بعد انقطاع دام لأكثر من عام كامل مررنا فيه جميعا بكل وشتى انواع المآسي والأحزان الخ الخ الخ ونبطل هري ورغي كتير ! كلنا عارفين انه عام 2012 كان اللهم صلي على النبي حاجة اوستيك علينا جميعا ! بغض النظر عما ممرنا به جميعا في هذا العام ! لنه بحلوه ومره ! نفي اعمله "DELETE " بالكامل ! من سجل تاريخي بغض النظر عن محتواه بقى !!
ورجوعا بيوميات سقوط علامة بروتون حسيت اني نفسي ارجع للكتابة والتدوين تاني !! حتى لو مفيش حد قرأها ولكن على الأقل احس بأنه فيه تجديد بأي نوع من الأنواع تجاه الناس اللي حواليا !
وبداية قصة اليوم حقيقة 100% ! ممكن تكون غريبة عنكم بس انا حسيت انها خروج عن الواقع وما حوله !
لمن لم يعرف منكم مشروع تخرجي في الكلية هو فأنا اخدت مشروع اسمه "Management of solid waste " نسيبنا من الإسم بالإنجليزي عشان هوة يديلك ايحاء بأنه حاجة نضيفة ولكن من الأخر مشروع تخرجي في الزبالة !
بمعنى اصح انا مهندس مدني ! بدال ما يجيلي مشروع تخرج تصميم كبري ولا عمارة ولا خازوق ولا حتى تصميم طريق او تصميم خلطة خرسانية سابو كل ده وادوني مشروع زبالة !
الموضوع حصل كالأتي ! روحت يوم توزيع المشاريع ورئيس القسم بيفرق المشاريع على الطلبة روحت لعنده وانا كاتب في رغبات المشاريع
1- صرف صحي وتصميم شبكات مياه
2- خرسانة مسلحة
3- مشروع التنمية
يسيبوا الثلاثة دول والدكتور يقولي ! " تعالا يا غالي يا ابن الغالي ده انتا يا سيد بالذات شايلك حاجة للحبايب ! حاجة مشروع اول مرة يتعمل في مصر ! مشروع اسمك ها يدخل بيه التاريخ ! مشروع لو نفذته صح ها تسافر امريكا تعرضه على كبار العلماء ! المشروع ده يا سيد هوة الثورة في مصر المشروع ده يا سيد هوة اللي ها ينقل مصر من دول العالم الثالث للعالم الأول في ظرف 5 سنين بالضبط ! سيد يا ابني انا سيبت اوائل الدفعة كلها وجيتلك انتا بجد ! انتا املي اللي ها تنفذ المشروع ده ! المشروع ده ادرس في مصر بقاله 20 سنة نظريا ! جه الوقت يا بطل اللي ترفع فيه راس مصر لفوق وتنفذه انتا معمليا !!
انا قولت في عقل بالي اخيرا جتلك اللحظة يا سيد يا هلال اللي اسمك فيها ها يتسطر بالذهب في الكتب العلمية ! اخيرا جه اليوم اللي مصر محتاجالك فيه ! والله العظيم للحظة تخيلت اني رأفت الهجان ومصر في عنق الزجاجة واانا الوحيد اللي في ايدي انجي مصر من الموت !
قعدت مع الدكتور يوم 29\9\2012 !
تحت امرك يا دكتور انا جاهز للمشروع ! اشجيني ! عرفني مشروعي عن ايه ! كلي اذان صاغية ! انا مسعد ابذل الغالي والنفيس في هذا المشروع فعليا !
قعدت وجبت الورقة والقلم والدكتور راح قالع النضارة وباصصلي وقالي ! الحقيقة انا مش عارف ابدأ منين ! الموضوع كبير يا سيد وانا لولا ثقتي في مجهوداتاك مكونتش وكلت اليك مشروع بالحجم الضخم ده !
انا : الدمعة قربت تفر من عيني ! قول يا دكتور ميهمكش فأهلا بالمعارك !
الدكتور : انا عايزك يا سيد يا ابني تلم زبالة البيت عندك وتنقضها وتوزنها كل يوم وتحوشها مترميهاش !
انا : نعم !!!!
هو : ايوا يا ابني ايه الصعب في اللي بقولك عليه ده !
انا : يعني الزبالة دي ها نعمل بيها مركبات في حاجةف ي هندسة تفيد مصر يا دكتور ؟!
هو : لا خالص يا ابني بس انتا مش ها تفهم المغزى من كلامي ده دلوقتي !
