احنا بجد داخلين على كارثه
احنا بجد داخلين على كارثه ومش عايز حد يقولى الفزاعه والكلام ده.انا النهارده الصبح عدى عليا صاحبى كنا رايحين لمنطقة ابو الهول لآننا مرشديين سياحيين والنهارده كل المرشدين اتفقو انهم يقفو امام ابوالهول والاهرامات:plusone2: لآرسال رسالة للعالم بأننا بلد امان ومستعدين لآستقبالهم فى اى وقت ...وكل هذا من اجل الدفع بعجلة السياحة للعمل من جديد مطولش عليكم بعد هذا المظهر الحضارى الرائع والاحساس لآول مرة بحب البلد بهذا الشكل اخذنا طريق العودة وكنا 3 فى العربية وكلنا ساكنين فى الهرم برضة المهم ماشيين فى شارع الهرم وعند المريوطية تردد صاحبى فى الدخول لليمين او الاستمرار فى السير فى شارع الهرم حيث ان كل الطرق مؤدية للهدف التردد كان للحظات مش اكتر المهم ان جه من جهه اليمين واحد من الميكروباصات الفولكس المشهورة بسيرها فى شارع الهرم واذا بالسائق يعلو صوته قائلا دوختونا معاكو متخلصو....رد فعل صديقى الاخر مش الى بيسوق مجرد تشويحه مصرية تعنى متصبر لايعاقب عليها القانون قوم السائق يعمل اية يقوم داخل بعربيته فى الاكصدام الخلفى لسيارة صديقى والى هيه يا عينى دايو ليجانزا يعنى اكصدام فولاذ فى مواجهة اكصدام من الورق المقوى ومع ذلك تأثيرها لم يكن اكثر من خدش ازال الطلاء والمعجون فى منطقة صغيرة فى الاكصدام بس بصراحة صاحبى صاحب السيارة مقدرش يتحكم فى نفسه لآن السواق كان متعمد يخبطه لانه عارف ان الميكروباص مش هيحصله حاجة المهم صاحبى نزل وضرب السواق:10_9_133::10_9_133: والسواق نزل علشان يضرب صاحبي وبقت خناقة والشارع وقف المهم انا لاقيت ان اصحابى متعاملين فى الخناقة والسواق طلع مفتاح زى بتاع الانابيب وعايز يعور صاحبى واثناء الاحداث لاقيت امين شرطة فى الجهة الاخرى من الشارع قاعد على كرسى جنب موتسيكل قمت معدى اعتقاد منى انه الشخص الى ممكن يوقف الى بيحصل قبل موصل للامين شفته بيبصلى فطلبت منه انه يعدى يوقف كل الكلام ده.....عارفين كان رد فعله ايه !!!دور وشه الناحية التانية وكأنه مش شايفنى:angry06: عمل فيها رفاعة الطهطاوى فجأه انا كنت عايز اروح اضربه انا حسيت انى مستفز لدرجة فظيعة لكن الحمد الله كبرت دماغى ورجعت لصحابى الناس ادخلت وطلبت مننا اننا نمشى وفعلا ركبنا العربية وقبل ما صاحبى يتحرك كان مفتاح الانابيب الى فى ايديه لابس فى الزجاج الخلفى مكسره:70[1]: اوعى وشك صاحبى نزل طلع مفتاح العجل و:gun_bandana:كسر الزجاج الامامى للميكروباص و الناس قعدت تتحايل علي صاحبى علشان يمشى وحصل بس بعد ايه بعد الزجاج متكسر...الكارثه يا جماعة ان مفيش تواجد حقيقى للشرطة وفى بلطجة جامدة اوى فى الشارع والتكاتك ماشية فى شارع الهرم عادى وكانها تبع التاكسى الجديد حتى واحد صاحبى كان بيهزر وبيقول لسائق توك توك جيزة قام واقفله علشان يوصلة فعلا من الهرم للجيزة...انتو متخيلين تبقى ماشى بعربيتك فى امان الله مع اسرتك وتلاقى توك توك كاسر عليك او خابطك وطالع يجرى ولا يجرى لية ده ممكن يقف وياخد منك تعويض وانت كمواطن مسالم مش هتلاقى حد ينجدك احنا داخلين على فوضى بالعبيط ربنا يسترها عليكى يا مصر وربنا يسترها على المصريين الشرفاء
