ما وراء إستراتيجيات الجينرال أنس الفقي
[justify]يجب أن نعترف أن كثير منا كان مبعد عن معرفة ما يحدث في المعترك السياسي والشأن المصري الداخلي والخارجي .. يعني من الأخر كدة أبيض يا ورد .. فلة .. كل اللي نعرفه إسرائيل وحشة وأمريكا وحشة وعايزين يحتلونا ممكن في يوم ننام بدري شوية تقوم إييييه إسرائيل متسحبة ومحتلانا .. والنظام يعلم بهذا الجهل بل وكان يغذيه ويحصن نفسه به وأهو جه الوقت اللي يحتاج فيه الناس اللي تم إبعادهم وتم وأد وعيهم.
يعني كتير مننا مكنش عندهم خلفية عن أي حاجة وبالتالي مكنش عنده رأي .. تم تحويل هؤلاء إلي مناضلين يحملون لواء الإستقرار والسلام والعودة للحياة البمبي التي كنا نعيشها .. وتم تصوير من هم في التحرير علي أنهم الشيطان نفسه مشيع الفوضي .. لا يوجد لوم لأحد .. أي حد في الظروف دي شايف مصيبة بتحصل في البلد وناس بتموت وهو مش فاهم أبعاد اللي بيحصل وواحد جه إداله رأي بعد ما كان مش فاهم حاجة ومعندوش رأي وخلاه كمان مدافع عن البلد من "الضلال" اللي في ميدان التحرير اللي تابع لمخططات داخلية من الإخوان وخارجية من إسرائيل وأمريكا وإيران وتنزانيا وترينداد وتوباجو وكأن العالم كله إجتمع فجأة لإحتلال مصر عشان هي فيها قطن طويل التيلة وجوها معتدل طوال أيام العام أنظر كتاب الدراسات الإجتماعية أولي إعدادي.
نفسياَ فإن الإنسان يميل إلي المشاركة إذا كان فيه حدث كبير بيحدث حواليه، ولو ميعرفش حاجة عنه، بيتبني الرأي اللي يحققله أكبر مشاركة وفاعلية في الأراء المطروحة لأن الإنسان يحاول دوماَ أن يحظي بأكبر قدر من الأهمية، وده اللي تم إستغلاله لتحويل من لم يكونوا يذهبون للتحرير في الأصل للدعوة إلي التوقف عن الذهاب للتحرير، شوفوا اللي في التحرير الوحشين بيعملوا مع إن الراجل الغلبان طلع قالهم والله هصلح كل حاجة إدوني فرصة أنا عايز أموت في البلد دي! هما عايزين إيه تاني! بل وإغراقهم في صراعات وتنمية الكره للجانب الأخر "أنا مش مأجور يا أغبيا والله أنا مؤيد ومش مأجور ده بجد!!" فأصبح يدافع بإستماتة عن الرأي الذي تم إقحامه عليه في الأساس ويجتهد في إثبات صحته.
تم بث رسائل كاذبة لهم من النظام بل وساذجة أيضاَ، لكن النظام يعرف أن الموجه لهم هذه الرسالة ليس لديهم أي خلفية عن ما كان يحدث قبل ذلك وأي أزمات داخلية سابقة في مصر، ميعرفوش إن الحزب الوطني في العادي بيجيب بلطجية للسيطرة علي الإنتخابات ودلوقتي بيستخدمهم لإشاعة الفوضي ويقول دول المتظاهرين .. لكن عارف إن الناس ممكن تتعاطف مع جملة زي "المصريين بقوا يضربوا في بعض الأخ بيموت أخوه حرام يا ناس كفاية!!" .. ويدافعوا عنها بإستماتة كمان.
ذلك بالطبع لم يؤثر لأن اللي كانوا بيقولوا مش هننزل كان معظمهم مش بينزل أصلاَ، حتي مع جهود مخبرين الحزب الوطني اللي إنتشروا في التليفزيون وعالنت وفي كل حتة "إحنا من شباب 25 يناير بس بنقول كفاية كدة بلدنا هتضيع يا ناس محدش ينزل!!" .. وده طبعاَ بعد ما إتحرق كارت مبارك أبونا وإحنا أسفين يا ريس .. بعد ما أبونا دبحنا فجر الأربعاء في الميدان.
لا يوجد لوم لأي أحد .. لكن علي الجميع ممن سمحوا لغسيل المخ بإختراق أمخاخهم أن يفكروا مرة أخري ويشوفوا مين رجع النت في وقت معين عشان يستغلهم في عمل فتنة هما نفسهم بيصرخوا لإيقافها مع إن هم من تم إستغلالهم لنشرها، ومين بيوجهلهم رسائل معينة علي التليفزيون ويرجع يقول الجزيرة مش عارف إيه ..
وأعتقد إن لبانة الإخوان دي خلاص إتحرقت وإلا فإن عمرو موسي اللي تواجد في المظاهرة إخواني بالإضافة لعمرو واكد وخالد أبو النجا ورامي إمام ومحمد إمام ومني هلا وخالد الصاوي والقضاة والمتحدث بإسم الأزهر وكمان المسيحيين اللي طوقوا صلاة المسلمين في الميدان عشان محدش يأذيهم وهما بيصلوا الجمعة كلهم إخوان، بالإضافة لكل الأخبار الكارتونية مش عارف أسبانيا حركت الأسطول وألمانيا وقفت الجيش الإحتياطي علي حدودها مع جنوب أفريقيا لإحتلال مصر عن طريق العتبة والباور رينجرز وسوبر ماريو في التحرير والنينجا تيرتلز بيتفاوضوا مع الإخوان.
توقف للحظة وإعرف مين بيدافع عن حقوقك .. إعرف مين السبب إن فيه ناس بتاخد عدتها وتروح تقف في شارع الجلاء مستنية حد يروح يشغلها فواعلية باليومية .. إعرف مين السبب في إنهم كدة مش تقول المتظاهرين اللي بيدافعوا عن حقوقهم وحقوق الناس دي وحقي وحقك ودمهم ساح عشان كدة هم اللي موقفين حال الناس دي وموقفين حال البلد .. الحقيقة إن الحال عمره ما كان ماشي أصلاَ
أقف للحظة .. وفكر
محمود مصطفي كمال
[/justify]