اولا الاخوان مش فزاعه للداخل بدليل ان كتير جدا من الناس كانت بتنتخب مرشح الاخوان من غير ما تعرفه لمجرد انه مش هينضم تاني يوم ما ينجح للوطني و هيكون معارض حقيقي للوطني و مفيش عليهم غبار في ناحيه الفساد المالي
الاخوان كمان مش بشعيين زي ما كتير بيحاولوا يفهمونا دلوقتي هما ناس ليهم ما ليهم وعليهم ما عليهم
لكن لازم نكون واضحيين كمان ان الاخوان ككيان موجود طوال الفتره السابقه كان لازم يتعايشوا مع نظام بمتلك القوه و السيطره فطبعا اكيد ليهم هنات و توازنات مع النظام السابق من ضمنها مثلا انهم شاركوا في الانتخابات السابقه و كل الناس كانت بتدعوا للمقاطعه لاحراج النظام في الوقت ده كمان اعلنوا قبل بدايه الاحداث انهم مش مشاركين في مظاهرات 25 يناير . و دي كلها مش مواله للنظام السابق طبعا بس هى حسابات توازنات و اخطاء في تقدير النتائج مقبوله منهم لان محدش يقدر يزايد علي معارضتهم للنظام السابق زي الاحزاب الكرتونيه
حاله الثوره المصريه حاله فريده في التاريخ المصري وممكن العالمي يعني الاخوان مع انهم فاعلين في المجتمع المصري من سنين كتيره لكن مش هم الصانع لثوره الشعب و لا حتي المحرك ليها.
هما المناوئ للنطام الذي سقط لكن مش هم اللي قاموا بالثوره زي الوفد مع انقلاب 52 كان الوفد هو المناوئ للقصر و الانجليز لكن الجيش هو اللي قام الانقلاب العسكري
كمان لازم نواجه نفسنا ان مش كل الاشكال الفاسده او غير المناسبه اللي كانوا بينجحوا في مجلس الشعب مكانوش بينجحوا بالتزوير و كتير من الاحكام اللي كانت بتحكم ببطلان الانتخابات في دوائر كانت بتكون لاسباب شكليه او ظنيه
اللي انا فعلا خايف منه دلوقتي مش ان الاخوان يمسكوا الحكم لكن انا حاسس ان فكر الثوره ده مش مخترق المجتمع المصري بعمق يعني لو عملنا انتخابات مجلس شعب كمان 4 شهور زي ما احنا متوقعين انا حاسس (و يارب اكون مخطئ) ان رجل الشارع العادي هيختار المرشح اللي هيديله كيلو لحمه ويوعدوا انه هيعين ابنه و يسفلت شارعه سواء كان اخوان او رجل اعمال او غيره
دلوقتي الوضع اتغير فيه اجيال و فئات كامله من الشعب كانت خامله و هتبقى عايزه تشارك في الحياه السياسيه سواء بالترشح او الانتخاب و انا بأتكلم عن كل التنظيمات المجتمعيه (اتحاد طلبه , عماده ,عموديه , نقابات , مجالس محليه , مجالس برلمانيه ,رئاسه)
المفروض الفتره دي تكون فتره تنوير للناس و تزداد فيها حملات طرق الابواب لتفيهم الناس الاوضاع و حثهم علي التعرف علي الاتجهات الفكريه المختلفه المعروضه علي الساحه و كل واحد يشوف ايه اقرب اتجاه يتناسب معاه
المفروض كلنا نغّلب المصلحه العامه علي المصالح و الانتماءات الحزبيه او التنظيميه كلنا نحمي:-
1- نزاهة الانتخابات
2- حريه التعبير عن الاراء و المواقف
3- حريه نقد طريق اداره البلاد
4- السماح لكل الاحزاب و الجماعات بنشر افكارها طالما لا تحرض او تدعو للعنف
5- محاربه الفساد
6-تغليب مبادئ الكفاءه علي المحسوبيه او السن او الخبره او الانتماء الفكري او الديني او التنظيمي
7- عمل توازن بين سلطات الرئيس و المجالس النيابيه و السلطات التنفيذيه و القضائيه و الجيش بحيث لايستطيع احد الانفراد بكافه السلطات
8- تحديد فتره الحكم بقتره محدده
لو ده اتحقق مش فارقه مين اللي يحكم لان اللي جه لو مش كويس هأقدر بطرق شرعيه اني اغيره
المفضلات