الموضوع: اللى عايزين المظاهرات تستمر يدخل يشوف اللى بيحصل

ربنا يستر على البلد الواحد بقى مش عارف هيا راحة فين او عارف بس خايف يصدق

طبعاً ده حادث مؤسف ونتمنى انه ما يتكررش.

لكن منقدرش نمنع الموظفين انهم يضربوا عن العمل أو يتظاهروا حتى لو شايفين ان ده يضر بالاقتصاد ويمنع الحياة انها تعود لطبيعتها. حتى لو اختلفنا معاهم، ده حقهم.

أنا بصراحة أقل تحمسا للمظاهرات الفئوية لكن زي ما حضرتك اعطيت مثل سيء نتمنى أن لا يحدث مرة أخرى، ادي لحضرتك مثل جيد

ركبت مع سواء تاكسي من يومين وطلع عضو لجنة نقابية وموظف في المحافظة.
الموظفين في ادارته عملوا اضراب عن العمل لكن لم يخرجوا خارج المبنى أو يخربوا أي ممتلكات عامة بوعي من قادة الاضراب والمضربين نفسهم. جاء المدير وتفاوض معاهم واتكلموا عن الظلم الواقع عليهم. المدير ده كان استحالة حد يخش مكتبه وكان معاملته للموظفين فظة. الساعي المتعين جديد في مكتب المدير كان بياخد حوافز وبدلات أكتر من العامل اللي بقاله 30 سنة في مكان آخر في المحافظة. الموظفين جابوا مفردات مرتب المدير وكان مرتبه كبير جداً هو ومستشاريه. المستشارين حاليا في الهيئات الحكومية عبارة عن اصحاب كبار المديرين ومعارفهم. المدير كان بيتحايل عليهم (بعد ما كان بيعاملهم اسوء معاملة) عشان يفضوا الاضراب ومايعملوش له مشكلة وفعلا نفذ بعض مطالبهم اللي يقدر عليها. المدير بقى خايف منهم (مش خوف من عنف جسدي بل خوف من قوة صوتهم) بعد ما كان الموظفين هما اللي خايفين منه وساكتين على ظلمه ليهم.

في كل مؤسسة من مؤسسات الدولة في رئيس ومدراء في قمة الفساد والموظفين عارفنهم. كل هيئة لازم تتطهر نفسها وتبلغ عن الفاسدين فيها.

أيوة، الاضرابات الفئوية دي بتضر الاقتصاد مؤقتا. وبعض مطالب الموظفين تعتبر انتهازية، لكن في المجمل الاضرابات والمظاهرات الفئوية دي بتطهر جذور الفساد اللي معششة في كل مؤسسات الدولة.

أما بقى المظاهرات ذات المطالب العامة دي مفهاش شبهة انتهازية أو مكاسب شخصية. ودي أنا شخصيا معاها 100%.