الموضوع: رأي أخر

المشاركة الأصلية كتبت بواسطة أبو عبدالله

المشكلة الحقيقية فعلا هى
تعيين حكومة انقاذ وطنى من المختصين والكفاءات لإدارة شؤون البلاد لفترة انتقالية لمدة 6 شهور

مين هما الناس المختصين والكفاءات
مهما دول لو اتعرفوا كانت كل بقية المشاكل دى اتحلت

الحاجة التانية المقلقة برضه
نفس النقطة وهى الاشراف القضائى

دلوقتى مبارك قال ان على المجلس تنفيذ احكام القضاء الادارى بالنسبة للطعون المقدمة ضد اعضاء مجلس الشعب
وبالتالى نقطة ان المجلس سيد قراره انتهت خلاص ومعادش ليها وجود
بس المشكلة فى انه لو كل الطعون اثبتت ان المجلس باطل ويجب اجراء الانتخابات منين نضمن انها بدون تزوير

الحاجة الثالثة والاخيرة
احنا كنا بنقول زمان انهم لو منفذوش الكلام دا الطريق معروف وكله بقى عارف ميدان التحرير

هل حنقدر نعمل مظاهرات تانى
هل الناس حتتجمع تانى بنفس الاعداد اللى اتجمعت فى الاول
هل الحكومة حتسمح بذلك
وحال الدنيا يقف تانى
ونخش فى اشتباكات مع الامن المركزى تانى
والجيش ينزل تانى
ونرجع نقول للناس المتظاهرة ارجعوا دا حال البلد وقف

الحال دلوقتى فعلا لا يسر اى احد
وطول المظاهرات موقفة حال البلد

بس لو فكرنا برضه حنلاقى ان مش كل شوية لما البنوك والبورصة والاعمال تتقفل كل فترة والتانية دى حتبقى حاجة كويسة برضه

فى حلقة منى الشاذلى النهارده كانوا جايبين فقهاء القانون وكان يحيى الجمل قال انه متخوف من عدم تعديل المادة 88 قبل اجراء انتخابات جديدة
وعلشان كده خطاب مبارك كان ناقصه حاجات كتيرة اوى لو واحد خايف على البلد اوى بجد

الواحد محتار المظاهرات طولت دلوقتى وبقى طولها مأثر على حال البلد
والناس اللى بتقول نمشى دلوقتى ولو منفذوش نتظاهر تانى برضه حيأثر على حال البلد

والناس اللى بتقول برضه ان مجلس الشعب غلط انه بنحل دلوقتى عشان يناقش التعديلات الدستورية
ازاى الناس اللى حيعدلوا الدستور هما هما الناس انتخبوا بالتزوير

يعنى احنا خفنا من احزاب المعارضة اللى لسه معملوش حاجة وممسكوش اى حاجة

وامنا بان الناس اللى حيحطوا دستور الدولة وهما جايين بالتزوير

اى منطق تفكير دا

الحاجات اللى المفروض تتعدل دى مش محطوط لها اى جدول زمنى
طب نعرف امتى ان النظام مش بيلعب بينا او بيماطلنا ولما يحس ان الناس ابتدت تتخنق يقولولنا ان الحاجات دى بتاخد وقت ولازم شوية صبر لغاية منلاقى نفسنا ماشيين محلك سر بدون اى تغيير وكنا الفترة دى كلها بيتم تخديرنا

صحيح بقى فيه ايجابيات كتيرة لاحظناها فعلا بعد المظاهرات دى وحاجات كنا بنعتبرها ولا فى الاحلام انها تتحقق حتى
حتى النهارده لما صفوت الشريف اتشال
الراجل دا اللى من ايام عبد الناصر حتى الان وهو ياكل على كل الموائد

بس المشكلة ان احنا عملنا زى الشخص المريض علشان يخف لازم حاجتين مهمين يتعملوا
نديله ادوية عشان يخف من مرضه وابعده عن البيئة اللى ساعدته انه يصاب بمثل هذا المرض

احنا عملنا الحاجة الاولانية
لكن التانية معملنهاش
لسه الوضع قائم وقادر على افراز ناس امثال احمد عز وحبيب العادلى وغيرهم بس بمسميات جديدة وطرق نصب جديدة

ايه الحل
مش عارف
بس هل الناس المتظاهرين دلوقتى لو حولوا خطابهم بدل ميبقى اسقاط النظام الى اعطاء النظام المزيد من الضمانات وتعديل المادة 88 ممكن الحال يكون افضل شوية
حاليا دلوقتى معدتش تفرق ان كان مبارك يمشى دلوقتى ولا يمشى بعدين على اد مايهم ان مجلس الشعب حيتعمل فيه ايه عشان يكون دستورى وحقيقى وبيمثل الشعب بدون ادنى تزوير فيه

هل من مساعد ويفتكسلنا اى حل