طلب استشارة فنية

**OO7** · 21-02-2011 01:57 PM

أنا الآن بصدد تركيب لمبات فى عواكس الأبواب الأمامية للنيو إلنترا وتم بالفعل توفيق دواية بعد تعديلها ونجت فى إنى أركبها فى مكان عاكس الباب ..

وطبعا الغرض من تركيب هذه اللمبات إن عاكس الباب ينور مع لمبة الصالون لما أفتح الباب .. والفكرة دى موجودة فى سيارات كثيرة حديثة وقديمة لكن مش عارف مش موجودة فى الإلنترا ليه على الرغم من إن مكانها موجود فى الباب وتكلفتها بيسطة جدا ...
والسؤال هو عن كيفية تشغيل هذه اللمبة مع نور الصالون أعتقد بكده إنى المفروض هحتاج التوصيل مع السلك المسئول عن إضاءة لمبة الصالون + حساس النور بتاع فتح الباب ... أرجو من الخبراء فى كهرباء السيارات الشرح بالتفصيل الممل عن أسهل الطرق للكشف عن سلك لمبة الصالون وكيفية توصيلها مع لمبة عاكس الباب (ضرورى جدا علشان أنا مش هقفل فرش الأبواب قبل ما أخلص خالص)

بعض الصور توضح كيفية تركيب دواية بلمبة مكان عاكس الباب (الصور غير مرتبة) ...

Uploaded with ImageShack.us

Uploaded with ImageShack.us

Uploaded with ImageShack.us

Uploaded with ImageShack.us

Uploaded with ImageShack.us

Uploaded with ImageShack.us

Uploaded with ImageShack.us

Uploaded with ImageShack.us

Uploaded with ImageShack.us

Uploaded with ImageShack.us

Uploaded with ImageShack.us

Uploaded with ImageShack.us

**A.Saad** · 21-02-2011 10:01 PM

انت توصل مع الدايرة اللى بتنور مع فتح الباب
مش فيه عندك مفتاح فى القايم عامل زى مفتاح التلاجة
شوف لو فيه سلوك يبقى توصل عليها

**ahmed_safwat** · 22-02-2011 09:45 PM

بص يا برنس

انت مش محتاج ان لمض العواكس دي تنور مع ال آنلوك انما المهم منها انها لما تفتح الباب تنور يبقى تعمل اللي هقوكل عليه دا

هتوصل الطرف الموجب بأي سلك كهربا من بعد علبة الفيوزات (طبعا الفيوز هيبقى حمايه )) وكمان لازم يكون الطرف دا مش مع الكونتاكت

والطرف التاني (اللي هو الأرضي يعني ) هتوصله من زرار الباب (اللي في القايم )
وبكده تبقى بوب

**OO7** · 23-02-2011 12:51 PM

المشاركة الأصلية كتبت بواسطة ahmed_safwat

بص يا برنس

انت مش محتاج ان لمض العواكس دي تنور مع ال آنلوك انما المهم منها انها لما تفتح الباب تنور يبقى تعمل اللي هقوكل عليه دا

هتوصل الطرف الموجب بأي سلك كهربا من بعد علبة الفيوزات (طبعا الفيوز هيبقى حمايه )) وكمان لازم يكون الطرف دا مش مع الكونتاكت

والطرف التاني (اللي هو الأرضي يعني ) هتوصله من زرار الباب (اللي في القايم )
وبكده تبقى بوب

شكرا يا باشا ...

كلامك منطقى ومقنع .. هجرب الكلام ده يوم الجمعة بالنهار علشان يكون أجازة .. وإذا نجحت التجربة هنشرها بالصور فورا علشان يستفيد الجميع وطبعا مش هنسى فضلك فى مساعدتى ..

