مشكلة فى السواقة

**zeze_noor** · 06-03-2011 02:38 PM

سلام الله عليكم
طبعا أنا لسه بتعلم السواقة على قدى بروح بالعربية الشغل والحمد لله بس بيحصل مواقف مش حلوه أكبر مشكلة لما العربية بتوقف على أرض مرتفعة ولما الطريق يمشى بلاقى العربية بترجع منى أول ما أشيل رجلى من الفرامل علشان أدوس بنزين الله يكرمكم أيه حل الحكاية ديه علشان تعبتنى بجد واللى يغيظ ألاقى اللى ورايا لازق فى عربيتى

**Ashraf_Ibrahim** · 06-03-2011 02:58 PM

الحل بسيط جدا يا فندم
حضرتك لما تقفي ترفعي فرامل اليد وتشيلي رجلك من على الفرامل خالص
وبعدين لما تحبي تتحركي تدي الاولاني وتشيلي رجلك سنة من على الدبرياج وتدوسي سنة بنزين لحد ما تحسي ان العربية عايزة تتحرك بس مكلبشة بسبب فرامل اليد
ساعتها نزلي فرامل اليد وزودي سنة بنزين وارفعي سنة من على الدبرياج هتلاقي العربية طلعت لقدام من غير ما ترجع سم واحد لورا
او الطريقة التانية كالتالي
انتي واقفة دلوقتي ودايسة فرامل وعايزة تتحركي
بتدي اولاني وترفعي رجلك من على الدبرياج لحد ما تحسي ان العربية خدت عزم للحركة بس واقفة بسبب الفرامل اللي انتي دايساها ساعتها ارفعي رجلك من على الفرامل ودوسي بنزين واتحركي عادي
ايهما تفضليه دا شيء يرجعلك طبعا وتحت امرك دايما

**أبو إياد** · 06-03-2011 03:02 PM

هى محتاجه منك سرعه من وضع الوقوف لتحريك السياره بمعنى ان العربيه لو على مطلع فالطبيعى انك دايسه فرامل وبتدى الغيار الاول وبتبدائى تشيلى رجلك من على الدبرياج وبمجرد لما العربيه تتحرك تشيلى رجلك اليمين من على الفرامل وتدوسى بنزين ودى لازم سرعه وطبعا مش محتاجه لقوه علشان ماتخبطيش اللى ادامك

الحل البديل هو استخدام فرامل اليد

انك تكونى رافعه فرامل اليد وتبدائى تمشى وبمجرد مالعربيه تتحرك تنزلى الفرامل

**Ashraf_Ibrahim** · 06-03-2011 03:17 PM

المشاركة الأصلية كتبت بواسطة sasaasdf

الله ينور يا باشا:b4_388:
بس متهيالى الحل الاول اسهل لان الحل التانى عايز رجل خفيفه اوى على الدبرياج (( عايزه تمكن جامد ))
الحل الاول اسهلك و اريحلك

التدرب على تنفيذ اي حل من الاتنين هيخلي تنفيذ التاني سهل كمان
بس انا بفضل الحل الاولاني عشان اريح رجليا بس مش اكتر لأن عربيتي مانيوال فطبعا رجليك بتستعملهم كتير في الزحمة فاديها فرامل يد عشان نريح شوية