كتير بشوف السواقين المحترفين بيرجعوا مارشيدير من غير ما يبصوا ورا فقط بالنظر فى المرايات اليمين والشمال....حاولت اعملها كتير لكن تقدير المسافات مكنش مظبوط مفيش طريقة سهلة لكدة....وكمان ازاى نظبط مراية العربية اليمين.....وشكراااااااااااا ااا
عرض للطباعة
كتير بشوف السواقين المحترفين بيرجعوا مارشيدير من غير ما يبصوا ورا فقط بالنظر فى المرايات اليمين والشمال....حاولت اعملها كتير لكن تقدير المسافات مكنش مظبوط مفيش طريقة سهلة لكدة....وكمان ازاى نظبط مراية العربية اليمين.....وشكراااااااااااا ااا
هما مش محترفين على فكرة ولا حاجة
كل الفكرة ان دي ناس اتعلمت اصول السواقة صح مش اكتر ولا اقل انما احتراف السواقة دا مرحلة مختلفة تماما
انا عن نفسي برجع بمراياتي عادي جدا
كل الفكرة انك بتكون باصص على المرايات وراجع بالراحة
انت بتتكلم على الابعاد دي هتاخد معاك وقت على ما تظبطها بنفسك
بس لو انت بتسوق بمراياتك الجانبية صح يبقا هتقدر ترجع بيها بكل سهولة
اما ظبط المرايا اليمين مش هعرف اشرحهالك
كل اللي اقدر اقلهولك ان محدش بيعرف يظبطهالي غيري يعني انا اللي بظبطها لنفسي ومحدش بيعرف يظبطها صح من اللي بيعدوا جنبي
ازاي معرفش !
بص انا اتعلمت السواقة برة مصر واللي علمني قالي انه المرايات المفروض تكون زبطتها الصح تكون مثلا المراية الشمال بتاعتك شايف بيها ديل العربية من ورى كويس جدا واخرة فين وانتا تبقى عارف فين حدود عربيتك من ورا وتبقى فتح المراية لبرى عشان تكون كاشف الشارع كلو عشان لو ها تاخد غرزة تبقى شايف كل اللي جنبك ما عدا الـ blind side والمراية اليمين نفس القصة يبقى الطرف الداخلي ليها شايف الديل وهكذا وممكن تعمل زي ما انا عملت في الأول خالص عشان مكنتش عارف احفظ ابعادها حنة خلة سنان صغيرة وعلق عليها شريطة حمرا صغيرة وانتا بتركن بضرهك ها تبقى عارف من المراية الشريطة بقت فين بالنسبة للحيطة :D :D :D
مع التعود
يعنى تعالى فى حتة فاضية كدة حط حبة اقماع او كراتين فاضية وحاول ترجع بضهرك من بينهم على المرايات
واتدرب فترة وهتيجى مع الممارسة
شكرا ليكم جميعا يا شباب بس الاستاذ سيد لو تكرم يشرحلى فكرة خلة الاسنان دى بتوضيح اكتر لانى مش فاهمها؟؟؟؟؟ والف شكر
بسيطة جدا وتحت امر حضرتك
ادي الصورة اللي بتوضح انا اقصد ايه ..
http://i94.photobucket.com/albums/l108/sayed911/ec.jpg
اعتبر انه العربية دي احنا باصينلها من فوق
وانه العلامات الحمرا دي ها تكون العيدا الخشبية اللي ها تتركب على السيارة (وقت التمرين فقط) عشان متعورش الناس وتركب فيها شريطة حمراء عشان تكون عارف فين نهاية العود ويستحسن بدال العيدان تخليك مع عصيان الأكل الصينية الخشبية وتركن على الأقل بالطريقة دي ها يبقى عندك سنسور صناعة يدوي لتفادي حك بدن السيارة من الخلف في الحائط وتبقى شايف الشريطة فاضلها قد ايه لحد ما تحفظ ابعاد السيارة بشكل افضل ..
