انا بأعتذدر بشدة يا جماعة والله عن التأخير اللي مش بإيدي والله والعظيم نهائيا .. ولكن نعدكم بالتعويض والله كل مرة بقول كده واطلع اعيل من المرة اللي قبلها :D
ولكن المرة دي انا احمل لكم تقرير حصري وكامل وها اعتذر عن الحلقة النهاردة
التقرير عبارة عن زيارة لـ فندق كنكورد السلام الكائن بمصر الجديدة بالقاهرة
الزيارة عملت تشيك ان في تمام الساعة 3 من يوم الخميس الموافق 21 يوليو الى يوم السبت 23 يوليو
واحد يسألني ويقولي انتا مش قولت مسافر الساحل
اقولوا حسبتها لقيتها هيا هيا وبالعكس ها اتبهدل اكتر هناك !! واحد يقولي طيب والتغيير فين بقى في قعدتك في القاهرة اقولوا التغيير مش بيبقى في المدينة التغيير بيبقى في المكان تغير جو يومين مع ناس جديدة ووجوه جديدة ده في حد ذاته تغير جذري ..
واحد يسألني ويقولي التكاليف اخبارها ايه ؟
اقوله انا عندي اصلا اشتراك في الفندق باخد خصم 50% على اي حاجة في الفندق والكرت ده سنوي ولكن رسمومه مش متذكرها بالضبط ولكن عشان اكون صريح انا مثلا في الثلاث ايام دي دافع 750 جنيه شامل كل حاجة في كل حتة لأي حاجة :D يعني All inclusive :D
واحد تاني يسألني ويقولي انتا من مبدأ ايه بتحكم على الفندق اقوله بحكم اني قضيت في الفنادق ايام اكتر ما قضيت بيتنا ههه :D
ها نبتدي بالوصول طبعا انا وصلت متأخرا كالعادة على اي معاد في حياتي ولأول مرة العربية تبطل مني مش فاهم ازاي !!
اللي حصل انه كان فيها شرطة بنزين لسة فاضلة !! وفجاة الطريق مشي بعد ما كان واقف فشلت رجلي من على الفرامل ودست بنزين العربية مشيت لحد ما خلص الأولاني وبتدي التاني والطريق وقف تاني لسة بشيل رجلي من على البنزين وبحطها على الفرامل الأربي ام وطي جامد جدا والعربية رعشت شوية وهب راحت مبطلة !!! دخلت بنزينة التعاون اللي على صلاح سالم وفولت وكبست بنزين جامد بعد التفويلة العربية رجعت كويسة !! انا متوقع انها كانت بنزين سئ !!! مع اني آخر مرة حاطط من التعاون !!
المهم وصلت الفندق ودخلت وركنت العربية ونسيت كل المشاكل واهلا بالتغيير بقى :D
عملت تشيك ان بالبطاقة والكارت بتاع الخصم وبالمناسبة اللي عايز تفاصيل الكرت ده انا ممكن اديهالوا على الخاص الكرت ممتاز جدا بصراحة خصم حتى 70% في الفنادق من بعضها ولكن في السلام كان 50% + الخصم نفسه بيسري على الكثير من المطاعم الفاخرة في القاهرة وخارج القاهرة زي استديو مصر وغيرها + انه بيدني افضلية حجز في الفنادق الت 4 و الـ 5 نجوم في القاهرة انا جايب حجز للويك اند في فندق 5 نجوم قبلها بيوم في نص شهر 7 !! اعتقد الفكرة دي ممكن تبقى عاملة ازاي لأي حد نازل مصر يكون متخيل اللي انا عملتوا كان ايه :D
اللوبي : موظفين الريسيبشن ناس فاهمة وبتنجز العميل
التأمين من الجهات الأمنية مرضي جدا فيه تفتيش على جميل المعدات والشنط والحقائب
الترفيه : فيه اسطبل لركوب الخيل ممتاز جدا ولكن الخيل اللي فيه طبعا مش بتاعت امكانيات هيا معمولة مثلا كنوع من الترفيه عن الملاك .. فيه سبا ممتاز وجاكوزي ومساج وحمام سباحة
ولكن الإنترنت سعره مش طبيعي الحقيقي وده اللي خلاني انزل اتكلم مع ادارة الفندق كنوع من انواع التفهاهم يعني اليوم من استخدام الإنترنت في الفندق = 150 جنيه !! وبلاش اقولكم الأسبوع بكام عشان انا نزلت قعدت بالساعتين اتناقش مع ادارة الفندق ( اصل ليا صاحب هناك فالحديث كان ودي)
لأنه فيه منطقة في اللوبي فيه اوايرلس فري ومفتوح !! طيب ايه الفكرة انه العميل ينزل من غرفته عشان مجرد يستعمل الإنترنت !! مع اني شفت نفس الفكرة دي كذى فندق خارج مصر وما زلت مصر اني افهم ايه الفكرة في العذاب ده !!!
ضايقني في الفندق التالي :
- الميني بار يحتوي على مشروبات كحولية وهو مما قد اثار حفيظتي لأنه انا شاب ولوحدي فلنفترض اني ممكن اكون مع اسرتي وفيها اطفال !! ازاي يبقى الغرفة فيها حاجات زي دي !! فكان رد الريسيبشن انه كان ممكن ببساطة من البداية اطلب انه الغرفة متحتويش على اي انواع من الكحول .
- ضايقني مواعيد الفطار والغداء والعشاء مش مناسبة لأغلبية النزلاء وده اللي لاظته على الكثير من الناس ولكن مع الوقت ها تتأقلم مع المواعيد
- اعجبني انه التلفزيون خالي والبرامج اللي عليه من البرامج اللي كانت موجودة في التلفزيون في الماريوت !! وده شئ اعجبني انه ما يزال فيه اعتبار للنزلاء من الجنسية وما حولها !!
