شهادة من قلب الحدث لأحداث النهارده .... الشاهد ده انا اعرفه شخصيا
السلام عليكم يا مصريين
بداية ان كان اعلام مصر المملوك لعصابة الحزب الوطني مضلل وده للاسف وهو ما يعد استهزاء واستخفاف بعقول المصريين احب اقول لكم الحقائق من قلب الميدان ولكم ان تعقلوا
الثورة المصرية ثورة تعلم العالم كيف يثور بتحضر ورقي
في ميدان التحرير بقينا تسعة ايام لم تخرب شجرة ولم يتسخ الميدان بورقة بالعكس شاهدت وقمت كمان بنفسي بجمع القمامة من علي الارض
لن اطيل عليكم كثيراً لان الحقائق في الفضائيات وخاصة المحترمة منها واضحة للعيان
اللي حصل النهارده ما هو الا رسالة من مبارك للمصريين مفادها اني لازلت حاقعد علي قلبكم تسعة شهور من القمع الشديد عقاباً للمصريين علي انتفاضهم لشرفهم وكرامتهم وحريتهم
مبارك اللي القي خطاب مليء بالكذب من اول لاخر كلمة
وعبأه بكل اشكال التدليس والنصب والاحتيال علي الشعب
ارسل بلطجية ولصوص وقطاع طرق ومنتفعين من اعضاء الحزب الوطني البائد بالاضافة الي كل تشكيلات الامن في ملابس مدنية بداية من امن الدولة مروراً بالظباط وامناء الشرطة وانتهاء بمجندي الامن المركزي في زي مدني وسارفق لكم صورة او بعض صور للاحداث مع النوت ان شاء الله
وصل متظاهرين بيهتفوا لمبارك للميدان من الساعة 11 تقريباً ووقفوا برة علي البوابات اللي عاملينها المرابطين في الميدان لمساعدة الجيش وضمان ان ما حدش يدخل المظاهرات من الامن او حتي من المتظاهرين ويحمل اي اسلحة مهما كانت وطبعا الامن ممنوع يدخل اصلاً
فجأة بدأ المتظاهرين في القاء طوب علي المتظاهرين اللي جوة الميدان وبدون ما يكون عند المتظاهرين جوة اي نية طبعاً لرمي اي حاجة
مما اضطر المتظاهرين في الداخل الي البحث عن طوب وبدأ تبادل قذف الطوب لمنع البلطجية والمسجلين خطر من الدخول للميدان وايذاء المتواجدين بالداخل من نساء واطفال وشيوخ
فضلت المعارك ان جاز تسميتها وهي كذلك بالفعل من 11 لحد الان والحمد لله كل المتظاهرين اللي كانوا جايين يهتفوا لمبارك ب 50 جنيه النفر تراجعوا واصبح وجودهم بالخارج شبه معدوم لانهم ماجورين ومش علي عقيدة ولا مبدأ
والله العظيم شاهدت الكثير من المجرمين والمسجلين خطر والبلطجية اللي اتقبض عليهم داخل المظاهرة لمحاولتهم التسلل الي داخل التظاهرات بالميدان
هؤلاء هم زبانية مبارك اللي بيحاول يحكمنا بيهم الله المستعان
تم ضربنا بالمولتوف والحدارة والحمد لله تصدينا للمخربين وترجعوا علي كل المداخل ويؤسفني اقول ان اول قتيل النهارده كان فرد امن في زي مدني جاي يضرب فينا وده ضحية برضو من ضحايا مبارك السفاح
ميدان التحرير يا جماعة محتاج منكم الدعم لان المرابطين في الميدان دول اللي كانوا امبارك اكتر من اتنين مليون جايين ومعرضين حياتهم للخطر والموت علشان مصر مش علشان اي اغراض زي ما التليفزيون المصري بيدعي
احنا شفنا الموت بعنينا النهارده وما تراجعناش خطوة لورا
