أول مـــرة أقلـق من الجـــرى و الفرمـــلة فى الماتريــــكس

**Ah.Farid** · 26-03-2008 04:50 PM

انا هاحكيلكوااللى حصل
انا الماتركس معايا بقالها حوالى 6 شهور
انا مش من هواة الجرى بالعربية يعنى بمشى 70 80 فى العادى
كنت من يومين مروح مستعجل وعلى كوبرى فيصل وبجرى لغاية نهاية الكوبرى وعاوز اخش يمين على شارع المساكن المهم دوست فرامل جامد شوية وفى لحظة حسيت ان العربية بتعوم من ورا المهم ربنا ستر وعرفت الم الدركسيون بسرعة بس حسيت بقلق من الجرى مع الفرامل الجامدة

مش عارف هل عادى ومرة وعدت ولا اخلى التوكيل يبص على الموضوع

**أبو عبدالله** · 26-03-2008 05:00 PM

هو ده اللي بيسموه العربيه ثباتها وحش
لأن للأسف الناس بتفتكر ان الثبات ده لما تمشي على سرعه وتأخذ ملف فقط
ولكن المفروض الثبات كمان انك لما يحصلك اي شئ مفاجأ على سرعه العربيه تساعدك على انك تلمها
مش تساعدك على انها تعومك
وده معناه ان ثباتها ليس جيد في الحالات الحرجه
وتخيل بقه انك لو كنت ماشي 140 مثلا فيما فوق كان ممكن العربيه تتظبط بسهوله ولا لقدر الله كانت زمانها دلوقتي طايره
وانت اللي هترد عليا في السؤال ده

كانت العربيه عملت ايه بتوقعاتك وتجربتك انت ؟

**amr mokhtar** · 26-03-2008 06:07 PM

يا جماعة مفيش عربية فى الدنيا مضمونة 100%
كل عربية وليها عيوبها فبلاش الثقة الزائدة عن الحد فى عربياتنا
لإن الطريق ملوش كبير
و هقولك على حاجة العربية اللى معانا بقالها أكتر من 6 سنين يعنى انا حفظتها و الحمد لله و عارف قدراتها إلا ان أحيانآ بحس ان فراملها قوية و أحيانآ احسها ضعيفة شوية عشان كده بحاول انى مجريش فى الزحمة و أخلى مسافة أمان كويسة

انا بقولك الكلام ده عشان أوصلك ان مهما كنت واثق فى عربيتك فبلاش الجرى الزائد عن الحد لإن مفيش شىء مضمون 100%

و للأمان روح أكشف على الفرامل عشان الفرامل دى أهم حاجة فى العربية

و ربنا يستر طريقنا و يكفينا شر الكوارث اللى بتحصل

**Ghamrawy** · 26-03-2008 06:26 PM

ربنا ستر و هنا تيجى فايدة ال EBD &ABS و فى حاجة تانية كمان لاحظتها فى كل العربيات اللى سوقتها و هى ان الفرامل الامامية بتكون اقراص ذاتية التهوية و بالتالى فرامل اقوى و تبريد فعال بينما الفرامل الخلفية عبارة عن طبلة مغلقة ضعيفة التهوية و لا تتناسب قوتها مع الفرامل الامامية و ده اللى بيخلى العربية تعوم من ورا + قلة عدد وصلات التعليق الخلفية(ممكن تكون 3 و صلات او 2 او wish bone) ودى بتكون المسئولة عن بقاء كل مداس الكاوتش على الارض فى اصعب الحالات
ياريت يا جماعة تاخدوا بالكم ان الماتركس دى عربية عائلية للاستخدام العائلى الهادى و مش للجرى ابدا

**Noha.M** · 26-03-2008 06:36 PM

فكرتنى باللى حصلى برضه ايام اللانوس (الله يمسيها بالخير ) برضه قرصت عشان

انجز و اخلص و كنت هخلص فعلا !!!!!!!!

حمد لله على سلامتك و خلى بالك مافيش حاجة مضمونة اليومين دول

**محمد ابراهيم 1** · 26-03-2008 10:41 PM

الله يمسيها بالخير ال 405
أنا دلوقتى ماشى خايف بعد ما غيرت للياريس

**momomania22** · 27-03-2008 12:25 PM

من خبرتي في سواقة الماتريكس
الفرملة المفاجئة على سرعة عالية مش حلوة خالص
بس ربنا بيستر

**sa3dawy** · 27-03-2008 12:37 PM

المشاركة الأصلية كتبت بواسطة محمد ابراهيم 1

الله يمسيها بالخير ال 405
أنا دلوقتى ماشى خايف بعد ما غيرت للياريس

احنا هنغلط بقا؟:d:d:d
الصراحة الياريس مش ثابتة اوى بس مش لدرجة انك تخاف وانتا سايقها

**liquidator** · 27-03-2008 04:29 PM

يا جماعه الماتريكس عربيه تقيله جدا فأكيد الفرامل فيها مش زي الفرامل في الجيتز مثلا أو الالنترا بسبب فرق الوزن بس الفرامل برده أنا شايف انها كويسه جدا و ممكن يكون الفرامل عندك مش مضبوطه أو واخده هوا أو الزيت ناقص أو التيل عايز يتغير أو التيل اللي راكب مش الأصلي و نوع مش كويس و ممكن يكون كمان مساعدينك عمرهم الافتراضي انتهي و ده من أهم أسباب عدم ثبات العربيه خصوصا في المواقف اللي زي دي .. اكشف علي الفرامل كويس من الحاجات اللي أنا قلتهالك دي و اكشف علي كفائة مساعدينك أخبارهم ايه عند غبور , و لو انت لسه في الضمان و أعتقد انك لسه في الضمان , هايكشفلك عليهم ببلاش و هايقول لك كمان كل مساعد كفاءته كام في الميه بالضبط .
و ربنا المستعان ان شاء الله ...

**Ah.Farid** · 27-03-2008 04:41 PM

الحمد لله على ستر ربنا
على فكرة الموضوع دة مش متكرر فى العربية
لانى حاولت اجرى وامسك فرامل النهاردة وكانت القطوطة زى الفل
لدرجة انى كنت على كوبرى اكتوبر وجبت ال120 ومسكت فرامل على مراحل يعنى مش مرة واحدة
والحمد لله مفيش مشاكل
مع انى كنت مستعد ومحرص للمفاجأت