بس سؤال بس يا رجالة
هو على أساس ايه المحترفيين بيرجعوا بالمرايات ؟؟؟؟؟؟؟؟؟؟؟؟؟؟
أصل ان عائلتى اتعلموا بره و خدوا الرخص من برة و تطليع الرخص برة صعب جدا و علموهم يلفوا وشهم و هما بيرجعوا
من وجهة نظرى الاسهل انك تبوص فى المرايات علشان ساعتها بتكون شايف بوز العربية من الامام و دهرها يمين و شمال
و بالنسبة لموضوع ظبط المرايات ده خلى جانب المراية الى من ناحية العربية جايبلك اخر حتة فى ظهر العربية و باقى المراية جايبلك الشارع (سواء كانت الشمال او اليمين) علشان تشوف كل الى وراك قبل متغي اتجاهك او تعدى عربية
انا رايى ان الرجوع بالمرايه مش احتراف بالمعنى دى حركة حلوة ومختلفة بس ........... ورايى ان ترجع وانت باصص ورا بالطريقة العادية اأمن وافضل بكتير لانك بنبقى شايف اللى انت مش شايفه بالمرايه لان المراية عمرها ما هتجيب كله وبالذات اللى ورا العربية ........وصدقنى بلوبيف مى انا عملت حادثة قبل كدة بسبب الحركة دى كلفتنى الف جنية .......
وبالنسبة للمراية كل شيخ ليه طريقة ومفيش نموذج تمشى عليه ..شوف اللى يريحك وانت سايق وويخلى عنيك لما تيجى علىالمراية تبقى مستريحة مش عارف ازاى بس انا بعمل كدة
practice makes perfect
MMamdouh
الخلاصة المفيدةاقتباس:
practice makes perfect
MMamdouh
انا لما اتعملت اتعملت علي نص نقل يعني كده كده مينفعش ابص ورا ووالدي علمني كله علي المرايات والمرور الغبي اللي كنت بطلع الرخصه منه كان ممنوع بتص ورا لازم ترجع علي المرايات وبالتالي اتعودت علي كده
ومش بعرف اصلا اص ورا وانا راجع بضهري ولو عملت كده بخبط وش العربيه
الموضوع كله تعود و ممارسه انا عن نفسي لما برجع ورا مينفعش معايا المرايات بلف راسي و اريح نفسي
بص حضرتك, أهم حاجه إنك ما تستعجلش . لازم تاخد راجتك أوي و انت بترجع و تدوس بنزين سنه سنه مش بأستمرار لأنه مع رجوعك للخلف مكانك بيتغيير عشان كده هاتحتاج تبص في المرايات كل شويه فأنت ترجع حته و تبص في المرايا أنت محتاج أيه يعني مثلا محتاج تكسر يمين و لا تكسر شمال سنه و لا ترجع زي ما نت.
و نصيحه عمرك ما تخلي أي حد يقف ورا و يقعد يقولك أرجع أرجع يا باشا, أنت بص على مكانك و مسافتك و قدر المسافه و لو مش عارف تقدر انزل من العربيه و بص وراك وشوف المسافه حسبة كم سنتي أو كم متر و حاول ترجعهم بالعربيه صح.
و على فكره أوعى تتوتر لا وأنت بترجع لورا و لا أنت سايق و أي حد يقولك حاجه مترضش عليه و نفضله.
أهم شيء بقه المرايات تبقى مظبوطه لأنها لو مش متظبته ممكن لا قدر الله تخبط و أنت مش واخد بالك.
المرايات لازم تكون كاشفه الجزء اليمين و الشمال كله من العربيه.
يعني ثلاث تربع المرايه يكون كاشف الشارع و الربع الباقي يكشف الجنب الي فيه المرايا.
أتمنى أكون أفدتك.
