من ضمن السلبيات اللى فاتت فينا قبل الثورة هى الاقوال و الامثال المعتادة
محتاجين نبطلهااااااااااا ضرورى اقوى مشكلة لينا كانت السلبية
سواء فى الاقوال او الافعال او او او
و اضعف الايمان اننا نبدا بسلبية الاقوال و نبطلها

و من ضمنها
الامثال اللى لازم تتحول من :-
اذا كان ليك عند الكلب حاجة قوله يا سيدى
الى
اذا كان ليك عند الكلب حاجة قوله هات حاجتى يا كلب و طلع عين اهله
من
امشى جمب الحيط يحتار عدوك فيك
الى
امشى جمب الحيط و امشى برة الحيط وامشى على الحيط نفسها ولا يهمك حد
من
اصبر على جارك السو لا يرحل لا تجيله مصيبة تاخده
الى
لو جارك سو هزق اللى جايبينه و لم الناس عليه و اطرده من جمبك لو مش عايز يتعدل
من
من خاف سلم
الى
من خاف ندم ( متخافش من حاجة غير ربنا و حكمه فى اى تصرف منك و انت هتعرف تعمل ايه )
من
ان جالك الميرى اتممرغ فى ترابة
الى
ان جالك الميرى قوله عايز ايه يا حضرت ؟ ايه اللى جايبك هنا ؟ معاك اذن ؟ و اشياء من هذا القبيل
من
عتاب الندل اجتنابه
الى
عتاب الندل تهزيقه وسط الناس
من
العيلة اللي مافيهاش صايع ، حقها ضايع
الى
لا نسيب ده زى ما هوا اليومين دول :) عشان ده منطبق علينا حاليا :)
من
سبحان العاطي الوهاب.. بعد الشبشب و القبقاب
الى
سبحان العاطى الوهاب الراجل تعب كتير و ربنا كرمه و بطلوا حقد :)
من
اليد اللي ما تقدرش تدوسها ......بوسها
الى
الايد اللى متقدرس تدوسها اقطعها
من
على قد لحافك مد رجليك
الى
لو رجليك اطول من لحافك دورلك على لحاف تانى

و و و و و
لازم نبطل السلبياااااااات دى بقى
انتوا مش متخيلين بجد دى حاجة تزود التخاذل و التكاسل و الاحباط و و و

لازم نساعد فى الغاء الهبل ده
ده بالنسبة للاقوال
و فى سلبيات فى تصرفاتنا
لازم تتغير زى

ارتباط كلمة بيه و باشا مع الميرى
بقى العادى انك تشوف اى ظابط او امين شرطة جعر تقوله يا باشا سواء كان كويس او لا و ده بيديله فخامة لا يستحقها قوله زى ما بيقولك
لو اتكلم معاك و قالك انتا و شوف و بتاع اتكلم معاه كدة برضه لو قالك حضرتك اتفضل كدة قوله نفس الكلام

زى ان يجيلك حد من تحت الارض عشان تركن جمب رصيف فى شارع عمومى يقولك 5 جنيه الساعة الطخه على افاه علطول و اديله جنيه او اتنين او متدلوش براحتك

زى اما تشوف مكروباص فى نص الشارع و تلاقى امين شرطة واقف على بعد منه تقوم ممصمص شفتك و قايل للى جنبك شوف اكيد السواق مأكله عشان يقف ساكت كدة و يسيبه !! عالم وحشة كخة صحيح

لا انزل هزقه و افضحه فى وسط الشارع عادى جدا

لازم تدور على النت على جهات الشكاوى
لو حصلك مشكلة مع النت تكلم مين و تشتكى مين
لو حصلك مشكلة مع خط موبايلك مين الجهة اللى تنفعك
مشكلة مع قسم او مرور
مشكلة مع توكيل عربيتك او مكان اشتريت منه بضاعة معينة او اجهزة مثلا
لازم تعرف تعمل ايه قبل ما تقع فالمشكلة

اللى عنده اقتراحات تانى لتصرفات او اقوال او اى حاجة ممكن نبطلها يا ريت يقترح :)