| تسجيل عضوية جديدة | استرجاع كلمة المرور ؟
Follow us on Twitter Follow us on Facebook Watch us on YouTube
النتائج 1 إلى 2 من 2

  1. #1

    الصورة الرمزية تامر.محمد

    رقم العضوية : 5118

    تاريخ التسجيل : 01Feb2008

    المشاركات : 11,185

    النوع : ذكر

    الاقامة : Cairo

    السيارة: Megane II 2010

    السيارة[2]: كانت دايو لانوس1 99 - وزة :)

    دراجة بخارية: none

    الحالة : تامر.محمد غير متواجد حالياً

    Post اخر تدوينة لنوارة نجم : إلى المتضررين... حقكم مع مبارك مش معانا - Facebook Twitter whatsapp انشر الموضوع فى :

    hasad">

    مبارك بيعمل زي اسرائيل بالظبط، بيعاقب الشعب كله، اللي نزل واللي ما نزلش:
    مانع مرتبات الموظفين والعمال
    قاطع عيش الناس وعامل حظر تجول بدعوى ان فيه بلطجية
    مع ان هو اللي منزل البلطجية، ومع ان البلطجية بيظهروا في حظر التجول وبيختفوا في الزحمة، كل اللي بيتقبض عليهم في الشارع من البلطجية - واللي بيطلعوا بعد كده شرطة وبلطجية رجال اعمال - بيتقبض عليهم في فترة عدم الحظر، بداية من الحظر البلد بتبقى مرتع للبلطجية يضربوا نار في الهوا


    لو شارع الجلاء رجع اتزحم تاني كالعادة مافيش بلطجي حيعرف يطلع بمبة يفرقعها والا حيموت ضربا بالشباشب في طريقه لدبابة الجيش


    حظر التجول بيساعد البلطجية، وبيقطع عيش الناس، ومش احنا اللي عاملين حظر التجول، ومش احنا اللي قفلنا البنوك، ومش احنا اللي وقفنا المرتبات، وماحدش فينا رجل اعمال واتسمح له يسحب اموال طائلة من البنوك عشان يوقع اقتصاد البلد

    حقكم مع مبارك
    حقكم مع مبارك
    حقكم مع مبارك
    مش معانا، احنا في ميدان التحرير، مال قفل البنوك ووقف المرتبات وحظر التجوال وتسليط البلطجية بينا؟
    اللي قدر ينزل بينزل، اللي مش قادر ينزل ومتعاطف بيبعت للمعتصمين اكل وادوية، اللي مش مركز متضايق من قطع عيشه

    كويس، متضايق من قطع عيشه يعمل الاتي
    اذا كان موظف او عامل ومرتبه اتقطع يرفع قضية على جهة العمل
    اذا كان من اللي بيسترزقوا يوم بيومه وحظر التجول خارب بيته يكتب يافطة: انا ما نزلتش الاعتصام، خربتوا بيتي ليه يا حكومة؟
    ويعقلها على المحل بتاعه او على التاكسي بتاعه او الميكروباص او حتى التوك توك
    اللي متضرر من البلطجية، يرفع قضية على وزارة الداخلية

    هي دي الجهات المسئولة، ده في حال انك مش عايز مبارك يمشي، ولو اني مش عارفة اي صنف من البني ادمين انت اللي مش عايز مبارك يمشي، بس احنا بنطالب بالديمقراطية والحرية ومش حنفرض عليكم الانضمام الى الاعتصام المطالب برحيل مبارك
    بس على الاقل طالبوا بحقوقكم من نظام مبارك
    مش عايزين تطالبوا بحقوقكم من مبارك ما تحملوش ناس مالهاش ذنب المسئولية ربنا مدينا مخ عشان نفهم بيه
    وائل خليل قال لي احايليهم، بس انا بصراحة نفسي مش جايباني احايل ناس بتفكر زي اللي بيلوموا الفلسطينيين على انهم بيتعاقبوا ومش بيلوموا على اسرائيل نفسها اللي بتقوم بالجرايم

