فعلا ...... لو كان الجيش متواطئ لكان ضربك بالطيارات زي ليبيا ..... ولا حضرتك مشفتش ليبيا بيحصل فيها ايه
عرض للطباعة
فعلا ...... لو كان الجيش متواطئ لكان ضربك بالطيارات زي ليبيا ..... ولا حضرتك مشفتش ليبيا بيحصل فيها ايه
جزيل الشكر للسادة إللى قاموا بردود محترمة و بناءة أقدرها كثيرا....
أحب أوضح بس نقطة صغيرة علشان ماحدش يقولنى كلام لم أقله أبدا...
فرق كبير بين الجيش كمؤسسة وطنية..و بين قائد المؤسسة إللى كلنا عارفين مين اختاره شخصيا و كمان اتضح إنه حق قانونى و متأكدين إن اختياره و الإبقاء عليه فى مثل هذا المنصب أقل بقليل من 20 سنة ليس دلالة على كفاءته الفذة وحدها...
بلاش نغمض عيننا.....كلنا حاسين بالتباطؤ الغير طبيعى فى تحقيق المطالب...
و لم تهدر الدماء من أجل الإطاحة بشخص أو عائلة...
مبارك تنحى رسميا من أسبوعين و شرعيته سقطت من أكثر من شهر
فى خلال الأسبوعين دول....ماذا حدث ؟
الكثير من التقاعس.....خصوصا إن المطالب بعضها لا يستلزم كل هذا الوقت
محتاجة وقت قد إيه إطلاق سراح المعتقلين السياسييين ؟
هل كان فعلا ضرورى الإبقاء على شفيق كل هذا الوقت..أم أن مصر كانت على موعد مع مظاهرة مليونية بعد يومين أهم أولوياتها إسقاط حكومة شفيق..و هو موقف لا يفيد الشعب و لا الجيش
إللى خلانى أتوجه بالنقد للمشير ليس فقط انتماءه للنظام السابق و أرجو إن الجميع يتفهم ذلك...دى أحد الأسباب و ليست حتى بالسبب الرئيسى أبدا..
التقاعس و التباطؤ و عدم الشفافية و الوضوح مع الناس فى مرحلة الكل بيعانى فيها سواءا كان غنى أو فقير..كبير و لا صغير.....الوضع لا يتحمل التعامل مع الأمور بنفس أسلوب المراوغة اللى كان متبع فى السابق
على سبيل المثال فى الأمور المثيرة للدهشة... فى لقاء OnTv ..نجيب ساويرس بيقول ...حبيب العادلى..بيتحاكم علشان 4 مليون جنيه...!!!
طبعا كلنا فاهمين نجيب ساويرس يقصد إيه؟؟؟....يقصد إن مش ده المبلغ إللى يتحاكم عليه وزير الداخلية من أساسه....و بعدين الراجل عليه اتهامات خطيرة فى أساسها أمنى بحت و لم يلتفت أحد أبدا لأى فساد مالى....
الشعب مش عيل صغير علشان نطلع عليه بخبر اعتقال و سجن لحبيب العادلى و بعدين نلاقى الاتهامات محل المحاكمة القادمة إن شاء الله 4 مليون جنيه....
نفس السياسة المتباطئة فى الإفراج عن المعتقلين السياسيين....
و كمان فى ترقيع الدستور ( مع إعترافى بوجود اختلاف فى وجهات النظر و الأمر يستحق وقفة للمناقشة )
ملف عودة الأمن و المرتبط بمحاكمات حازمة و علنية للمتسببين فى الانفلات الأمنى سواءا كانوا عسكريين بالشرطة أو مدنيين من أعضاء الحزب أو غير أعضاء الحزب
تحس كده بشكل عام إن الأمور متسابة عايمة....حسنى مبارك فى شرم الشيخ...لأ ده فى تبوك...لأ ده اتمنع من السفر بعد ما سافر...لأ ده اتمنع و اتلحق قبل الطيارة ما تطير....إيه هى الشغلانة دى.....
و كمان آخر قصة بتاعة الجهاز المركزى للمحاسبات...مش فاهم أنا إيه يعنى إللى بيحصل ده...جهاز زى ده...فى وقت زى ده..مش عارفين يأمنوه مظبوط....ما احنا مستخملين السيابان فى الشارع...مش علشان آخرتها ألاقى الجهاز المركزى للمحاسبات فيه حريقة فى غرفة مجاورة لغرفة الكهرباء....
