ربنا يستر .... مظاهرة للأخوان

**itsonlyme** · 08-03-2011 02:36 PM

المشاركة الأصلية كتبت بواسطة hagan

يا اخواني
بالله عليكم سواء هيا بتخطيط من امن الدولة
او بغباء فكري من ناس لا يعلمون دينهم كويس
او ايا كان السبب
فين بقي (( المليون ثائر )) اللي كانو كل يوم ثلاثاء و جمعة بينظمو اعتصامات في التحرير و هم (( مسلمين و مسيحيين ))
لماذا لا يرسلون يجي 10000 الاف واحد كده اليوم او غدا لتهدئة الاحتقانات و لتهدئة الاجواء
و بما اني ضد التجمعات خلال هذه الفترة
فأرجو ان يكونو (( سريعا جدا )) لجان تتوجه لابناء قرية اطفيح و يكون منهم الشيخ الثائر (( صفوت حجازي )) كي يفهم اهل القرية من المسلمين ان ما فعلوه يتنافي مع الدين
و بأن الدولة الان في حالة انهيار فيجب ان نتكاتف كلنا (( مسلم و مسيحي )) لاعادة بناءها
و يذهب في نفس الوقت بالتزامن (( لجنة اخري )) للتحدث مع المتظاهرين من المسيحيين امام ماسبيرو
الاخوه الاعزاء
محتاجين تكاتف البلد (( بلدنا ))
مطلوب من الاخت نوارة نجم و عم نجم و الريس خالد يوسف
و الاخت شريهان و عم عمار الشريعي و كل (( الثائرين الافاضل ))
ان يتوجهو (( لمن تحدثو بالنيابة عنهم )) الي كل موظف (( يطالب برفع اجرة الان و لا يريد العمل )) لان هؤلاء الناس اكيد مش امن دولة
و مش ثورة مضادة (( دي بلد كلها الان في حالة ارتباك ))
ارجو من الاخوة الافاضل معنا هنا في المنتدي (( الثائرين جداااااا ))
ان نراهم بينشرو و يكتبو مواضيع تبعث علي روح التعاون و مواصلة العمل و مواصلة الدراسة و مواصلة كل شئ (( لان التغيير فعلا حدث ))
انما يحتاج (( وقت )) و الله كل شئ يحتاج الوقت للتحقيق
و عموما بارك اللهم فيكم
اللهم بلغت اللهم فاشهد

م.حاتم السباعي

أنا شايف ان الأخوة "الثائرين جداً" بيحاولوا يهدوا الموضوع وشايفين انه فتنة مصطنعة وبيقولوا للناس بلاش ينجروا وراها

لكن لو فضلنا نقول أمن الدولة بريء وملوش ذنب ودي مش ثورة مضادة يبقى احنا بنقول للناس انها فتنة فعلاً ومش مصطنعة وبكده بنساعد ضمنيا على اشعالها.

**AmAhmed** · 08-03-2011 02:40 PM

المشاركة الأصلية كتبت بواسطة محمد محمد

يا اخوانا الموضوع لا ليه دعوة بأقباط ولا ليه دعوة بأمن الدولة
النهاردة جلسة قضية الأخت كاميليا شحاتة والمتظاهرون كانوا في طريقم لمجلس الوزراء لعرض مطالبهم وده حقهم
طالما ان

يبقي من حقهم برضه يطالبوا بالأفراج عن الأسيرة كاميليا شحاتة.

شكرا للتوضيح
لكن لاحظ شئ موضوع الاسيرات يجب ان يتم حله في الغرف المغلقة و ليس بالمحاكم او التظاهر

ليه ؟ .. تعالي نضع البدائل اللي ممكن المحكمة تحكم بيهم
1- الحكم بالزام الكنيسة باعادة كل اسير مسلم محتجز في الاديرة
النتيجة ثورة نصرانية ... و القضاء في صف المسلمين ضد النصاري ... لا يمكن قبول فرض الارادة علي البابا ... نحن لم نخطف احدا ... و مثل هذا من الادعائات و النتيجة اشتعال الموقف

2- المحكمة تحكم ان مفيش حد مخطوف و الامور كلها تمام
النتيجة ثورة المسلمين و انفجار الاوضاع

