضى الخلاقة وده المصطلح اللي استخدمته كوندليزا رايس قبل كده.
في يوم 1 يناير وهو تقريبا بعد بدء الثورة التونسية باسبوع واحد فقط حصلت حادثة دموية غير مصرية الطابع في كنيسة القديسين لولا ستر ربنا وتحضر المصريين الموضوع خمد، أكاد أجزم ان الحادثة دي كانت لشغل أمن الدولة قليلا عن العمل الايراني الدائر في البلد والتخطيط لبدء الجحيم يوم 25 يناير.

فاللي عملته إيران ممكن هو الدخول في نظام ما مستقر فيه مشاكل اقتصادية واجتماعية معينة، تبني قضية فيهم سواء البطالة والبوعزيزي في تونس، أو التعذيب وخالد سعيد في مصر، وتسليط الضوء بقوة على الحادثة الفردية دي وتضخيمها وابراز الجزء الإنساني فيها.. ثم ربطها بمطالب إجتماعية معينة لجذب الناس اعلاميا وخصوصا ورئيسيا على الانترنت وقنوات محرضة كالجزيرة... ثم الخروج في مظاهرات اجتماعية تتخللها مواجهات مع الشرطة ينتج عنها ضحايا عن طريق تقوية المتظاهرين لحد غير معتاد، ثم تحويل المطالب الاجتماعية لمطالب سياسية.. وتدور العجلة وتنشأ الفوضى التي تولد فوضى أكبر وهكذا إلى أن تنتشر الفوضى في البلد كلها ويتغير النظام بالكامل وده يساعد في خلق فوضى أخرى في الدول الحليفة.


في مصر اللي حصل هو بالظبط وبالمللي ما حدث في تونس في فترة قصيرة بطريقة مريبة مطبقا نظرية الفوضى والكارثة واحداث تغيير سريع وفوضى سريعة في نظام مستقر يعقبه حوادث قتل لتاجيج المشاعر واستغلالها إعلاميا.
العامل الجديد اللي حصل في مصر بقى هو ان نظامنا مستقر واذكى من النظام التونسي، ففي يوم الثلاثاء الماضي أعلن عمر سليمان ان في مؤامرة اقليمية ما على مصر وانه حيكشفها قريبا، عمر سليمان رجل مخابرات ولما يقول ان في مؤامرة اقليمية يبقى غالبا قصده على ايران.
ويوم الثلاثاء برضه اعلن الرئيس حزمة من الاصلاحات وتنفيذ المطالب اللي أبكت الناس وأرضت أغلبهم وبدأ الناس فعلا في مغادرة ميدان التحرير


فجأة تنشأ فوضى اخرى غير متوقعة من جهة غير معلومة في افتعال خناقة غبية مع المعتصمين تاني يوم الصبح واستغلالها اعلاميا بقوة فظيعة ووضع عناصر اخراج دراما في جمال وحمير تتسبب في خلق تعاطف كوني معاهم وزيادة عددهم ورفع سقف المطالب ورفضهم للحوار... كل الناس اتهمت النظام انه عمل كده... طيب حد فيكم سأل نفسه إيه شرط المصلحة في الإتهام ده؟
مفيش طبعا أي مصلحة !!
الناس كانوا بيفكوا اعتصامهم وتاني يوم كانت المفاوضات حتبدأ بس الطرف التالت قرر إن الفوضى السابقة تم إحتوائها فقرر إنه ينشأ فوضى جديدة سريعة عن طريق تاجير بعض البلطجية للاندساس على المؤيدين لمبارك وتوجيههم بدون داع لميدان التحرير وافتعال مواجهات دامية معهم لإفشال ما تم استيعابه اليوم السابق.
وكمان اللي حيجنني ان من امتى الدولة بتاعتنا بتأجر حمير وجمال لضرب المتظاهرين؟؟؟؟
الشهادات اللي سمعناها من ناس هي " دفعولي فلوس عشان أجي اتخانق" .. افترضنا توماتيكي انه النظام رغم انه ملهوش مصلحة ... اللي له مصلحة هو من يرغب في افشال المفاوضات وعلى رأسهم إتنين الإخوان او ايران.. وصعب الاخوان يعملوا كده في نفسهم فغالبا ايران.


حدش سأل نفسه إشمعنى السعودية والإمارات هم الدولتين الوحيدتين اللي أيدوا النظام المصري بصوت عال جدا وبكل إمكانياتهم حسب تعبيرهم؟
لأنهم الأتنين عارفين او عرفوا من مصر إن ايران تدخلت بشكل مباشر في مصر والاتنين ليهم مشاكل مع ايران سواء السعودية في لبنان والعراق او الامارات في الجزر الاماراتية الثلاث المحتلة من ايران

حدش خد باله أن قناة الجزيرة بتبث بقالها 10 ايام اخبار مصر فقط؟
هل معندهاش جمهور تاني غير الجمهور المصري وهي قناة عالمية؟
هل لاحظتم ان وقت انقطاع الانترنت تولت هي نشر معلومات وخطط واماكن وتعليمات التظاهر في مصر؟
هل لاحظتم ان مؤخرا بقت تحدد لنا أماكن التظاهرات بفروقات زمنية تتقلص كل شوية وتقول ان " مصادر " قالت لها او " شهود عيان " بدون ذكر من هم هؤلاء الشهود؟
هل حسيت في لحظة انها بتوجه المتظاهرين مش بتنقل لهم اخبار؟
تخلت عن مهمة نقل الحدث لتصبح صنع الحدث..

قناة الجزيرة في دعمها الدائم لحماس وحزب الله والاخوان المسلمين وعدائها للانظمة العلمانية والأنظمة السنية كمصر والسعودية مثلا وعدائها الشديد لاسرائيل وامريكا رغم حيادها المفترض؟ .. معروف ان القناة مقربة لإيران جدا ومعروف انها بتتبنى كل وجهات النظر الايرانية تقريبا فايران دلوقتي بتضغط باستخدام كل اوراقها العلنية والسرية عشان تخلق الفوضى في مصر لنشوء نظام اخر اكثر قربا لها واكثر بعدا عن رأس الحربة السني


هل حد فيكم لاحظ إستخدام الرئيس كلمة فوضى في حديثه للايه بي سي؟
واستخدام عمر سليمان لنفس المصطلح؟
هل من الممكن انهم تبينوا الحقيقة بعد فوات الأوان؟ وأن هناك مخطط فوضوي معين؟
الله أعلم.. توقعي الخاص ان مستحيل الوضع يعدي بسلامة...
إيران قريبا جدا حتتحرك بقوة وبسرعة وخصوصا في ظل جبهة داخلية مكشوفة لضرب الطرفين في بعض لافشال المفاوضات المرتقبة.


الخلاصة: صفحة خالد سعيد اللي ثبت انها مش مصرية خالص وانها بتتبنى أجندة تصعيدية هي تمت لإيران او حلفاء إيران بطريقة ما والدلائل في الصفحة نفسها زي استخدام لهجة شامية احيانا، وقيادة الصفحة وقت قطع النت عن مصر، وتخليهم عن الطلبات الاجتماعية وقلبها لمطالب سياسية وحاجات تانية كتير .
[/Unload]