ده مبنى واحد ...تأمينه مش معجزة....و بعدين يعنى احنا جيشنا مش أعداده قليلة لدرجة إننا نعانى فى نقص عدد الرجال و نسيب مكان زى ده يتقفل لدواعى أمنية.....
أنا عايز حد يقنعنى إن تعليق العمل فى الجهاز شىء فيه أى فائدة للشعب..!!!......كلناعارفين مين مستفيد من احتراقه أو ضياع الأدلة أو حتى تعليق العمل به....
أؤكد مرة أخرى على إنى مش بألقى بالاتهامات بالفساد على شخص المشير....لكن بصفته الرجل المسؤول الأوحد عن مصر مدنيا و عسكريا الآن..فأنا بأتوجه إليه بالاعتراض على كل ما سبق و أن تحدثت عنه
الأخوة إللى بيقولوا مش وقته الحديث عن الفساد فى الجيش :-
أنا أعلم تمام العلم إنه لا يحق لأى سلطة مدنية القيام بأى نوع من التحقيقات فى داخل المؤسسة العسكرية...و أؤيد ذلك...و كمان أنا لم أقل " الآن هو وقت مناسب لفتح مثل تلك التحقيقات "...
لكن يبدو أنه عاجلا أم آجلا سوف نقع جميعا فى مأزق لو استمر الحال كما هو عليه....
أتمنى ألف مرة.....ألا يستمر الحال على ما هو عليه
مقارنه غريبه جدا بصراحه اللى انت بتقولها
وحضرتك شايف ايه فى الموضوع ده ان شاء الله
نحول المجلس العسكرى ووزير الدفاع للنائب العام علشان يحقق فى قضايا فساد وهى اكيد موجوده فعلا ونسيب البلد تخرب من غير رابط ولاحاكم يسيطر عليها علشان نقول احنا قضينا على الفساد فعلا
فعلا البلد دية فى ناس عاوزه توديها فى داهيه وبتدور على اى خرم ابره تدخل منه علشان نرجع نترحم على ايام مبارك ونقول ماكنا كويسين يظهر ان احنا حنبقى عراق تانيه طالما فيه ناس بتفكر بالتفكير ده
مش حرد عليك عشان انت مفهمتش المعنى من كلامى
وعلى فكره هو مش تشبيه غريب ولا حاجه ده التشبيه السليم
ومش حضرتك الى تقول لحد متسألش السؤال ده تانى لعضو من حقه يسأل ويستفسر
طنطاوي هو في مقام رئيس الجمهورية
مع الحكومة الجديدة طنطاوي هيعين وزير دفاع جديد غالبا سامي عنان
ومن الممكن ان يحتفظ لنفسه بحقيبة الدفاع
لكن ساعتها هيقسم اليمين قدام مين ؟ قدام نفسه ؟!!!
مصر تولد من جديد ولادة طبيعيه بمباركة الله سبحانه و تعالى على يد الشعب المصرى الشريف اثناء الولادة فيه صويت و صراج و الام و ده اللى كلنا شايفينه ، فى ناس عايزة تموت الطفل ده اثناء الولاده مين هما
1- أركان النظام الفاسد (صفوت،عزمى،.....)
2- أعضاء الحزب الغير وطنى
3- امن الدوله المتورط فى كل انواع الجرائم اللى ممكن تتخيلوها
4- المتلونين المنافقين (رؤساء الصحف القوميه,........)
5- رجال الاعمال المتورطين فى الفساد
6- كل الدول اللى عارفه ان الديمقراطيه الحقيقيه هتطيح بمصالحهم الغير مشروعه مصالح اقتصاديه و سياسيه
أنا اسف جدا..انا قصدي أرد علي صاحب التعليق smartchoice
بس اتلخبط و دوست علي مشاركتك و انا باعمل الاقتباس
حقك عليا
ده غير إن مافيش حد لا طالب و لا اقترح تحويل المجلس العسكرى للنائب العام من أساسه
و لم أسمع قط عن أى تدخلات مدنية فى النظام العسكرى لا فى خير و لا فى شر.لا قبل 25 يناير و لا بعده
دى ضريبة حرية الرأى...على الجميع السماح للرأى الآخر و الأسلوب الآخرحتى لو لم نكون راضيين عنه