الموضوع: ارجو الافادة فى شراء سيارة

اية وجة المقارنة بين الياباني والكوري ؟؟؟؟

الكوري يطلق علية الصنايعية الفيات الجديد , لأنة بديل ال 28 وال 31 والكلام الي انتهى دة

بالنسبة لالنسر فطبعا دي ياباني وأغلى منها وفرق السعر يوضح

انا بجاوبك عشان انا كنت في نفس حيرتك من سنة بالظبط واشتريت طبعا الانسر وكنت محتار معاهم في الأسكودا فيليشيا كمان ........عيوب الاسكودا فيليشا كتيرة ومش مجال الكلام

نرجع للانسر الصفية ...........

شكل ممتاز جدا

قطع غيار متوفرة بكثرة جديد واستيراد ورخيصة أشارة امامي 35 جنية الكشاف الاماي متوفر لة وش زجاج وليس الفانوس بالكامل بالعافية وطبعا الاتنين موجودين , سير الكاتينة ايطالي ب 65 جنية , بلية الكاتينة 65 جنية الياباني , وخد بالك من حاجة مهمة أوي ان فية قاعدة معروفة أوي اسمها تكييف الياباني لا يعلى علية .....أستنتج الباقي ..........انا عربيتي بشحن تكييفها الاصلي ......استنتج اباقي

شبكة امامية نيكل 110 جنية

الاحلى من كدة ان معظم قطع غيار الهيونداي تركب عليها لو حبيت زي فلتر الزيت او جوان غطا تاكيهات !!

ثبات على السرعات العالية طبعا ممتاز جدا

نعومة قيادة و طول روح الموتور ممتاز

قوة صاج العربية بأكملها لا يقارن طبعا بالورق الكوري والي يقولك غير كدة حط رجليك فعنية

عندك العجل الخلفي على بليتين مش بلية واحدة طبعا نعومة أكتر وقلة تحميل على بلية واحدة

الكاربيراتير عشان يكون عندك فكرة بيستم او ما يسمى بهاف أنجكشن مش أي حد بيعجن فية.........سهل اوي تتحكم في دخول كمية البنزين للبساتم عن طريق مسمار بتلفة بمفك !! مش فك كاربيراتير وتغيير بيكات والهباب دة..والكاربيراتير بتاعها مفيش اي داعي لفكة اساسا

الاسبراتير الكتروني

عدم وجود رشاشات على البوجيهات بدل الكاربيراتير مع وجود الكاربيراتير بيستم حايوفرلك مشاكل كتيرة اوي اوي اوي

والمشكلة دي في الدايو ..........الرشاشات مرة سيلت مرة اتكتمت مرة هببت وغير يا باشا رشاشات وعيش ...

تاكيهات الماكينة شواكيش زي بتاعت البيجو مش أطباق



العربية الي معايا مواصفات خليجي ودي احسن حاجة لمصر احسن من الاوروبي عشان التكييف , والريداتير اكبر والتبريد احسن ...وطبعا الصيف في مصر بأى كارثة

تيل الفرامل عندك الجديد وعندك الملي الشعبي كلة ماشي

خزن الرفامل جديد او تغيرلها جلد كلة ماشي

بتزود انت بعض حاجات عليها زي لباد غطا الكبوت مهم اوي عشان دهان الغطا مايشققش و يكتم صوت الماكنة

اي كلام تاني على اللباد كلام فاضي سيبك منة ..........عشان حاتسمع هنا عالم جامدة بيحطو اللباد ورا التبلوة وتحت الدواسات وواضح انها عربيات ملعوب فيها اساسا
عشان انا عربيتي فيها لباد فابريكة تحت الدواسات و عزل حراري في الصدر من الداخل كلة شغل فابريكة ولونة بلون العربية على فكرة رصاصي مش اللباد المصري المنتن دة .....

عربية بتاعتنا الي اما تعوز تصلحها حتصلحها

انا حاليا بصدد تجربة وربنا يسهل وتمشي ..........حروح أخرط المساعدين الامامي ولو لأيت ليهم أولسيهات على مقاسهم تبأى كدة فل الفل .........الحركة دي بتاعت مساعدين البيجو بدل ما تغيرهم بتجيبلهم حشو و زيت مابيعدوش خمسين جنية والمساعدين ترجع جديدة...رغم ان العفشجي قالي مش حتلاقي اولسيهات على مقاسهم بس انا بردو رخم وحجرب مش حخسر حاجة

فطبعا انا راكب صفية 91 ودة تقرير مفصل عنها ولو انت محتاج حاجة فيها بلغني وممكن اديلك رقم تليفوني معنديش مانع الناس للناس بردو

بالمناسبة عشان محدش يفكر ان انا بشكر فيها عشان معايا ..........انا زكرت بالفعل مقارنات واضحة واحب اعرفك ان انا بركب عربيات من 16 سنة والحمد لله

ركبت الفيات 28 و 31 و 32 و ارجنتا كمان و 24 و 27
بيجو 504 بألوانة و 505 الي احتفظت بيها وطبعا دي عربية على جمب
ماذدا 626
لادا
تويوتا كوروسيدا
ميتسوبيشي جالانت 83 دفع خلفي
والانسر الصفية الي معايا حاليا طبعا