الموضوع: من يريد على الاقل اقالة حكومة شفيق و حل امن الدولة و استمرارالتظاهر لحين تحقق المطالب

المشاركة الأصلية كتبت بواسطة hobiko

معاك تماما ...... وفاهم كويس قصدك ايه

تعالوا نكلم عن نفسنا ...... عن الناس الى لسه بتأيد الثورة و استمرار التظاهر

ايه اللى المفروض ( من وجهة نظرى المتواضعة) الى نعمله دلوقتى

بس نقول الى لينا والى علينا

هى المظاهرة يوم الجمعة بتوقف حال البلد ازاى ؟؟؟؟!!!!!

هى المظاهرة يوم الجمعة بتدمر اقتصاد البلد ازاى ؟؟؟؟!!!!

هى المظاهرة يوم الجمعة بتعرض البلاد للضياع ازاى ؟؟؟؟؟!!!!

انا اعرف ناس كتير ..... بتشتغل طول الأسبوع و تنزل المظاهرة يوم الجمعة و بعد كده تروح

ايه المشكلة فى ده

من اول الثورة و ناس كتير للأسف ..... محملة الثورة مسئولية وقف حال البلد

كأننا احنا الى قولنا للشرطة اضربونا و موتونا و بعد كدة انسحبوا

و مافيش حاجة اسمها السياحة اضربت و السياح بيهربوا من بسبب المظاهرات

ثورة مصر ضربت اروع مثل قدام العالم فى الحضارة و الرقى

اللى خلى السياح و الخواجات يهربوا ...... انعدام الأمان بسبب هروب الشرطة

ده اللى لينا

ايه بقى اللى علينا و ده الأهم

طريقة خطاب الثورة لازم يتغير .......

ماينفعش ندخل فى معارك جدلية تخسرنا جزء من الناس ...... اتفاق الناس و وحدتهم و رغبتهم فى الأصلاح و التغيير اللى بيأدى انهم ينزلوا الشارع ...... هو ده سلاحنا الوحيد

فى اختلافات كبيرة على شفيق ....... خلاص ماشى بلاش شفيق يمشى ..... فى سبيل وحدة الصف

بس اكيد مش حنلاقى اختلافات كبيرة على ممدوح مرعى ..... على ابو الغيط .... على صفوت الشريف ..... على زكريا عزمى ..... على حبيب العادلى ..... على جمال مبارك

و اكيد اكتر مش حنلاقى اختلافات كبيرة على سرعة اجراء التحقيقات و محاسبة المتورطين فى موقعة الجمل .... فى ضرب المتظاهرين بالرصاص الحى ...... فى انسحاب الشرطة .....

ممكن مثلا تبقى الجمعة الجاية عنوانها اقالة مرعى و ابو الغيط و محاسبة بقيت الشلة الزبالة

ممكن يبقى عنوانها تطهير الداخلية ...... محاسبة القتلة و الجناة و الفاسدين

ممكن يبقى عنوانها بناء مصر و دعم الجيش فى مهمته الوطنية و هى محاربة الفساد و اصلاح البلد

لو الناس مختلفين على شفيق ....... بلاش نعمق الخلاف و نزود الشرخ

نقصقص ريشه ...... وهو كده كده ماشى

و بلاش موضوع البيات فى التحرير و الأعتصامات و الكلام ده

كفاية المظاهرات المليونية ايام الجمع ...... مع تكثيف المجهودات طول الأسبوع لحشد أكبر عدد ممكن من الناس

و بلاش بلاش بلاش نخاطر بعلاقتنا بالجيش

لأن لازم نصدق ان الجيش مع الثورة حتى لو شكينا شوية ...... مش عايزين مصر تبق ليبيا تانية

احنا ببساطة محتاجين الجيش جدا

انا متفق مع حضرتك على معظم اللى انت قلته فيما عدا موضوع التظاهر كل جمعه

التظاهر كل جمعه بيستنزف مجهود من الجيش لتامين المظاهرات وحضرتك شوفت اللى حصل الاسبوع اللى فاتت نتيجه دخول بعض البلطجيه ومحاولتهم الايقاع بين الشعب والجيش وبرده بالطريقه دى بنزودلهم الفرصه اكتر انهم يعملوا كده ,

تانى حاجه اكيد المظاهرات يوم الجمعه تاثيرها اقل من اي يوم تانى بس ليها تاثير سلبى مباشر لاى مستثمر خارجى او سياحى بيفكروا يزوروا البلد على الرغم من جمالها وروعتها وتفردها بس الناس اللى برده ممكن ماتفهمش كده وتخاف اكتر من القدوم الى مصر

ان شايف مافيش مانع من عمل مظاهرات كل فتره لتذكير الجيش بالمطالب يعنى مثلا كل اسبوعين او ثلاث اسابيع اول شهرين من الثوره وبعدين تبقى مره كل شهر للحفاظ على نسق وزخم الثوره كده يبقى اصطدنا شله عصافير بحجر واحد

1- شلنا الضغط الرهيب من على الجيش سواء لتامين المظاهرات او لدراسه المطالب والاستجابه ليها ,

2-حسنا صوره البلد امام دول العالم وبينا ان مافيش قلق ولا حاجه واللى بيحصل ده مظاهرات سلميه لا تؤثر على امن البلد

3- اهم عصفور بقى اللى فرصه عاوزين يوقعوا الجيش مع الشعب الفرصه بتقل مع بعد التظاهرات عن بعضها و استمرار الجيش فى تحقيق المطالب .

أيوة!! لية الشرطة مش موجودة و مش شايفة شغلها .... وزير الداخلية أعد بيعمل أيه لحد دلوقتى!! يا دوب غير الشعار ..كتر الف خيره بس أحنا عايزين أفعال مش شعارات!!! و بعدين مش ثوار التحرير هما السبب فى زعزعة الأستقرار. مش هما اللى أطلقوا سراح البلطجية!!! دول الشرطة و امن الدولة ... ما ظنيش أن فى خلاف فى كدا .. من حق كل واحد ان يطالب بحقه !! و أكرر أن مظاهرات كل يوم جمعة مش السبب فى وجود البلطجية.. و أخيرا أحب أقول أن فى أشاعات كتير أوى . أنا فتاة جامعية و بروح و أجى عادى ... الدنيا مش واقفة زى ما حضرتك فاكرة..

ردي:

شيلو النقطة من راجل، قولو شفيق يا راحل.
أمن الدولة يا أمن الدولة، بعتو الأمن وبعتو الدولة.