انا طبعا الاول كنت بالف بجسمى وابص ورا لكن من سنتين كدة بدون تدريب ولا حاجة لقيتنى بابص فى المرايات وانا بارجع ومن ساعتها دايما باعتمد على المرايات فقط فى الرجوع
ممكن تكون مسالة تعود مع حفظ ابعاد العربية كويس
وعلى فكرة انا لاحظت ان النظر فى المرايات افضل بكتير لانك بنظرة بسيطة بتشوف اللى وراك من كل النواحى يمين وشمال كمان وده لا يتحقق فى حالة لف الجسم لانك صحيح هاتشوف الناحية اليمين كويس قوى لكن مايحدث شمال العربية لن تراه جيدا
لو فى حجر او عيل ورا العربيه مش هاتشوفه بالمرايا
النظر فى المرايات افضل واكثر امانا خصوصا من الناحية الصحية
لانى وبعد طول استخدام لطريقة النظر للخلف اثرت على رقبتى وعضلاتها وبتتسبب فى الم ووجع كبير وبعد ما اتعودت على المرايات قل الالم شوية
انا من اول ما اتعلمت السواقة و انا متعودة على المرايات ، مببصش ورايا ابدا ، و دى على فكرة بتدى تمكن و انت بترجع ورا او و انت بتركن ، ساعات بيبقى فى ركنات ضيقة جدا يعنى تدخل العربية يادوب ، استحالة تعرف تدخلها بوشك ، لازم تدخلها بضهرك عشان تظبط العربية كويس و متخبطش لا من الناحية دى و لا من الناحية دى ، و الحتة دى متجيبهاش غير المرايات ، و طبعا لو بترجع بضهرك مسافة كبيرة فى شارع ضيق و على الجنبين عربيات ( حصلتلى دى ) ، لازم برضو تظبط عربيتك على المرايات لانك لو باصص وراك مش هتظبط معاك اوى ، حاول تعود نفسك عليها و هتلاقيها مع التعود اسهل كتير من البص ورا :biggrin24:
فى حالة الرجوع ورا بسرعة عالية نسبياً مع وسع فى المكان بعتمد على اللف والنظر للخلف ... أما لو كان المكان ضيق فبرجع سنة سنة بالآعتماد على المرايات فقط مع نظرة خاطفة مرة ولا مرتين .
انا وانا برجع للخلف ببص فى المريتين الى فى الجانب مع بصه فى مرايه الصالون علشان لو فى حاجه ورايا على طول اخد بالى بالنسبه لمرايه اليمين انا ظبطها على شنطه العربيه انى ابقى شايف الشنطه والى جنبى
انا شايف انك علشان تعتمد على المرايات لازم تجبر نفسك انك مش تبص للخلف ودا عن طريق انك تضع ستارة مثلا على الزجاج الخلفى وساعتها اجبارى هتبص فى المرايات
اول مباديء انك ترجع بالعربية بالمرايات انك تعتمد على المرايات اثناء القيادة بصورة جيدة جدا
تجرب انك متستغناش عن المرايات كلها
دا اول مبدأ تستعمله في الحكاية دي
الحاجة التانية اللي تساعدك على الرجوع بالمرايات انك تكون ظابط مراياتك صح عشان تديك ابعاد مظبوطة
انا عن نفسي عمري ما بلف ضهري
قلت اجرب مرة زي الناس الطبيعية كنت هلبس بالعربية :d
طبعا الرجاله قاموا بالواجب و زياده
و الموضوع موضوع تعود فعلا
و هقولك علي حركة ممكن تفيدك و هي انك لما تيجي تركن اعوج المرايات الجانبية لتحت شوية بحيث انك يكون المنظر في المرايا شامل جنب العربية كله بالعجله الورانية و بركن الاكصدام الوراني (مش عارف قادر تتخيل معايا و لا لا)
المنظر ده بيساعدك تحضن كويس + انك بتكون شايف زاوية عربيتك بالتقدير كده و ده بيسهل الامر قوي
طبعا كونك تقعد تعوج المرايات و ترجع تعدلهم كل ركنه هي دي المعضله
بس و لله الحمد الموضوع دع اسهل عندي لان المرايات عندي بتعمل كده اوتوماتيك اول ما اجيب مارشدير
و لو عايز السهوله شاشه و كاميره رجوع خلفية و عيش
الرجوع بالمرايات اسهل مش اصعب
مرن نفسك شويه وحتعرف انه اسهل كتير خصوصا فى الاماكن الضيقه
سهله جدآ وهتيجى معاك بالتعود
اضبط المرايا الشمال واليمين بحيث انك تكون شايف جناب العربيه
يعنى تقدر تشوف اوكر الابواب اللى ورا
ده الصح وغير كده غلط × غلط