بسم الله الرحمن الرحيم الرحيم
السلام عليكم ورحمة الله وبركاته
بعد توقف دام لأكثر من شهرين متصليين واحب انا ان اسميها انتكاسة فكرية او تقشف ادبي يعيد فيها الكاتب اختزال المزيد من الأفكار التي سيطرحها لكي لا يكون في التكرار سفه وعته للقارء !!
راجعت نفسي مرارا وتكرارا فيما سوف أكتب في هذه الحلقة فهذه الحلقة تعتبر ويكأنها اعادة اختبار منكم لي لمدى جودة تلك الحروف المتلاصقة التي تكون المعاني التي ارسمها واحطها على الورق ( يا سيدي يا سيدي)
لساعات جلست امام هذا اللعين المسمى بلغة الفرنجة كي بورد !! افكر فيما ستطبعه اناملي لكي ابتليكم بتلوثي الفكري اللذي وصلت اليه !! سألت نفسي لما الآن وخصيصا في هذا الوقت ..
فعرفت الإجابة لأني بداية هذه المدونة كانت في ظروف حالكة !! وكانت سببا في تفريج همي ورسم الإبتسامة على حضراتكم فرأيت انه ما من ايام اشد سوادا علينا من هذه الأيام سوى ان اخط عليكم ما كتبت لتروه ..
بداية سأقص على حضراتكم ما حدث معي البارحة
الهاتف يهتز مذعنا عن بيان ونبأ هام !!
الطرف الآخر : الأستاذ عبد الموجود موجود ؟
انا : تحت امر حضرتك يا فندم (بجدية شوية )
الطرف الأخر : انتا لسة معرفتش مين معاك ؟
انا : لا يا فندم حقيقة انا بالعافية بأتذكر انا مين اصلا
بعد مناوشات لعدة دقائق اكتشفت انه ابن عمتي احمد يتصل بي ليطمإن علي !!
هو : بقولك ايه متجيلي بكرة المستشفى ؟
انا : الف سلامة عليك خير ان شاء الله ؟
هو : ايه انتا متعرفش ؟ انا جبت اول ولد حمزة عقبال عندك يا متخلف !!
انا : الف مبروك ويتربى في عزك يا ابو حميد ازاي والله ما اعرفش !!
هو : خلاص حجتك بطلت انتا تزورني بكرة
انا : والله حسب ظروف الكلية والأجازات ولو معرفتش اجيلك بكرة ها ازورك في بيتك ان شاء الله
هو : يبني كفاية حرام عليك ها تموتني ناقص عمر انا عايش في الإماارات ها تجيلي بيتي ازاي انا والمدام نزلنا عشان تولد في مصر وراجعين تاني !!
انا : اه صحيح ده انتا احمد !!
هو : نهارك اسود هوة انتا كنت بتاخدني على قد عقلي !!!
انا : ده اسمه كلام برضوا !! ( كلمة في سركم انا قلبت في تاريخ اسرتي مين في اولاد عمامي اسمه احمد لقيت التالي
المهم لحد ما اكتشفت انه المذكور احمد محمود !!
هو : المستشفى الأمريكي يا سيد غرفة ... (مستحيل افتكرها )
انا : ان شاء الله في اقرب فرصة ها تلاقيي بخبط عليك يا كبير ..
تاني يوم صحيت ونزلت الشغل !!
وبعد ما وصلت لقيت الشركة مقفولة !!
اكتشفت انه النهاردة الجمعة !!!! على فكرة انا بتكلم جد والله العظيم انا يوم الجمعة اللي فاتت صحيت من النوم ولبست ونزلت ورايح المكتب ووصلت لقيت الشركة مقفولة واكتشفت اني بطبق روتين في حياتي حافظه مش فاهمه !!
المهم قولت انا احسن حل اروح افطر وساعتين اصلي وبعدين اروح النادي وبالليل اعدي على المستشفى ازور ابن عمتي
جت الساعة حوالي 8 وكنت في مدينة نصر قولت اروح ازوره في المستشفى
الحقيقة عشان اكون صادق ابن عمتي ده اللي انا حضرتك فرحه ايام الثورة ورحت فندق غير الفندق اصلا !!
وزوجته مصرية اه بس مشوفتهاش قبل كده غير مرة اللي هوة في يوم الفرح بس بأمانة ..
المهم طالع المستشفى ولثقتي في نفسي سألت في الريسيبشن على مدام احمد محمود قالي غرفة 301 !!
فوجدت سيدة تجلس على الفراش عمرها يقترب من الـ 35 عاما !!
"واضعا الشوكولاتة والورود على الطاولة "
هي : وعليكم السلام يا ابني j "انا في قرارة نفسي ابني ايه بس "
انا : الف الف الف الف مبروك يا مدام " حاولت ان اقلب في ذاكرتي عن اسم زوجة ابن عمتي ولكن استحال علي ان اتذكرها "
هي : الله يبارك فيك !! انما انتا عرفت ازاي صحيح ؟
انا : مهو احمد اللي قالي انا والله حاسس بالتقصير فعليا عشان مكنتش اعرف لحد دلوقتي !!
هي : لا لا تقصير ولا حاجة احنا كنا منتظرين ولسة مقولناش لحد اصلا !!