3- المحكمة تأجل لجلسة تانية
و برضوا زيادة احتقان و شحن لجميع الاطراف

في النهاية جميع الحلول تؤدي الي الفوضي و التوتر و انفجار الامور

اذن الافضل حل موضوع الاسيرات بحكمة و في وجود المجلس العسكري و شيوخ من المسلمين و من يمثل النصاري
و يعلن ان الجميع بالف سلامة و الملف يتقفل و الحساب يكون عند ربنا لمن ظلم و عذب و سجن و قهر و ةنقتح صفحة جديدة و كلها شفافية و اللي يغلط من بعدها مهما كان منصبه يجب ان يُعاقب

**محمد محمد** · 08-03-2011 02:57 PM

المشاركة الأصلية كتبت بواسطة itsonlyme

ومش من العقل انهم يصبروا لغاية لما مشكلة الاقباط تتحل والاعتصام قدام ماسبيرو يتفض وبعدين يطالبوا بالافراج عن كاميليا؟

ولو اتحركوا ناحية ماسبيرو يبقى اسمه ايه؟

أمن الدولة مش هتأمر 400 واحد انهم يعملوا مظاهرة ... كفاية واحد أو اثنين يشعلوها والباقي ينضم بحسن نية وبغيرة على دينه.

وهو حد جه ناحية الأقباط
ومين قالك انهم راحوا لماسبيرو او بيفكروا في كده ؟!
وبعدين موضوع كاميليا موضوع قديم ولم يحل حتي الأن والسكوت عليه علشان الوحدة الوطنية والكلام ده غير مرغوب
ومش من العقل برضه اني في دولة اغلبيتها مسلمين وفيه واحدة مختطفة عند غير المسلمين افضل اجري عليها في المحاكم شهور ولا احد يجيب بينما الفريق الأخر بمجرد حدوث مشكلة لديه نجدها اليوم التالي محلولة بدون محاكم او غيره
تابع صفحات كاميليا شحاتة علي الفيس بوك او موقع حكاية كاميليا وبالله عليك كفاية نظرية المؤامرة امن الدولة عملت وامن الدولة سوت فهم لايملكون ضرا او نفعا لأنفسهم.

المشاركة الأصلية كتبت بواسطة tlrsiap

انا اول مرة اسمع موضوع جلسة كاميليا ده

المهم بس يبقى مالهمش دعوة بالمظاهرة التانية اللي عند ماسبيرو

بعيدا عن المباديء و المطالبات و اتفاقي معها او رفضي , ده و ده امن دولة و بكرة هايبان ان شاء الله

معلش سؤال قد تراه هجومي لكن هو اندهاشي , هو مش مشايخ سلفية كتير قبل الثورة اصدروا فتاوى بحرمة التظاهر ؟

نقلا عن تويتر:
--------------
[/size]

مافيش اجماع علي حرمة المظاهرات فيه مشايخ حرمتها وده اجتهاد منها لدرء الفاسد وليس حبا في النظام المخلوع
وفيه مشايخ شافوها فتنة وسكتوا وده برضه اجتهاد يؤجروا عليه
وفيه مشايخ دعوا اليها وشجعوا علي الخروج في المظاهرات...وكل من اجتهد ثابت علي مواقفه حتي الأن.

**أحمد علاء** · 08-03-2011 03:09 PM

الزملاء الأعزاء
الناس اللي بتهاجم السلفيين المصريين علشان خرجوا لإيصال صوتهم في مظاهرة سلمية من اجل عودة كاميليا وجميع الأسيرات المسلمات احب افكرهم ان النصارى المصريين ومن معهم من نصارى المهجر معتصمين امام مبني التليفزيون من 3 ايام من اجل كنيسة هدمت جراء أعمال شغب وخلافات بالإضافة إلى المطالبة بإطلاق سراح قس مزور محكوم عليه.

رجاء بلاش الكيل بمكيالين وترديد كلام الإعلام الرسمي في السابق فهذا عهد قد مضى

**itsonlyme** · 08-03-2011 03:23 PM

المشاركة الأصلية كتبت بواسطة أحمد علاء

الزملاء الأعزاء
الناس اللي بتهاجم السلفيين المصريين علشان خرجوا لإيصال صوتهم في مظاهرة سلمية من اجل عودة كاميليا وجميع الأسيرات المسلمات احب افكرهم ان النصارى المصريين ومن معهم من نصارى المهجر معتصمين امام مبني التليفزيون من 3 ايام من اجل كنيسة هدمت جراء أعمال شغب وخلافات بالإضافة إلى المطالبة بإطلاق سراح قس مزور محكوم عليه.