    بدل ما تقعد تفكر في فرد واحد اللي هو نفسك وتتجاهل ارادة ملايين، خد حقك بالقانون من اللي قاطع عيشك بذنب انت ما عملتوش اذا كنتوا بتعتبروا ان الاعتصام للمطالبة بمطلب انتوا نفسكم ياما رددتوه هو ذنب
    وبدل الشحاتة على قناة النيل للاخبار: مش عارف انزل الشغل، انا مش عارف اقبض مرتبي
    اتصلوا برضه بقناة النيل للاخبار واسألوهم: طب دلوقت احنا مش معتصمين، والمعتصمين مش بيتحركوا من اماكنهم، وانا شغلي مثلا في مدينة نصر، مالي انا دلوقت؟
    مبارك مقعدني في بيتي ليه وجهة العمل بتاعتي قاطعة مرتبي ليه؟
    لو هم قلة فعلا زي ما التلفزيون بيقول يبقى خاربين بيت البلد كلها ليه؟
    ماهم قاعدين في مكانهم، لو هم السبب في وقف حال البلد يبقى هم عددهم اكيد اكتر من عدد اللي قاعدين في البيت، خلاص، يبقى هم الاغلبية، اسمعوهم ونفذوا طلباتهم خلينا نخلص، او اعملوا اللي انتوا عايزينه معاهم تصطفلوا انتوا الاتنين، احنا مالناش فيه، سيبونا نروح الشغل ونقبض مرتباتنا وناكل عيش

    اظن كده عدل كافي

    انما الراجل ياخدكم رهينة ودرع بشري وتطلعوا تشحتوا على التلفزيون المصري وكمان تهتفوا بحياة اللي خاطفكم؟

    اه اه.. قبل ما حد يقول لي: انت بتستهبلي يا بت؟ ما انت عارفة انهم متأجرين
    يا سيدي خليني اقول انهم مش متأجرين، خلينا نحسن النية
    انا مش بارد على الشخص نفسه، انا بارد على المنطق

    -------------
    لجنة الحكماء
    او مجلس الافتاء
    او عنبر العقلاء
    اللي يتكلم يتكلم عن نفسه، انتوا شايفينا كتع ولا لسانا قصير ولا صوتنا واطي؟ عمالين نجعر بقالنا 12 يوم لما العالم كله سمع صوتنا ومطلبنا الرئيسي وكلامنا:
    لا تفاوض الا بعد الجلاء
    الاستقلال التام او الموت الزؤام
    لا بديل عن الرحيل
    ارحل يعني امشي يمكن ما بيفهمشي
    get out
    sortez
    نقولها بانهي لغة عشان تتفهم؟ نعلي صوتنا اكتر من كده ايه؟ عايزين عدد اكتر من الملايين اللي خرجت يوم الثلاثاء وامبارح ايه؟
    واحنا ناس ديمقراطيين، ومؤمنين بالحرية، تقدروا تعبروا عن نفسكم، بس عن نفسكم بس
    ومش بنحب عمر سليمان ومش عايزينه للاسباب التالية:

    1- جزء من النظام، وجزء اساسي وهو اللي بيحمي النظام كمان بوصفه رئيس المخابرات لمدة خمستاشر سنة، وكانت مهمته بالاساس حماية النظام، مش حماية البلد


    2- اهانا واتهمنا بالعمالة وادعى ان كلنا اخوان مسلمين وعملاء لجهات خارجية ولو كل الملايين دي اخوان يبقى ازاي الاخوان محظورة؟ ولو كل الملايين دول عملاء يبقى انت كنت بتعمل ايه خمستاشر سنة رئيس مخابرات؟ هو اول واحد يتجازى لو كلنا عملاء، ومسلط ناس تقول علينا الكلام ده في الاعلام، وتفتري علينا، واي ادعاء ان تسليط البلطجية على المصريين كلهم تم بمعرفة جناح في الدولة دون معرفة اجنحة اخرى يبقى بيستهبل، اللي فيهم ما شاركش راضي باللي حصل لنا بدليل انه لسه في المنصب بتاعه ما استقالش