كنا بنصد الناس ولما نتعب نريح ونقول بعدها بدقائق لاستكمال الدفاع عن نسائنا واطفالنا ورجال مصر الشرفاء
ولا كان فيه احزاب ولا زفت لكن فيه مصريين مؤمنين بان المصري يستحق ان يعيش بكرامة وحرية وشرف في وطنه
جوة الميدان ما فيش غير ناس بتحب مصر
وفي السلطة فيه شخص وحوله حزب مستعدين يولعوا مصر علشان يفضلوا قاعدين علي الكراسي ينهبوا في مقدرات مصر وثرواتها
انا مش حاقول لحد انزل او ما تنزلش
كل واحد يعرف هوا عاوز بكرة شكله ايه ويختار
هيا معادلة
عاوز استقرار وذل
او استقرار وحرية حتي لو كان التمن دماء الشرفاء في مصر
اعذروني انا مش قادر اكتب اكتر من كدا لاني منهك من المعركة اللي للاسف بسبب النظام الفاسد بقت بين ابناء الشعب الواحد ولاحسوا الكراسي باقون مصرون علي لحسها رغم ان العالم اجمع قال لهم غوروا بقي لكن مين عنده دم او مين يسيب الكنز اللي عمال يسرق فيه بسهولة
حسي الله ونعم الوكيل في كل ظالم
http://sphotos.ak.fbcdn.net/hphotos-..._1744609_n.jpg
دماء الثوار الشرفاء علي ارض ميدان التحرير اشهد يا تاريخ
http://sphotos.ak.fbcdn.net/hphotos-..._3835543_n.jpg
حتي ائمة الازهر لم يسلموا من البلطجة المباركيه
http://a2.sphotos.ak.fbcdn.net/hphot...5_745373_n.jpg
دول المتظاهرين اللي بيحبوا مصر في ميدان التحرير الصلاه في كل مكان
http://a4.sphotos.ak.fbcdn.net/hphot..._5292518_n.jpg
عربية رائد شرطة من مروعي الامنين في الشوارع مساء يوم الجمعة اعتقله الاهالي في الدقي ونقله الامن القادم لحراسته علي العنايه المركزة وبلغنا انه مات بسوء عمله في ترويع الامنين
اعرفوا مين اللي بيروعكم يا مصريين والتالي ورقة رسمية احلاء طرفه من مديرية امن لمديرية امن الجيزة وكان وقتها نقيب
http://a4.sphotos.ak.fbcdn.net/hphot..._2274643_n.jpg
ستند من المستندات اللي وجدت في السيارة المسروقة اللي كان راكبها الرائد اللي اطلق علينا النار في الدقي وحاول الهرب
المستند يبين انه في 2002 نقل الظابط من امن المنيا الي امن الجيزة
وسيارات الامن اللي كانت بتجوب الشوارع بدعوي تامين المواطنين كانت في الحقيقة علشان تلحق اللي بيضربوا نار من الشرطة بملابس مدنية في الشوار
سيبقي التاريخ شاهد علي جرائم مبارك واعوانه
http://sphotos.ak.fbcdn.net/hphotos-..._4253281_n.jpg
http://sphotos.ak.fbcdn.net/hphotos-..._4253281_n.jpg
من متظاهري اليوم المؤيدين لمبارك ونظامه القمعي
جندي امن مركزي قدم ليقذف المرابطين بالحجارة وقبض عليه مثل المئات اليوم في ميدان تحرير مصر
اترك لكم التعليق علي مظاهرات تاييد النظام الفاشي لمبارك الطاغية
http://sphotos.ak.fbcdn.net/hphotos-...2_855472_n.jpg
دا اللي بيحصل في الميدان الجيش والشعب ايد واحدة
ظابط بيساعد مع المعتصمين في تحميل القمامة في عربة الجيش
للاسف انقلب الحال وقت المواجهة والجيش وقف يتفرج علي المصريين بيسحلوا بعض