رجاء بلاش الكيل بمكيالين وترديد كلام الإعلام الرسمي في السابق فهذا عهد قد مضى

الكنيسة اتهدمت من يومين
أنا بسأل حضرتك سؤال، اشمعنى مظاهرة لاطلاق سراح كاميليا دلوقتي؟
ليه مش من اسبوعين؟ ليه مش من شهرين ايام الرئيس المخلوع؟

**ahmed1981** · 08-03-2011 03:26 PM

أمن الدولة تحول من جهاز بوزارة الداخلية إلى شماعة غسيل

**تامر.محمد** · 08-03-2011 03:32 PM

المشاركة الأصلية كتبت بواسطة محمد محمد

وهو حد جه ناحية الأقباط
ومين قالك انهم راحوا لماسبيرو او بيفكروا في كده ؟!

الأنباء اول ما انتشرت قالت انهم في اتجاه التحرير و عبد المنعم رياض , و على فكرة ما جتش معلومة انهم رايحين لمجلس الوزرا دي غير من حضرتك , و اتأكدت المعلومة بتحركهم فعلا في الاتجاه اللي حضرتك قلته , ماحدش كان عارف خالص

وبعدين موضوع كاميليا موضوع قديم ولم يحل حتي الأن
والسكوت عليه علشان الوحدة الوطنية والكلام ده غير مرغوب
ومش من العقل برضه اني في دولة اغلبيتها مسلمين وفيه واحدة مختطفة عند غير المسلمين افضل اجري عليها في المحاكم شهور ولا احد يجيب بينما الفريق الأخر بمجرد حدوث مشكلة لديه نجدها اليوم التالي محلولة بدون محاكم او غيره
تابع صفحات كاميليا شحاتة علي الفيس بوك او موقع حكاية كاميليا

انا عارف قصة كاميليا شحاتة كويس و وقتها كنت متبني نفس رأيك بالظبط , و مازلت فعليا بنفس الرأي , بس في رأيي الطلب ده مش وقته دلوقت لأنها قضية فرعية رغم حجمها الكبير لو قارنتها بتأمين الشعب كله حاليا و هي أرواح ناس برده, و الدخول في قضية فرعية عايزة مجهودات مش قليلة دلوقت هايبقى فيه خطورة كبيرة اوي على قضايا اكثر خطورة , منها مثلا الناس اللي مازالوا محبوسين في مباني امن الدولة , دول برده اخوة لينا و اعداد مش واحدة بس

وبالله عليك كفاية نظرية المؤامرة امن الدولة عملت وامن الدولة سوت فهم لايملكون ضرا او نفعا لأنفسهم.

هاختلف معاك في دي , و خلينا نحتكم للشهيد (أحسبه كذلك) سيد بلال الله يرحمه

مافيش اجماع علي حرمة المظاهرات فيه مشايخ حرمتها وده اجتهاد منها لدرء الفاسد وليس حبا في النظام المخلوع
وفيه مشايخ شافوها فتنة وسكتوا وده برضه اجتهاد يؤجروا عليه
وفيه مشايخ دعوا اليها وشجعوا علي الخروج في المظاهرات...وكل من اجتهد ثابت علي مواقفه حتي الأن.

أشكرك على المعلومة

أمن الدولة تحول من جهاز بوزارة الداخلية إلى شماعة غسيل

ممكن بلاش تريقة ؟
كل واحد فينا يقدر يتريق , و اظن اي حد بيتعرض للتريقة عليه او على كلامه بيزعل .... بلاش يبقى اسلوبنا مع بعض التريقة

**hossaam** · 08-03-2011 03:38 PM

هو فعلا يا جماعة كان فيه جلسة في دار القضاء النهاردة تقريبا...

لكن انا شايف انه كان ممكن يحصل المطالبة والمسيرة دي في وقت آخر...

التوقيت غير مناسب على الاطلاق لهذه النوعية من المطالبات والاعتصامات الحساسة سواء من النصارى او من المسلمين..