    3- عمر سليمان بالتحديد سفاح غزة، وبعد 11 يوم في الاعتصامات احب اقول للي ما راحش الاعتصام: انا ما كنتش اتصور ابدا ان جريمة النظام ضد غزة مأثرة في الناس قوي كده، الناس حاسة بجرح كبير في كبرياءها الوطني لان مبارك وصل مصر ان الناس تتظاهر ضدها زي ما بتتظاهر ضد اسرائيل ايام حرب غزة، طبعا جزء من الجرح الاحساس بتأنيب الضمير، والاحساس الوطني، والتعاطف مع القضية الفلسطينية، لكن الجزء الاكبر راجع لالاطة المصريين، حاسين انها كبيرة قوي ان مصر ام سبعتلاف سنة ومبنية على اكتاف الزراع والبنائين تتساوى باسرائيل اللي عندها ستين سنة ومبنية بالعصابات، وعمر سليمان هو المهندس الرئيسي للفضيحة دي

    (على فكرة، الاعتصام ده اثبت لي ان الالاطة واكلانا خالص هههههههه حتى افقر ناس عاملين زي الكحيت ابو منص، مهم قوي الاعتصام ده حتى من باب اننا نتقارب ونعرف بعض، احنا ما بنسألش بعض عن اسامي بعض وعمالين ناكل من بعض ونبات جنب بعض ونتكلم مع بعض ونتناقش ونقرب من بعض ونفتح قلوبنا لبعض، سبحان الله قلبي دليلي، طلع
    family reunion
    فعلا)
    4- احنا ما قدمناش شهداء ومصابين عشان في الاخر نشيل الضو ونحط شاهين
    5- الناس ثائرة على الاحتلال.. بجد، مش كلامي، ولا تفسيري لكلامهم، هم قالوا كده باللفظ، وقالوا احتلال امريكاني، ووعي الشارع المصري اكبر بكتير من وعي النخبة المصرية
    احنا مش بنشيل وكيل الاحتلال الامريكي عشان نجيب وكيل اخر، احنا مش عايزين احتلال امريكي، لانه فوق انه احتلال، طلع احتلال وحش كمان، اقصد خرب بيتنا، وبيعنا مصانعنا واراضينا وصيغتنا ورفد لنا الناس من اشغالهم وتسبب في البطالة وهزأنا ومرمط بكرامتنا البلاط وخلانا دلاديل والموضوع ده طلع مأثر في نفسية كل الناس وصعبان عليهم نفسهم قوي وحاسين انهم اتهزأوا بزيادة وان ما عاش ولا كان اللي يخلينا دلاديل وولاية امريكية، والناس مش بتحب امريكا فعلا، من معاميق قلبها، ومش عايزة تفجر امريكا ولا حاجة، ولا عايزة تدخل معاها في خناقة، ولا عايزين ينعزلوا عن العالم، بس عايزين: تغيير، حرية، عدالة اجتماعية
    وامريكا مش عايزانا نبقى ده كله



    اللي بيحصل دلوقت ان فيه مجموعات من المنتفعين من احتلال امريكا لمصر انهم بيحاولوا يضحوا بمبارك في مقابل استمرار الاحتلال الامريكي لمصر.. لا.. اكتر من 350 شهيد في 11 يوم عشان في الاخر نفضل تحت الاحتلال وتفضل مواردنا ملك للبنك الدولي وبيوتنا مخروبة ومكانتنا مهزوزة؟ طب ما كده احمد زي الحاج احمد


