الموضوع: هي ايه حكاية تيييييييييييت تيييييييييت دي في المنتدى؟

المشاركة الأصلية كتبت بواسطة onna

انا معاكى يا علا فى موضوع الالفاظ بس انا عن نفسي شايفة ان كل الاعضاء هنا فى قمة

الاحترام سواء دلوقتى او من قبل وجودى هنا ..يمكن قليل اوى لما حد يتجاوز فى

الكلام او حاجة و بيبقي مش قصده لكن بالنسبة لكلمة تيييت نفسها او حتى

الرموز &%^&&^^% انا نفسي بعملها و مش بيبقي حتى قصدى لفظ وحش

او حاجة انا عن نفسي باخدها بمعني زعيييييق و خلاص مش لازم زعيق بالالفاظ بذيئة و

فى الاول و الاخر كل واحد ليه حرية التعبير بشرط انه ميئذنيش

الله ينور عليكي يا نهى

والله انا شايف إن الموضوع ده مش للدرجه اللي تخلي الناس تضايق من بعضيها

وذي ما إنت ما قولتي الناس هنا في غاية الإحترام والمشرفين مستحيل يسيبوا حاجه ذي كده تحصل هنا في المنتدى

أرجوا إنك ياعلا ما تخديش الموضوع ده علا محمل شخصي لأن ده حرية رأي وحرية تعبير مدام هيه ماخرجتشي عن نطاق المسموح

المشاركة الأصلية كتبت بواسطة hazem_khidr

بصراحه انا مش شايف فيها حاجه رغم اني ما بستعملهاش و قليل لما بشتم حد.
بس برضه مش شايفها موضوع يتفتح و يتناقش .
انت يا علا بتقولي انك بتضايقي اوك معاكي
بس الكلام دا لو قريتي شتيمه انما انت قريتي كلمه زي تيييت دي يا تري عرفتي اللي قايلها قصده ايه؟؟؟
و بعدين يعني احنا خلاص كمصريين بقينا كاملين المعاني من كله علشان نفكر بقي في تيت و في الحاجات دي.
يا ستي اللي كاتبهها و قصده شتيمه ابقي انصحيه و الله اخد بالنصيحه و احترم وجودك اوك ما اخدش بالنصيحه محدش يقدر يلومه و حسابه عند ربنا لو قصده يشتم انما ان المنتدي يعمل قاعده يمنع فيها كلمه تيييت متهيالي صعبه اوي الحكايه دي

برده عليك نور يا حازم

ما هو ده اللي ناس بتحاول تقوله من البدايه

وزي ما قلت الموضوع مش مستاهل علشان الناس تزعل من بعضها وكمان علشان الناس تقعد ترغي فيه يجي 10 صفحات ويدخل عليه حوالي 5000 مشاهد :) علشان يشوفوا الناس بتتحاور في آيه وكل مشاهد يدخل ويقول ( يعني الناس سابت كل حاجه في الدنيا وجت على تيت تبت وبدأت تبني الهرم)

انا مش عايز ققلب الموضوع هزار إحتراما لعلا وإحتراما للناس هنا بس بجد الموضوع مش مستاهل

المشاركة الأصلية كتبت بواسطة aif

انا اتفق مع رأي علا
اذا كنا ساعات بنفقد اعصابنا في الحياة ... احنا هنا امامنا فرصة اننا نراجع كلامنا قبل ما نبعته .. وبعدين المنتدي ده فيه ناس انا باعتبرهم نخبه من المجتمع .. لو ما سيطرناش علي عصبيتنا هنا .. امال في الحياة الفعلية ح نعمل اية ؟؟

انا باقترح علي الاعضاء الكرام اننا نعمل معاينة للمشاركة ونقرأها قبل ما نرسلها
اولا : ح نلاقي كلام ممكن اننا نعيد صياغته بشكل افضل
ثانيا :ح نلاقي غلطات املاءية كتير اوي وبعضها ممكن يغير المعني تماما
ثالثا :ح نلاقي كلام ممكن يزعل غيرنا مننا وممكن ببساطة نغيره او نلغيه

صدقوني ... انا عملت كده كتير اوي ... وساعات كتير كنت بألغي المشاركة كلها ..ساعات بالاقي ان اسلوبي مش ظريف .. وساعات بالاقي ان المشاركة مالهاش معني ومافيهاش اي اضافة للموضوع ... وساعات بالاقي نفسي باهزر في موقف لا يحتمل الهزار ... وساعات بالاقي ان كلامي ممكن يجرح زملائي
انا في اكتر من 90 % من مراجعاتي باستبدل كلام كنت كاتبه...... ِأو بالغي المشاركة كلها

هو صح إن كل واحد يراجع الكلام اللي كتبه قبل ما يبعته بس ده ما يمنعشي إن أي شخص حر في التعبير عن ما بداخله مع الألتزام بأداب الحوار وكمان الموضوع ده هايخلي الناس بدل ماتكتب الحاجه في ربع ساعه تكتبها في نص وهكذا

وزي ماقلت قبل كده المشرفين هنا مستحيل يسيبوا حاجه ذي كده تحصل وعلشان كده المنتدى ده محافظ على هيكله العام ومحافظ على محتواه