المشاركة الأصلية كتبت بواسطة mahmoud saloum
انت متأكد إنه سؤال بريئ؟ أنا عايز أعرف يعنى ايه ثورة مضادة؟ دلوقتى الثورة طالبت ان مبارك يرحل ورحل وطالبت الثورة بحل المجلسين والمجلسين اتحلوا وطالبت الثورة بتغيير وزراء حكومة نظيف والغالبية العظمى اتغيرت. والثورة طالبت فى بدايتها ان الجيش يترك الحكم فى خلال 6 شهور والجيش متمسك بكده. والثورة فى بدايتها طالبت بتعديل مواد الدستور 76و77و88 والتعديلات شملت مواد أكثر. و طالبت الثورة بمحاكمة المسئولين عن دم الشهداء ومحاكمة سارقى اموال الدولة وكلهم حاليا تحت التحقيق لدرجة ان رئيس الدولة السابق وعائلته تم منع سفرهم والتحفظ على أموالهم وده تمهيد لفحص الشكاوى ضدهم وطالبت الثورة بحرية الاعلام فتم الغاء وزارة الاعلام.
لما كل ده يتحقق والناس تقول عايزين استقرار ويرفضوا التمادى فى الاعتصامات وحالة عدم الاستقرار يبقى دول ضمن الثورة المضادة. مهو مش كل يوم تطلع شوية طلبات ويتعمل اعتصام ومظاهرات عليهم ولما يتنفذوا يطلع غيرهم وبعد ماكانت المطالب لمصلحة البلد ومصلحة الشعب بقت المطالب لصالح البرادعى مرة والاخوان مرة وشباب عايز يوجد لنفسه مكان مرموق فى الحياة السياسية مرة وكل مجموعة تقعد تخترع شوية طلبات والبلد عمالة تخرب ولما الناس تقول لا احنا مش موافقين على كده نقوم نقول ثورة مضادة.