الموضوع: مقارنة بين الموديلين للسيريون الأوتوماتيك

المشاركة الأصلية كتبت بواسطة AboRoqaiaa

السلام عليكم يا شباب
انا طبعاً عرفت إن السيريون الأوتوماتيك اللي سعرها 82 ألف مش بتيجي ومعاها الكاسيت الأصلي
وان التوكيل حاطط كاسيت سوني مكانه
وناس كتير اشتكت انه سايب فراغات وانه بيبوظ شكل التابلوه
مش ممكن حد يورينا صورة للتابلوه بالكاسيت ده
انا طبعاً شفت الأصلي الخرافة على موقع دايهاتسو بس كنت محتاج أشوف غير الأصلي

حاجة أخيرة
كنا اتناقشنا قبل كدة في إن الأوبشنز الزيادة في موديل الأوتوماتيك تستاهل أكتر من الفرق بكتير
سؤال من واحد مبتدئ سواقة زي حالاتي
هو ال Abs وال Ebd بيعملوا فروق كبيرة في السواقة هاتكون محسوسة لمبتدئ زيي
ولا لو الفلوس كانت معجزة معايا شوية ممكن أستغنى عنهم وأجيب الموديل الأوتوماتيك الأقل ومش هايكون فيه فرق في أداء العربية

صباح الخير يا ابو رقية

مبدئيا بالنسبة للموديل ال GL ده بينزل براديو سىدى سونى, مبقاش راديو كاسيت, و ده بيشغل mp3 مش audio زى الاصلى بتاع العربية

حاول تشوفه بعينك, علشان يساعدك اكتر على القرار

بالنسبة للفروق اللى بين الموديل ال GL & GLX:
الجنوط السبور
ال ABS & EBD
مقابض بلون السيارة
سبويلر خلفى
راديو سىدى مدمج فى التابلوه (الاصلى بتاعها)
مسند يد بين الكراسى الامامية

مفيش شك وجود انظمة زى ال ABS & EBD بيزود الامان فى العربية, لكن ده له استخدامات لأوقات معينة و اهمها فى وجود المطر (مياه على الارض), فبتمنع كلبشة العجل

لكن الاخوة اللى معاهم العربية سواء ال GL او ال XL بيشكروا جدا فى الفرامل, فالفرق مش هتحسه غير فى وقت معين

و الفرق ال 5 الاف بين الموديلين بتاخد بيه حاجات كتير مش بس ال ABS & EBD

استخير ربنا, و ربنا يختار لك الخير, علشان مش كل يوم الواحد بيجيب عربية

زي ما معاذ قال طبعا بالظبط

الفروق :
1- Abs , Ebd
2- السي دي المدمج الأصلي وعلى فكره هو نوعه كلاريون لأني شوفته من الخلف
3- الأسبويلر الخلفي
4- الجنوط ودي لوحدها تباع بــ 3 الاف جنيه لوحدها
5- مقابض الباب بلون السيارة
6- مسند الذراعين بين الكرسيين الأماميين وده يباع لوحده بــ 450 جنيه


ولكن نصيحة مني لا تفوت هذه الكماليات مقابل 5 الاف جنيه
يعني لو مش هتزنق نفسك

معاذ وأبو عبد الله
جزاكما الله خيراً
أهو الواحد قدامه وقت لغاية ما يختار
يفكر على مهله بقى

صدقتنى ال ABS ممكن متعرفش قيمتة دلوقتى و تعرف قيمتة قدام لأنهة بجد عامل مهم جدا من عوامل الأمان و دية بيبقى مفيد جدا فى الأوقات الممطرة او الأرض الى عليها رملة او اى ارض مزحلقة لو معندكش ABS و فرملت و جيت تحود العربية مش حتحود خالص و حتفضل مكملة قدام تزحف و لكن لو عندك ABS و فرملت و لفيت الدريكسيون العربية حتلف معاك و دة ممكن لا قدر الله ينقزك من حادثة لا قدر الله

و انا فى رأى اى حد بيشترى عربية جديدة ياريت يهتم بموضوع ال Airbags و ال ABS

ABS , EBD شوفوهم هنا

http://ca.youtube.com/watch?v=LoJ3hVyVifc


الجنوط الاسبور شكل بس ووزن اخف من العادي

المشاركة الأصلية كتبت بواسطة OlaOsman

طيب معلش، سؤال من حد أكثر ابتداء من ابو رقية :o

1- هو ال ABS و ال EBD الاتنين أنظمة فرامل؟
2- ايه فايدة الجنوط و السبويلر؟
3- هل ال Aribags موجودة في الGLX بس برضه؟

بصي يا علا

الــ ABS هو نظامر فرامل بيعمل على الضغط التيل وبالتالي على طنابير العجل بطريقة سريعه جدا في خلال الثانيه الواحده بحيث ان العجل يتوقف في اقل وقت ممكن وده احسن من ان الضغط على الطنابير يكون بطريقه مستمره فبيحصل عدم تماسك جيد بين التيل والطنابير

اما نظام الــ EBD بيمنع زحلقة العجل على الرمال او الماء او الأسفلت
لأن انت عارفه لما العربيه بتفرمل فجأة والأسفلت سخن او في ميه او رمل
العربية بتتزحلق مما يؤدي الي كبر المساحة اللي هتقف فيها العربيه مع اصطدامها بقوة لما ينتج من قوة اندفاع كبيرة جدا عن الزحلقة

وده بيحصل ان دواسة الفرامل بتنسحب من تحت الرجل او بتفصل بدرجه لا تخلي الفرامل تسيب او تخليها تمسك جامد بحيث ان العربيه بتقف بدون اي زحلقة وفي اقل مسافة ممكن ان تقف فيها العربيه تناسبا مع السرعه اللي انت عليها

وده بيبقى توزيع على العجل
يعني ممكن عجلة تزحلق والتانيه لأ
يعني بيبقى حسب كل عجله على حدا وده بيخلي العربيه مع السرعات العاليه والفرامل المفاجأة لا يجعلها تلف حوالين نفسها مما يمنع مسألة ان العربيه تمووج في الطريق او تنحرف مع ضغط الفرامل

مع امكانية ان النظام ده بيخلي العربيه مع ضغط الفرامل انك تستطيعي ان تحركي الدركسيون يمينا او يسارا مع ضغطك الفرامل

نيجي للجنوط

هيا الجنوط بتبقى استايل للعربيه مع ثبات اعلى شويه
مع عدم الأهتمام بقه بطاسات ولا اي حاجه ولا اتسرقت ولا اتفكت ولا اتكسرت

اما الأير باجز موجوده في كل الموديلات

ابو عبدالله المشكله مش في المسك في الطنابير و التيل

المشكله في القصور الذاتي بتاع العربيه لما العجل بيعمل Block بتلاقي العربيه كملت طريقها
و اي انحراف في المقود حتلاقي حركه العربيه اختلت تماما و بقت مش تحت السيطره

بالabs بكل سهوله حتحرك المقود و انا دايس علي الفرامل :)
لأن العجل في لحظات بيكون حر و في لحظات بيكون ممسوك زي ما في الفيديو :)