    وبصراحة انا مش عاجباني تصرفات البرادعي، انا مش مهسترة زي الناس اللي بتتهمه بالعمالة بدون دليل ومش باكرهه، بس كمان مش مبسوطة من تلقيه هو ورموز سياسية اخرى مكالمات من سكوبي، يعني هي اول ما تكلمهم وتسألهم عن رايهم ما يعرفوش يقولوا لها: بعد اذنك وانت مالك يعني؟ ثم يعني هو والسياسيين التانيين وسكوبي واوباما وكلينتون وساويرس وابراهيم المعلم وعمرو موسى وكل البشريات اللي نازلة فتي، هم مالهم اساسا؟ هم مالهم؟ هم عملوا حاجة في الثورة دي عشان كل واحد فيهم يقول رأيه؟ مالهمش رأي هم، لهم يسمعوا كلام الناس ويمشوا وراهم، انا شخصيا ما باكرهش حد فيهم، بس لازم ياخدوا موقف واضح زي موقف جورج اسحاق
    وبصراحة انا احيي جورج اسحاق لانه قال كده بالظبط، قال ماليش فيه، انا باقول اقتراحات، والله عجبت المعتصمين يبقى الحمد لله، ما عجبتهمش هم اصحاب القول الاول والاخير


    الشعب المصري خلاص حس بقيمة نفسه، وباهميته
    ماحدش حيكسر نفسه تاني
    ماحدش حيذله تاني
    ماحدش حيقوده تاني
    ماحدش حيهزأه تاني
    ماحدش حيهينه تاني
    ماحدش حيتأنصل عليهم تاني ويكلمهم بوصفهم جهلة ومتخلفين وهو بقى اللي بيفهم
    الشعب المصري بيفهم كويس ومخه يوزن بلد، واللي انت تتعلمه من قعدتك مع الشارع المصري اعمق واحسن وانقى وانصع من اللي ممكن تتعلمه لما تدوش دماغك برغي ناس بعضهم واخد جايزة مبارك من الاخر كده
    ومافيش حاجة كانت مغبرة على مخنا وعلى حياتنا غير مبارك وشرطته واعلامه المقرف ولما انفصلنا عنهم لقى نفسنا مش محتاجين حد غير نثق في نفسنا

    وكل اللي في الاعتصام مش رافضين يسمعوا اقتراحات ابدا، بيسمعوا على فكرة، وبيتابعوا، وبيوزنوا الكلام، وبيعملوا مجموعات يتناقشوا، وكل مجموعة بتبتلغ المجموعة اللي جنبها باللي وصلت له لحد ما ينتشر الكلام وسط مئات الالاف والناس بتوصل بعد كده لرأي موحد بعد مناقشات وبيبان في هتافها، وكل واحد حاسس بقيمته واهميته بما فيهم الاطفال اللي بايتين وبيقولوا رأيهم برضه، وربنا برضه معانا وبيكشف لنا المدسوسين والمثبطين والتخريبيين، وانا طول عمري ما كنتش فاهمة كلمة ابن القيم لما قال ما معناه يعني ان العلماء لما يحتاروا في قضية يبعتوا يسألوا اهل الثغور، واتعلمت من الاعتصام ان الشخص الفاعل زي ما هو بيتحرك بجسمه عقله كمان بيتحرك وعشان كده يصل بسهولة لقرار ان شاء الله متوفق، واللي عايز يعمل عنبر عقلاء، يتفضل يشرفنا تلات ايام اعتصام ورا بعض ويقعد مع الناس ويبات معاهم في الجونينة وانا اوعده انه لما يرجع حيكون ربنا فتح له مخه بشكل لا يصدقه عقل، على الاقل حيحس بالناس ويعرف هم عايزين ايه ويشوفهم بنفسه ازاي ناس طيبة ومحترمة ومهذبة وبتعزم عليه بالاكل غصب عنه ويشوف بنفسه المسيحيين وهم واقفين يحموا المسلمين وهم بيصلوا



