الموضوع: تقرير كامل و تجربة قيادة الاسطورة w116 450sel 6.9

السلام عليكم
انا عايز اعرض عربية مافيش زيها عشان انا متاكد و مصدوم انا معظم المهتمين بالعربيات و حتي كتير اصحاب المرسيدس ميعرفوش عنها اي شي
و طبعا لعشقي الرهيب للنجمة الفضية و للعربيات الكلاسيك عموما و خصوصا اني كنت بسمع قصائد شكر و ثناء ووصف في العربية و كنت حموت و اركبها
هيا المرسيدس W116 450SLE 6.9 الS-Class في السبيعنات و هي مترفة المرسيدس و اسطورة السبيعنات من اعظم ما اتنجت الشركة العريقة علي الاطلاق الاول نتعرف يالعربية
الموديل :450SEL 6.9 شاسيه w116 و سبب التسمية 6.9 لتميزها عن ال450se
الصنع من 1975 ل1980
المحرك :6900 سي سي 8 سلندر 286 حصان/4533 rpm السرعة القصوي 235 كم/ساعة
الفتيس اوتوماتك بtorque Converter
الطول :5 متر
العرض:متر و 870 سنتي
الوزن : 1935 كليو يعني 2 طن
و دا شكلها

و من ورا

نيجي بقي للموتور
كان اضخم محرك انتجته الشركة و ظل محتفظ بالرقم لحد انتاج الموتور ال7300 في الR129 SL
طبعا من موتور 6900 سي سي 286 حصان قليل حتي لو في السبيعنات لان العربيات الامريكية زي الكامارو مثلا كانت بتنتج مواتير 5700 سي سي و 280 حصان
لكن المحرك دي قادر علي انه ينقل السيدة الثقيلة من 0-100 في 7.4 ثانية فقط و دا في السبيعنات كان حاجة حتي انه يطلق علي العربية دي في المانيا die Königin der Autobahn ومعناها ملكة الAutobahn (و دا اكبر طريق في المانيا و بيوصل بين المانيا و سويسرا و النمسا و بيتميز بنضاااااااااااااافة رهيبة و اسلفت و نضيف اوووي و تقدر تحقق عليه سرعات وهمية )
و سبب اطلاق اللقب دا ان في السبيعنات دي كانت اسرع عربية بتمشي علي الطريق حتي البورش في الوقت دي كانت بتجد صعوية في مجراتها
غير ان دا اداء يجي احترامه من عربية وزنها 2 طن و لازلت اسرع من عربيات كتير دلوقتي
و الموتور دا فيه ميزة فريدة و هو انه dry-sump lubrication system و دا غالبا بيبقي في عربيات السباق بس
و عبارة عن كراتيراه الزيت بتيقي خارجة و متصله بانابيب بالموتور و يتفرق في ان الجاذبية مابتاثرش علي ضعط الزيت (و مش فاهم اكتر من كده مع اني حاولت افهم بس شكل الموضوع كبير و لازم اشوفه بعيني )
و كمان مرسيدس نتقول انها صممت المحرك و راعت الجودة و قدرة التحمل و طول العمر الافتراضي علي حساب القوة و زودتها بفتيس اوتوماتك مميز 3 غيار لتلك الغاية
و ان العربية صنعت للتتحمل السفر علي سرعة 160 كم/س مدة اربيعين عام بدون الحاجة لتغيير المحرك
و بتتميز العربية بعفشة hydro-pneumatic و دا نظان رااااااااااااائع و مريح جدا جدا و يتيح لك التحكم في ارتفاع العربية عن الارض بزرار في التابلوه عشان لو ماشي بالعربية في طريق مكسر ترفع العربية و يحس الركاب بالراحة و لو حتسوق علي سرعة عالية و طريق ممهدة توطي العربية و تزيد الراحة و يقل الاحساس بالطريق
و كمان بعد سرعة 100 العربية بتوطي علي الارض اوتوماتك
و لان القوة دي عايزة فرامل محترمة دي اول عربية في العالم اخترعوا فيها ABS علي الاربع عجلات
نيجي للكماليات
سنتر لوك (كامل حتي الشنطة و التنك و ستر للاطفال ) و ازاز كهربا و فتحة سقف كهربا و كراسي كهربا و مرايا يمين كهربا و دفاية مرايات و مساحات فوانيس و مثبت سرعة و Climate Control و فرامل ABS (من بعد 78 طبعا الحاجات المعتادة زي الباور و احزمة امان و كراسي جلد طبيعي و فوجائي بنزين
اما الصالون فطبعا فخم جدا كعادة الفئة S و واسع جدا و مريح و كان اوسع حتي من الكلاديلاك و اللكولن و الرولز رويس في الوقت دا و خامات عالية جدا و كان متاح جلد طبيعي او شامواه عال حسب الطلب
و دا شكل الصالون الفخم



الدقة و الجودة حتي في ادق التفاصيل : العربية دا فيها كماليات غربية مثلا لو سيبت النور و فتحت الباب او طلعت المفتاح من الكونتاتك تصفر عشان تنبهك انك نسيت النور( دا كانت اول مرة بتعمل في مرسيدس )
لما تدور العربية دواسة البنزين بتنزل في الارض(بحيث انك ماينفعش تدوس عليها ) لحد ما العربية تسخن و بعد كده تطلع الدواسة اوتوماتك
فوانيس المساحات لها سرعات(بالطلب فقط)

و كان فيها منها AMG بقدرة 380 حصان و سرعة قصةي 300 كم/سو شوية تعديلات بسيطة في الشكل و الكماليات

العيوب: استهلاك البنزين من 25 ل30 لتر /100 كم( مش حتفرق مع صاحبها اكيييييييييييييييد )
صيانة العربية صعبة و مكلفة جدا و بالذات الموتور و العفشة و قطع غيارها نادرة و غالية
اما تجربة القيادة
انا سوقت العربية دا في الغردقة من حوالي سنة كانت جمرك قادمة من قطر صاحبها مش لبناني او سوري علي مااتذكر و انا معايا w116 350SE و انكلمت مع الراجل كان ودود و متفاهم و عارف كوبس جدا قيمة العربية اللي معاه و كان ليا الشرف اني سوقتها و مع اني معايا W116 لان دي مختلفة خااااااااااالص انعم و اريح و اداء رياضي فعلا و مختلف الي حد كبير عن عربيتي سواء كان الموتور و التسارع و خصوصا بعدال 100 او الفرامل و نظام التعليق كله مختلف و بعد ال100 تحس ان العربية بتنزل علي الارض و متحس نهائي بالمطبات و الحفر و لا بالسرعة و بمجرد انك تهدي تحس ان العربية بتعلي تاني
انا جربت كل الS-Class من اول الW108 280SE لحد الW221 ال S500 وكان عندنا 500SEL W126
رائي النهائي عن العربية
اللي اقال عنها من اعظم ما انتجت المرسيدس محظئا تماما........ انها الاعظم علي الاطلاق
[youtube]http://www.youtube.com/watch?v=JPOVmvR4Vw8[/youtube]
و دا فيديو للعربية لحد ماجابت 250 و طبعا لازم تحط في الاعتبار ان دي عربية من السبيعنات و بعد اكتر من 30 سنة لسه بتجيب من 0-100 في حوالي 8 ثواني و تجيب 250 تبقي عربية فعلا تحفة

و اسف علي الاطالة

شكرا على التقرير

فعلا عربية جميلة جدا
مع اني مبحبش الكلاسيك بس دي حاجة تانية