انا : ده انا محظوظ اني عرفت بقى ههه
هي : ابتسامة صغيرة وهي تقول " انما هوة انتا صاحب احمد ولا قريبه " ؟
انا : انا ابن خاله سيد وحضرتك فرحكم بس اكيد حضرتك مش فاكراني !!
هي : والله انا بحاول بس للأسف ذاكراتي خايناني
وتناقشنا بتاع ربع ساعة كده في شتى مناحي الحياة !!
انا : امال فين حمزة عايز اشوفه ؟
هي : قصدك لبنى بقى هيا في الحضانة !
انا : بسم الله ما شاء الله انتوا جبتوا توأم ولد وبنت !! والله احمد قالي حمزة بس !!
هي : حمزة مين !! احنا خلفنا بنت بس !! واحمد عرف منين اصلا عشان يقولك احنا خلفنا مين ؟
انا : الله صلي على النبي يا مدام احمد ها يعرف منين ازاي مهو لازم ها يعرف هوة انتي مخبية عليه ولا ايه ؟
هي : مخبية على مين وبتاع احمد اخويا لسة معرفش اني خلفت اصلا انتا عرفت ازاي بقى !!
انا : لا اله الا الله !! اخوكي ازاي يا مدام !!
هي : بقولك ايه انا شاكة فيك من ساعة ما جيت اثبت مكانك انا ها انادلك الأمن !!
ورفعت السماعة طالبة من الممرضة الحضور فورا !!
وانا كل ده ماسك الموبايل عمال اطلع في نمرة احمد عشان اطلبه !!
السيدة : من فضلك شوفي الأستاذ ده شارب ايه ودخل هنا ازاي اصلا ده تسيب واهمال مين ده !!
انا : يا فندم عيب والله يعني مرات ابن عمتي وتشتمني بس انا مش ها ارد لأنه ليكي زوج زي اخويا بالضبط
حتى دخل رجل الى الغرفة بعد كان كان اضيف بتاع 4 او 5 ممرضات يحاولن تهدئة السيدة المتوترة
الرجل ابعاده الجسمانية متتقاسش بمسطرة من كتر ما هوة ضخم !!
واسمر وله لحية طويلة جدا !! وعرض جبهته فقط يساوي عرض اتجاه الرايح في الطريق الصحراوي !!
وعرض منكعيه يساوي عرض الطريق الدائري رايح راجع !!
فنظرت اليه مبتسما قائلا (اكيد حضرتك مدير امن المستشفى )
هو مزمجرا ( غطي راسك يا عفاف )
انا : فاتح بقي وعمال ابص يمين وشمال
هو : مالك يا عفاف بتزعقي ليه
هي : الـ ... ده دخل علي القوضة وعمال يهرتل زي المساطيل انه احمد قاله مش عارف ايه واننا خلفنا مش عارف ايه !!
انا : ممكن بس اعرف اسم حضرتك ايه يا فندم وصفتك عشان اعرف انا بكلم مين ؟
هو : انا جوز الهانم يا استاذ !!
انا : نهار اسود انا بقالي سنة مشوفتكش يا احمد ايه اللي جرالك ( في عقل بالي طبعا )
هو : هوة ايه اللي ازاي يعني !! بالورقة والقلم والشهود !! عند حضرتك اعتراض
وفجأة مع تعالي صوته بيزعق وعمال يقول هاتولي البوليس انا عاير اعرف انتا مين دلوقتي حالا لقيت
احمد ابن عمتي داخل الغرفة من الباب من بعيد جدا "لكثرة اعداد الجمهور "
انا : احمد انتا فين يا عم !!
الرجل غاضبا : احمد مين يا عم انتا فوق ده انا ها احبس ...
انا : يا عم استنى صلي على النبي بس !!
احمد : سيد ايه اللي حصل !!
انا : يا عم انا جيت ازورك زي ما طلبت مني مراتك شتمتني وهزقتني والراجل ده عمال بيقولي انا جوزها وعمال بيشتم وانا ساكت عشان خاطرك !!
الرجل الغاضب : بينظر بغضب لي ولأحمد وقال " انتا تعرفه يا استاذ احمد ؟!"
يرد احمد علي قائلا بس دي مش مراتي !!
انا وقد نزلت علي الصاعقة !!
اكتشفت لاحقا انه الراجل ده عرف احمد من المسجد اللي في المستشفى
انا : امال دي تبقى مين !!
احمد : دي زوجة الأستاذ عبد التواب !!
احمد : واضح انه سوء تفاهم يا استاذ عبد التواب انا متأسف جدا بس والله سيد كده على طول !!
انا : بهز رأسي في علامة عن الخضوع والبؤس !!
بعد هري ورغي لمدة ساعة اقتنع انه سوء تفاهم واني دخلت غرفة غلط !!
بعد ما قعدت ما ابن عمي وزوجته الحقيقة اكتشفت اني نسيت الشوكولاتة والورد في الغرفة التانية !!
احمد : يا ابني انتا لسة فيك لاعادة دي نحطك في اي حتة مغناطيس مشاكل ؟!
انا : ابو حميد متيجي معايا اجيب حاجة من قوضة هرقل اللي جنبنا ده !!
احمد : انتا عارف الراجل ده لو شافك تاني ها يعمل فيك ايه ؟
اتمنى ان تكون العودة قد كانت خفيفة ولم تكن مملة لحضراتكم بعد غياب طويل اشتقت فيه اكتاباتي ..
والكعادة ما زلت انتظر تعليقات حضراتكم على احر من الجمر