- اعجبني انه التلفزيون والتلفون على طول عليهم داش بار اهلا بالأستاذ خطاب !! مع انه اسمي سيد ولكن همة بيتعاملوا مع الإسم الأوسط :D
- خدمة الغرف لسيت سيئة وسريعة
- حصلت مشكلة اثناء تواجدي الا وهو اني بالصدفة بشوف دفتر الشيكات ( الطلبات) في الرووم لقيت انه الدفتر الموجود بتاع النزيل السابق وكان طالب وساحب من الميني بار زجاجة هينيكن ( مشروب كحولي ( فعملت مشكلة انه ازاي ميتمش تفريغ الغرفة وكان ممكن ببساطة الشيك يتحسب عليا مش الفكرة في الثمن الفكرة في شكلي وانا بعمل التشيك اوت اني شارب مشروبات كده نا ضدها اصلا !! وهوة اللي قعدت احكي فيه بتاع ساعة انه البار المكان لمثل هذه المشروبات ولكن انا امقدرش امشي سياسة فندق بالكامل على مزاجي .
- مستوى المأكولات الأروبية والشرقية ممتازة جدا الحقيقة من مشاوي واسماك ممتازة بالفعل !! والطبيخ ممتاز وعلى درجة جيدة فعلا !! انا اكلت من الماريوت وشيراتون والميريديان والفور سيزونز بصراحة هوة والفور سيزونر ما يزالوا الأفضل التانيين كنت بحس الأكل فيه حاجة مش طبيعية ايه هية مش عار فومع انه دي مسألة اذواق ولكن انا عارف انه الأكل نضيف جدا وممتاز جدا ومرضي جدا وعلى فكرة نسيت اني اقول الكرت اللي معايا بيديك ليلة مجانا في الفندق لفردين + 5 تذاكر لعشاء سنوي لفردين يعني فرديت ياكلوا 5 مرات في السنة من الفندق مجانا مش ضروري نفس الفردين طبعا .
- على فكرة الثمن اللي انا كاتبه فوق هوة لغرفة مزدوجة وليست فردية
- فيه بعض الأسعار مبالغ فيها عن الفنادق الأخرة بصراحة او حتى عن النزل لأخرى زي مثلا الدراي كلين ثمن غسيل البنطلون فقط 38 جنيه وكويه 30 جنيه يعني الموضوع بـ 70 جنيه للبنطلون !!اعتقد دي اسعار سياحية ولكن اوفر برضوا بصراحة انا مش ممكن افكر فيهم الا في حالات زي مثلا عايز اغسل فستان فرح او بدلة انيقة يعني ها يحافظوا على الشئ وعلى الفتلة كويس ويتم تنضيفه بشكل كويس يعني اقصد انه تستخدمه في الحاجات القيمة جدا فقط ..
- مأعجبنيش انه لضرورة النزول لتناول الطعام لازم اكون لابس رسمي !!! بنطلون !!!!!!!!!!!!!!!!
ما علينا مليش الحق في الإعتراض دي سياسة فندق ومليش حق التدخل فيها .
ميزة الفندق انك تحس انك اصلا خارج القاهرة مش محتاج تخرج من الفندق الا بيني وبينك بس انتا الصفة العامة اللي شايفها من الأغلبية انه الناس كلها بتجيب زجاجات المياه الخاصة بيها من برة والسبب في ده هو السعر المغالا فيه من قبل الفندق في زجاجات المياه المعدنية بطريقة غريبة حيث ان زجاجة المياه الصغيرة المعندية من الحجم الصغير = 10 جنيهات :D ففي ناس كانت جايبة زجاجات معندية معانا وبيبسي وعصير والحقيقة شفت اجانب عاملين نفس الفكرة دي برضوا لأنه ببساطة احنا في مصر الجديدة وقدام الفندق فيه سوبر ماركت بيبيع نفس زجاجة المياه بـ 2 جنيه في حين انه ممكن يجيبوا من الموزع الرسمي وتكون لهم هم الإستفادة والغريب انه الفندق عارف انه النزلاء كلهم بيعملوا كده ولكن بالنسبالهم شئ طبيعي !! اللي خايف من اسعار المأكولات فهيا هيا مثلا اسعار تشيلز او روبي ثيرزداي زي الريد اي مثلا بـ 95 يعني كله اسعار طبيعية ..
- فيه حاجة ضايقتني كمان وخليني اقول هيا الرعاية الصحية كانت ما بين جيد الى ضعيف لأني من الناس اللي بتصاب للأسف بالرعاف نتيجة لإرتفاع الضغط او الحرارة الزائدة ولكن المرة دي النزف استمر لأكثر من نصف ساعة وفقدت دم كثير وللأسف نزلت لطبيب الفندق كان رد فعله ببساطة هو ثلجة وميل دماغك للخلف مكنش فيه رد فعل طبي من تجاهه وهو ما قد اثار حفيظتي ولكن في المجمل مثلا !!
- الفندق من وجهة نظري ياخد 8 من 10 فهو فندق 5 جوم ولكن من وجهة نظري فيه فنادق في شرم الشيخ 4 نجوم افضل منه بكثير جدا كفاءة مع انه الكونكورد معروف جدا ولكن الملحوظات الخاصة بي كانت كثير وضايقتني فعلا !!
وفيما يلي مجموعة من الصور للفندق من الداخل ومن الخارج ..
والصور بكرة بعون الله للتقرير كامل بعون الله .
المفضلات