**eldell** · 23-02-2011 01:32 PM

متااابع باهتمام

**fawzyyyy** · 24-02-2011 07:27 PM

المشاركة الأصلية كتبت بواسطة ahmed_safwat

بص يا برنس

انت مش محتاج ان لمض العواكس دي تنور مع ال آنلوك انما المهم منها انها لما تفتح الباب تنور يبقى تعمل اللي هقوكل عليه دا

هتوصل الطرف الموجب بأي سلك كهربا من بعد علبة الفيوزات (طبعا الفيوز هيبقى حمايه )) وكمان لازم يكون الطرف دا مش مع الكونتاكت

والطرف التاني (اللي هو الأرضي يعني ) هتوصله من زرار الباب (اللي في القايم )
وبكده تبقى بوب

بس كدة حتفضل منورة علي طول و انت مشغل العربية

**Salamonti** · 24-02-2011 07:37 PM

لا كده مش هاتنور غير لو الباب اتفتح
والطريقة اللي مكتوبة دي هي الطريقة التمام ومفيش حاجة أصح من كده

**MuhamedNabil** · 25-02-2011 10:23 AM

اعتقد ان اى سويتش بيفصل الكهرباء(+) مش الارضى و بالطريقة المذكورة , دى حتبقى كالاتى الارضى المتوصل مع الزرار ده مش حيفصل مع قفل الباب و الكهرباء حتوصل فقط للمبة اول ميوصل كهرباء لعلبة الفيوزات و ده الحيخلى اللمبة تنور.
يعنى لو جربت و لقيت ان النور شغال مع الكنتاكت او منور على طول مثلا يبقى ده السبب الوضحتهولك ان الزرار مش بيفصل الارضى انما بيفصل الكهرباء.

و الله اعلم

**OO7** · 26-02-2011 12:20 AM

تم التوصيل بنجاج بفضل مساعدة للأخ أحمد صفوت ...

نزلت يوم الجمعة بدرى الساعة 8 صباحا علشان أشتغل فى هدوء لكن للأسف كان الجو سئ جدا وتراب .. وعلشان كده لم أتمكن من تصوير خطوات العمل .. بس على العموم أنا هحاول أشرح بقدر المستطاع ...

1- لفيت شريط لحام أسود على سلك اللمبة (علشان يبقى زى شغل الفابريكة)
2- مررت السلك من الباب عن طريق فتحات الضفيرة (بجانب الضفيرة مش معاها) حتى الجانب الشمال أسفل التابلوه عند علبة الفيوزات (لازم تفك الجنب البلاستيك الشمال اللى فيه دراع فتح الكابوت)
3- وجدت فردة كهربا مميزة جدا لأن لونها أحمر وغليظة (واضح إنه خط تغذية رئيسى) ومش شغال على الكونتاكت وصلت فيه فردة من فرد اللمبة وبعدين شريط لحام جيد
4- فكيت العتب بتاع الباب الشمال ومررت فيه الفردة التانية بتاعة اللمبة (الأرضى) حتى سويتش لمبة الصالون.
5- فكيت سويتش حساس نور الصالون ووصلت بيه الفردة التانية (الأرضى) بتاعة اللمبة وبكده كل لما تضغط على المفتاح اللمبة تطفى ولما تحرره اللمبة تنور مع الصالون
7- نفس الشئ فى الباب اليمين بس هتفك الجنب البلاستيك اليمين أسفل التابلون علشان تاخد كهربا وبرضه لاقيت فردة سلك كهربا حمراء غليظة وصلت فيها فردة من فرد اللمبة وبعدين مررت الفردة التانية (الأرضى) من تحت العتبة اليمين لغاية سويتش لمبة الصالون ووصلت فيه الأرضى
8- انتهت القصة وكله شغال زى الفل مع لمبة الصالون .. بس طبعا لو فتحت أى باب لمبات العواكس هتنور حتى لو الأبواب الأمامية مش مفتوحة تماما زى لمبة الصالون
9- أحب أضيف نصيحة لو حد قلبه جامد مع العربيات الزيرو وناوى يجرب .. ضرورى يكون معاك سلكة ناشفة بطول حوالى 50سم تستخدمها زى السوسته علشان تمرر بيها السلك من الباب إلى داخل السيارة لأن أسلاك الكهربا طرية ومستحيل تعرف تمررها من غير سلكة ناشفة .

أتمنى يكون الشرح واضح .... وبكده طبعا العربية خرجت بره الضمان .. وتحياتى لغبور باشا !!!

الموضوع: طلب استشارة فنية

LinkBack

أدوات الموضوع

عرض

-

-

-

-

المواضيع المتشابهه

استشارة فنية

استشارة فنية

استشارة فنية

استشارة فنية

استشارة فنية؟

الكلمات الدلالية لهذا الموضوع

المفضلات

المفضلات

ضوابط المشاركة