بصفتى مهندس فى وزارة الرى
معلش إسمحولى انى أحكى حكاية بسيطة خالص علشان تعرفوه ان دول افرقيا بتقدرنا ليه ألا من خلال رجل واحد بس.
من حوالى 4 سنين كنت فى كينيا وكان فى مكان زى ساحة كبيرة وهوا دا السوق بتاعهم .. وكان معايا زميلة من هولندا وكان السوق دا فيه التماثيل الخشبية المنحوتة على شكل فيل وغزالة والكلام دا.. فا زميلتى قالتالى انا عايزة واحد من التماثيل دى.. فا رحلنا لواحد سنه لا يتجاوز ال 30 سنة وبساله دى بكام .؟ قالى ب 10 دولار.. وطبعآ علشان البت الهولندية زى اللوز وشمعة منورة وانا قمحى زى كل المصريين فا طبعآ من المستبعد انه يقبل الفصال معاها... ومن فضلكم ركزوا شوية فى الجزء اللى جاى.
قلتله انا مصرى وإحنا جيران فى حوض النيل.. ولسة هكمل كلامى قالى استنة من فضلك وراح مطلعلى عملة ورقية من جيبه لبلده.. وقالى انتا شايف صورة مين اللى على العملة دى.. قلتله لأ.. قالى دا لمومبا.. (لمومبا كان قائد ثورة عندهم وجمال عبد الناصر ساعده علشان استقلال كينيا).. وشاورلى بإيده ان لمومبا وعبد الناصر إخوات وعلشان انتا من مصر التمثال ليك انتا ب 3 دولار...
ملحوظة... جمال عبد الناصر مات منذ ما يزيد عن 35 او 40 سنة.. والبائع لا يتعدى ال 30 سنة.. اللى أقصده انه فى بلده علموه ان مصر هى عبد الناصر اللى ساعدهم بجد.
فا أرجوا إننا نرجعلهم النظرة دى تانى مش مجرد انى اروح هناك واعملهم كوبرى على ترعة وابطنلهم ترعة تانية واشيل منها ورد النيل وخلاص.
المساعدة هية... تعليم.. المساعدة على التنمية المستدامة... بناء حضارة حقيقية لا تقوم على مبدأ الأقوى بل على الأخوة والتفاهم (الله يرحمك يا عبد الناصر)
أرجو إن وجهة نظرى تكون وصلتلكم
المفضلات