السلام عليكم
لو تسمحو نتكلم فى الموضوع دة بشوية استفاضة وبما انعم الله على من خبرة لاكثر من 20 سنة
السؤال هنا
ماكنة خفيفة اية الحل الامثل
المعطيات
قطع غيار فى السوق معظمها مضروب
صنايعية معندهمش ضمير واللى عندة ضمير مهمل واللى مش مهمل غبى واللى مش غبى عندة مساعد همة انة يخلص يومة وخلاص وعادة ما بيفوت اى مسمار يقع فى ايدة سوا وهو بيحل او وهو بيربط
ماكينات خراطة الكرنك ووش السلندر متهالكة ونفس الكلام عن الصنايعية
وقت الفك وتركيب الموتور وبهدلة ما بين شراء قطع غيار ووقفة عند الخراط والميكانيكى وتليين الموتور بضمير اللى محدش هايقدر يلينية صح غير صاحب العربية لانة هو اللى دافع دم قلبة
الحالة العامة لموتورك من مارش ودينامو وتروس واسبراتير وجميع الاجزاء الميكانيكية
الحل لو اتحلت كل المشاكل السابقة من صنيعيى شاطر وعندة ضمير الى قطع غيار اصلية الى خرط جيد ونسب خلوص مظبوطة بالميكرون وفك وتركيب بضمير وتليين على البارد بدون استعجال العمرة افضل 100 مرة من موتور استيراد
ولكن دة حلم انك تحققة
على الجانب الاخر دلوقتى سعر المواتير الاستيراد مغرى تحس انه نفس تمن العمرة دى واحد
اتنين الفك والتركيب يوم واحد
ثلاتة ما فيش تليين
اربعة اما انك بتبيع الموتور القديم بتاعك وتستفاد بفلوسة او انك بتاخد منة قطع غيار للموتور الاستيراد
يبقى الكلام كدة راح على شراء موتور استيراد
بس فى حالات الموتور اللى راكب مش محتاج يتعملة عمرة كاملة دا يادوب طقم شنبر والكلام دة بنسمعة من الميكانيكية بس عمليا ونظريا كمان دة كلام غلط ونقول لية
الشنبر اللى خلاص بقى يسرب زيت ومش قافل خلوص البستم كويس لازم يكون عمل تاكل فى الشمايز صحيح انت لو عملت طقم شنبر مش هايكون فية بخرة زرقة من الشكمان وتحس ان الموتور بقى كويس بس دة لمدة اد اية لو ان حظك حلو ومشيك هادى ومش بتشد انا بقول سنة على الاكثر لو الصيف اللى جاى كان رحيم بينا اما لو ان طريقة سواقتك رياضية مش هايستمر نهائي يبقى انا جبت وجع القلب لنفسي لان محدش بيقدر يتحكم فى نفسة وكمان فى مواقف بتجبرك انك تشد شوية لو بتعدى من عربية وخلافة
كمان فى حاجة مهمة جدا ....لو عملنا طقم شنبر وكان البستم والشميز كويسين يبقى هنا انا حكمت الجزء العلوى كويس جدا وسبت الكرنك والقواعد بتعتة معملتش فيهم حاجة
عارفين دة يعمل اية .....دة يعجل بتاكل سريع وحاد لسبايك الكرنك نظرا لقوة كبس المحرك واهمال احكام الجزاء المتحركة السفلية
يبقى كدة على اقصى تقدير الموتور كولة هايحتاج يتفك فى خلال سنة ويتعملة عمرة كاملة
اممممممم يبقى هنا رجعنا اننا فى كل الحالات هانعمل عمرة للموتور نشوف بقى كام واحد عمل عمرة كاملة ونجحت مية فى المية وكام واحد اشترى موتور استيراد وطلع كويس بنسبة مية فى المية
هاتختصر عليكم الموضوع لانى بسال كتير اوى فى الموضوع دة وعن تجارب شخصية الاستيراد افضل وخصوصا انة علية ضمان شهر
اسف للاطالة
المفضلات