انا : "يمكن يكون في هدف اكبر واسمى من اني افهمه عشان كده هوة الدكتور مأجل الدردشة في التفاصيل دلوقتي " طيب وماله يا دكتور احوش الزبالة لمدة قد ايه طيب ؟ " انا جي في بالي ها يقولي لمدة اسبوع او بحد اقصى 15 يوم "
هو : لمدة 3 شهور يا ابو السييد !
انا : " في بالي طبعا ! لا بقى ده انتا مصمم " ! 3 شهور ازاي بس يا دكتور ! ده انا قوضتي لوحدها زبالة ها اقوم احوش فيها زبالة كمان !
هو : مش بس تحوشها انقضهالي ! البلاستيك لوحده الورق لوحده الأكل لوحده الكانزات لوحدها المخلفات الطبية لوحدها ! وتوزن كل يوم وتاخد قرايات !
انا : طيب وده ايه علاقته بتخصصي كمهندس مدني يا دكتور !
هو : الهدف سامي ونبيل يا ابني !
انا : طيب واجي اتابع مع حضرتك في المشروع كل اسبوع فين يا دكتور
هو : لالا خالص انا مش عايز اشوف وشك احنا من بكرة 1\10 مشوفش وشك غير 1\2\2012 تكون الـ 3 شهور عدت وخلصت !
انا : طيب يا دكتور موضوع تحويش الزبالة ده صعب قوي ! اقنع الناس اللي معايا في البيت ازاي اني ها احوش زبالة وريحة وصراصير وامراض طيب ؟
هو : بس مش ده بس مشروعك يا ابني !
انا : يا فرج الله اخيرا ها اسمع الهدف من المشروع
هو : اهم حاجة انا عايزك تتعرف على الزبالين اللي عندك في المنطقة كلهم ! وتاخد منهم قرايات وابحاث تشوف كل شقة بتطلع زبالة نوعها ايه وشكلها ايه ! ولا مانع انك تقف معاهم تنقض الصناديق وتتعلم ! وصناديق الزبالة اللي في منطقتك مش عايزك تعتقها ! تنط جواها وتشوف زبالة المنطقة عندكم طبقا للتصنيف الإجتماعي نوعها ايه معظمها بيكلون عضوية ولا غير عضوية ! اوزانها ايه !
انا : انط فين عدم اللمؤاخذة تاني كده ؟!
هو : مش كده وبس انا عايزك كمان بعد ما تحوش الزبالة عندك تحطها في الفرن وتنشفها وتوزنها عشان تشوف تأثير سحب الرطوبة من قلب الزبالة ها يقلل وزنها بمعدل كام يعني نشوف الزبالة كانت شاربة رطوبة بمعدل كام !
انا : فرن !! زبالة !!
هو : وعايزك كمان تجيب كيس وتقفله كويس وترميه في وسط الشارع ! وتستخبى وسط الشجر وتشغل "Timer " وتشوف الزبالة بتاخد وقت اد ايه في شوارعنا عشان حد يحركها !
انا : بس دي ممكن تقعد كده شهور يا دكتور !!!!!؟
هو: وايه المشكلة يا ابني ! تخليك قاعد جنبها متتحركش وتصورها كمان اول ما تتحرك !
انا : في عقلي الباطن " يا خراب بيتك يا وهدان ! يا ميلة بختك يا وهدان ! " تحت امر حضرتك يا دكتور !
طبعا اي حد في مجتمعي بيقولي مشروع تخرج عن ايه بقوله "management of solid waste “ الإسم لوحده بيبن انه مشروع مجعلص وصعب الفهم فأقوم الاقيهم بيبتسموا ويقولوا ربنا يوفقك في حين انهم لو عرفوا انه مشروع زبالة ! مش ها اقولكم التريقة !
يكفي انه كان عندي عزومة من يومين عند ناس قرايبي فعمي بيقول النهاردة الجمعة الزبال مجاش !
اخويا : ميهمكش يا عمي سيد ها يقوم بالواجب مبيخليش ورقة في الأرض قوم يا ولد يا سيد لم الزبالة اللي في البيت كلها وهاتها !
وتبدأ حفلة الكوميديا على قفايا بقى :D
لحد ما قولت في يوم لا بقى ! انا لازم اثبت للناس كلها انه المشروع ده اهم من مشروعات تفكيك الذرة
فضلت اوزن في الزبالة واصنفها ! ولكم ان تتخيلوا انه كل ما كان يجيلي حد من صحابي البيت يلاقي الأكياس في كل مكان وانا لابس الجوانتيات وغايص في قلب الزبالة عمال اوزنها واصنفها !