    -----------
    الافندي اوباما... ممكن تخرس خالص؟ انت طالع تقول لنا: انا حاضيف انا حاضيف... رقاصة وبترقص
    ايه جمل الكتاب الاخضر اللي انت عمال ترددها دي وكل شوية طالع لوحدك وعامل مؤتمر صحفي تفسر الماء بعد الجهد بالماء: الحكم للشعب، سمعنا اصواتكم، الجيش المصري لن يطلق النار على المتظاهرين
    ده ايه المعلومات الخطيرة السرية والكلام المؤثر اللي بيهز كيان الكون ده كله؟ انت حمار يا حمار؟ الحكم للشعب ده بمزاجك؟ ده قرارنا احنا، وما كانش رأيكم طول التلاتين سنة اللي فاتوا.. ولا هاه؟ سمعتوا اصواتنا يعني كنتوا راقبتوا تليفوناتنا؟ ما احنا بقالنا اتناشر يوم بنرقع بالحياني، توك ما سمعت؟ هو انت راخر سمعك تقيل زي
    your ex
    مش ده النظام المصري الثابت والمستقر؟ وانت مين عشان تتكلم بالنيابة عن جيشنا المصري، ولا بتبلغنا معلومة سرية خطيرة فظيعة: مش حيضرب عليكوا نار.. تصدق فاجئتنا؟ ما كناش نتوقع ابدا المفاجأة دي... هو امتى الجيش المصري ضرب نار على مصري قبل كده؟ ومين اللي فهمك اننا خايفين من الجيش المصري؟ ولو خايفين ما احنا قاعدين معاه ما نقدر نسأله
    . حد من مستشاريه يقول له يسكت عشان هزأ روحه
    ولا اقول لك.. خليك اتكلم، اصلك كل ما بتهزأ نفسك بتهزأ معاك الوكيل بتاعك اللي خدمكوا تلاتين سنة ولسعتوه على قفاه
    هع هع هااااااااع

    ناس كتير مش في ثقافتها خالص مفهوم ان مافيش حد ممكن يكون حجة عليا الا اذا انا كنت مأيده على طول الخط و متبعه , و انا لا مؤيد حد على طول الخط ولا متبع حد

    [sor2]http://imageshack.us/a/img838/2058/8l0n.jpg[/sor2]


  2. #2

    الصورة الرمزية تامر.محمد

    رقم العضوية : 5118

    تاريخ التسجيل : 01Feb2008

    المشاركات : 11,185

    النوع : ذكر

    الاقامة : Cairo

    السيارة: Megane II 2010

    السيارة[2]: كانت دايو لانوس1 99 - وزة :)

    دراجة بخارية: none

    الحالة : تامر.محمد غير متواجد حالياً

    افتراضي -

    hasad">

    الموضوع طويل اوي ولا ايه ؟
    :)

    ناس كتير مش في ثقافتها خالص مفهوم ان مافيش حد ممكن يكون حجة عليا الا اذا انا كنت مأيده على طول الخط و متبعه , و انا لا مؤيد حد على طول الخط ولا متبع حد

    [sor2]http://imageshack.us/a/img838/2058/8l0n.jpg[/sor2]



 

المواضيع المتشابهه

  1. فيديو لنوارة نجم ........ياريت نسمع ارئاكم
    بواسطة dr_magdi2009 في المنتدى المنتــــــدى الاجتمــاعى
    مشاركات: 4
    آخر مشاركة: 21-05-2011, 08:58 PM
  2. الرجل الذي يتهته (تدوينة لمصطفى حلمي)
    بواسطة د.أبونضال في المنتدى المنتــــــدى الاجتمــاعى
    مشاركات: 9
    آخر مشاركة: 12-03-2011, 03:24 AM
  3. عارف اني مقصر في حقكم !!
    بواسطة فادى محمد في المنتدى أوبـــــل
    مشاركات: 73
    آخر مشاركة: 24-06-2010, 12:34 AM
  4. لاصحاب تويوتا mmt المتضررين فقط التجمع الجمعة 26-2-2010
    بواسطة wrefay في المنتدى تـويوتـــا
    مشاركات: 12
    آخر مشاركة: 02-03-2010, 10:11 PM

الكلمات الدلالية لهذا الموضوع

المفضلات

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  

Content Relevant URLs by vBSEO 3.6.0 PL2