امبارح بليل ماشي في شارع المرغني في إتجاه شارع النزهة وناوي ألف الاتجاه التاني ناحيه بيتي لقيت عربتين واقفين جنب بعض في وضع إستعداد في نص الشارع شكلهم كدة هيعمل دراج كانوا هوندا سيفك وجولف ٢

على ما وصلت ال U-Turn كانوا انطلقوا وأنا سامع صوت العربيات وهي بتقاتل جنب بعض في صراع على الأقوى طبعاً :)

قولت حلو جو الإثارة دة قبل ما الواحد يروح لفيت وشديت وراهم علشان أشوف مين إلي طلع على ما وصلت كوبري المرغني كانت إلمدبحة حصلت والله أعتقد الموضوع مخدش غير ثواني بتاع الهوندا فوجئ بواحد غلبان بدايوو لانوس ماشي ببطء على الكبري والرجل إتلخبط يعدي مين الهوندا ولا الجولف الاتنين أعتقد كانوا على ١٦٠ أو أكتر على ما أخد القرار كان بتاع الهوندا داخل فيه زي المطرقة فعلاً بدون مبالغة لو شفتو اللانوس, العربية إتدمرت من الخلف بشكل شديد جداً وأعتقد انها أصابها تلف في الشاسيه من الخلف
الهوندا علشان واطية جداً فوانيسها سليمة لكن الخبطة جت في الربع الاولاني من الكبوت وطبعاً العفشة قدام ضاعت ومعها الربع الامامي من رادياتور وحلافه كأن في حيطة وقعت على كبوت العربية

كان في اصابات خفيفة في واحدمن ركاب اللانوس علشان أعتقد كان راكب ورا أما الباقين الحمد لله طلعوا سالمين

مش حقولكم، أنا روحت البيت و أنا عمال أفكر في حاجة واحدة بس

القدر بيحصل في لمح البصر ، العربيتين كانوا قدامي وعلى ما لفيت كانت الحادثة حصلت بقيت سايق العربية وعمال أقول يعني أنا مكن في الثانيه أو الدقيقة إلي جاية في لمح البصر أعمل حادثة وممكن أموت فيها الله أعلم
عرفت قد إيه إن احنا مش عاملين حساب اللحظة دي وكأن احنا في أمان تام من أي كوارث ربنا يستر علينا كلنا .
فعلاً احنا عايشين برحمة ربنا بينا ولطفه علينا .

Thanks
Eng.Sherif Shaker