لحد ما سافرت اسبوع العيد اقضي الأجازة ومشيلتش زبالة ولا حوشت ! فقولت من باب الإئتلاف انا اخبط على جيراني في العمارة واقولهم لو عندهم زبالة انا عايزها ! طبعا نصهم قفل الباب في وشي وافتكرني بتريق او شارب حاجة ! وفيه نص فكرني بعمل عمل خير وبوصلهم الزبالة لحد تحت ! وفيه اللي افتكرني الزبال اصلا !
طبعا انقض في زبالة العمارة ! فيها مصايب وبلاوي فعليا !! بس ربنا امر بالستر بقى ! انا لو اشتغلت زبال احب اقولكم اني ممكن اعلن الحرب على اي دولة عن طريق الزبالة اللي عندنا احنا زبالتنتا مش طبيعية بجد !
المهم لحد ما في يوم لقيت حد بيخبط عليا الساعة 4 الفجر !
انا : ايوا مين ؟
هو : سلام عليكم
انا : وعليكم السلام يا سيدي تحت امرك فيه ايه ؟!
هو : ابدا يا فندم انا محمد الزبال !
انا : حصلنا الشرف نعم يا سيدي ؟!
هو : واضح اني صحيت حضرتك انا متأسف بجد
انا : لالا الساعة 4 يا راجل يا طيب فيه حد ها يكون نايم ! فيه ايه يا استاذ محمد
هو : انا مختص بالزبالة بتاعت المجموعة بتاعت حضرتك اللي ساكن فيها ولاحظت اني بقالي فترة جردل الزبالة بتاعك بلاقيه فاضي يا ترى فيه حاجة بدرت مني يا فندم عشان بتدي الزبالة لزبال غيري ؟!
انا : حاجة بدرت منك ! لا مفيش يا سيدي
ودخلته وقعدت حكيتله الحوار من طقطق لسلام عليكم ! انا كنت حاسس اني وانا بحكيله اني صعبت عليه والله العظيم والراجل كان قرب يطلع 2 جنيه من معاه ويديهوملي كمان !
فقالي طيب انا عندي فكرة ها تفيدك في مشروعك قوي
انا : في سري ! يادي المصايب اللي ورا بعضها انا ناقص افكار !
قول يا عم محمد مهي المشرحة ناقصة قتلة !
هو : انا ها الم زبالة الرحاب وها اخلص كمان ساعتين كده ايه رأيك تطلع معايا الجولة وبعدين نروح مكان اسمه الكباس بنكبس فيه الزبالة وبعد ما نكبسها بناخد الزبالة دي ونوديها المقلب العمومي !
انا : طب والله فكرة اهو اعرف خط سير الزبالة من ساعة ما تطلع من بيتي لحد ما تروح المقلب ! دخلت ولبست هدومي واخدت معايا الكاميرا ! وتوكلنا على الله ! وبدأت اساعده في لم الزبالة من العماير ! طبعا الاقي شغالة من دول تروح شاخطة فيا وتقولي حاسب لحسن الأفة تنقط على السلم لحسن تطين عيشتي ! وست هانم من دول تروح مهزقاني عشان اتأخرت قال عشان عايزة الجردل ! فعلا الزبالين في مجتمعنا مهمشين والله يا جماعة :D :D :D انا بقى حسيت بتجربتهم بالكامل ! حتى اني وصلت اني ركبت في عربية الزبالة ذات نفسها وركبت ورا مع الزبالة كمان ! عشان احس بطعم المشروع اكتر واكتر ! لحد ما وصلنا للكباس ! وكانت هناك الفاجعة الكبرى ! المصيبة الأعظم ! لقيت .......
نكمل الحلقة الجاية بقى ان شاء الله :D ودي مجموعة من الصور لإثبات ما حدث لحد ما اوريكم باقي المصيبة اللي حصلت معايا ان شاء الله :D
الا اللقاء في الحلقة القادمة ان شاء الله .
http://i94.photobucket.com/albums/l1...203_085136.jpg
http://i94.photobucket.com/albums/l1...203_085019.jpg
اظن في خلال الساعة دي انتا مش بس مصر اللي صعبت عليك ! سيد هلال ذات نفسه صعب عليك !
حس بيا يحس بيك ربنا !