لحد امتى هتفضل المظاهرات شغالة
احنا عايزين نقول هنا اراء مش كل واحد يتهم التانى انه عميل .... فى الاول كان كل واحد فى التحرير الناس بتتهمه انه اجنبى ودخيل وكنتاكى واخوان..... ودلوقتى اى حد يقول اى حاجة انه مع شفيق او انه شايف ان المظاهرات لازم تقف يبقى من النظام البائد والحزب الوطنى ولازم اسمه يدخل فى قائمة العار ...... لا اعتقد ان فى حد ماطارش من الفرح لما حسنى وشلته - اللى ماكانش متوقع انهم يقوموا من على كرسى الحكم الا بعذرائيل - انهم يمشوا يرحلوا وبنفس الطريقة اللى عاملوا بيها الشعب المصرى طول عهدهم يمشوا بإهانة
بس والله استفسار برئ وانا والله مش حزب وطنى ...هو المظاهرات دى هتفضل لغاية امتى ؟!!!
وزارة شفبق مفيش حد راضى عنها بس بالمنطق هتقدر تجمع رضا 80 مليون مواطن على نفس الحاجة ازاى - ناس شايفة ان شفيق لازم يمشى ... ناس شايفة لأ .... ناس شايفة ان محمود وجدى مش حلو قوى بس احسن الوحشين...... ناس شايفة انه اسوأ من العادلى
انا ده بس اللى بفكر فيه فكرة ان مفيش استقرار حضرتك يوم مايعملوا وزرارة ترضى 30 مليون هنلاقى 20 مليون مثلاً مش راضيين لو نزل منهم مليون واحد بس لازم المسؤلين هيغيروها
انا شايفة الاحتجاجات على الوزراء والوزارة لازم تاخد شكل مختلف طريقة تانية الثورة بالملايين اللى نزلت من يوم 25 - 2 فبراير كان ليها سببها والحمدلله نجحت فيه بس يعنى مثلاً فى أوروبا والدول المتقدمة- اللى ان شاء الله هنكون منهم قريباً - لما يعترضوا على رئيس وزراء بيعترضوا ازاى ؟!! و الجيش عامة قال انه ضامن - قال ان حكومة شفيق مش هى اللى هتقوم بالانتخابات يعنى قدامها شهر او شهرين يعنى انا شايفة نخلينا معاهم فى كلامهم ولو فرضنا ان حصل اى حاجة عكس كدة مش هيبقى صعب ساعتها ان الناس تنزل من غير حتى ماتجمعها
نرضى 80 مليون مواطن على وزار ة او حكومة او وزراء داخل الحكومة شايفة انها مهمة صعبة انا شايفة ان الثورة لازم تاخد منحنى جديد ، شكل جديد "البناء" لازم نبتدى نبنى بلدنا ويوم الجمعة ده لازم حتى ننزل نشتغل فيه مينفعش الفترة اللى جاية دى نرتاح لازم كله يشتغل وبضعف الوقت والجهد عشان نقوم بلدنا
وكل واحد يرجع مجاله السياسيين يتابعوا الحالة والتطورات والتغييرات الوزارية ... والموظفين ينزلوا أعمالهم .... والنيابة والمحاكم والجيش يرجعوا فلوس البلد الواحد نفسه يشوف مصر فى المنزلة اللى تستاهلها
هذا رأى وأشهد ان لا اله الا الله وان محمدا رسول الله