الموضوع: باركوللى 2 بقى ركبت 1500 توين كام لكريستالة

بسم الله الرحمن الرحييم

فى الاول احب اهدى اهداء الى كل الاعضاء الكرام بلا استثناء على المعلومات المفيدة والجميلة اللى ساعدتنى كتيير على تسقيط موتورى واخص بالشكر للاخ احمد شلبى ( مجهول بالنسبة لنايل موتورز ) اتمنى ان يكون عضو معانا والاستاذ المحترم صبحى حبيب قلبى وبرنس المنتدى محمد بك الجرجاوى على المجهودات الرائعة بالرغم من تكسير المقاديف والتشجيع فى ان واحد المهم انا مش عايز اطول عليكم بس عايز افيد الناس كلها والله وانا تحت امركم كلكم علمتونى الكرم والله المهم انا هاقول على التفاصيل كلها وبرضو مستعد لاى استفسارات

الحمد لله سقط موتور 1500 2 كامة كريستالة والحمد لله الموتور مظبوط قوى والسحب بتاعه كويس جدا بس لسة موضوع السرعة القصوى معملتوش لانى بالماتور العادى كنت بجيب لغاية 180 انا جربت انهاردة الصبح فى طريق المطار وكان زحمة شوية بس مشيت لغاية 140 الحمد لله الماتور ممتاز ونظيف جدا صوته كويس جدا نيجى بقى للتكلفة 4000 والراجل اخد الماتور بتاعى القديم وحالة الموتور الجديد احسن من موتورى الحمد لله وهوة ميكانيكى اصلا وحاسب على الكهرباء والتكييف والشكمان وطرمبة البنزين الكهرباء والحمد لله كله تمام انا مستريح نفسيا للماتور بس عمليا لسة مش مقتنع لانى حاسس ان فى حاجة خنقاه الراجل قاللى جرب براحتك معاك لمدة 15-20 يوم براحتك واكبس الماتور واكشف عليه فى اى حته الماتور كان راكب فيه بوجيهات بوش بلاتينيوم والراجل شالها بس انااخدتها منه شكله جبار لانه اصلى بس مش عارف ليه شاله وكان جاى معاه فلتر سبور بس الراجل عايز يحسبه لوحده قولتله خليهولك لانى بخاف منه واحد قاللى بيسخن فى الصيف ولو مش شغال حلو التراب هايدخل الماتور ويكسر فى المكنة من جوة الفلتر بتاع العربية محكم وحلو قوى الحمد لله امبارح وانا بجرب لاول مرة لقيت فى خنقة غريبة والعربية بتقطع المهم رجعت كنت فاكر ان هيه حاجة جامدة غير سلوك البوجيهات وظبط شوية فى الحساسات وظبطت على طول مفيش 5 دقايق وكله تمام معلش على الاطالة وكل ما افتكر حاجة هاقولهالكم تحياتى

بسم الله الرحمن الرحيم

اولا احب اشكر كل الناس على الاهتمام المهم انا سافرت بالعربية يوم الخميس ورجعت الجمعة وكانت الطرق اللى مشيت فيها اولا طريق القاهرة بلبيس الصحراوى والعودة من نفس الطريق على الدائرى اتجاه المنيب والمعادى والعودة اللى انا لاحظته انى جوة البلد يعنى من الثبات لغايه 100 كيلو التجميع ممتاز احسن من ال1300 بس الفرق مش شاسع زى ما العضو الكريم قاللى المهم بعد ال100 بتكون السرعة بشكل بطئ يعنى التجميع بطئ جدا او زى 1300 لانى جربت اجرى اكتر من مرة بال1300 والسرعة اللى وصلتلها وانا على الدائرى كانت 170 وحاسس انى وصلتلها بصعوبة زى 1300 او انا اللى مفترى كنت فاكر انى اول ما ادوس هاقفل العداد والا ايه مشعارف انا فى الاول شكيت فى الفتيس بس استحالة الراجل يحطللى الفتيس بتاعى القديم لان الفتيس الجديد فى فيش وحساسات وكده طيب ممكن طقم دبرياج لا ما انا بجمع بسرعة فى الاول هوة كده كده الراجل قاللى براحتك جرب وقوللى وقاللى قدامك 15 يوم شوف وقوللى وانا مشعارف اقولوا ايه انا لو قولتلو ان العربية مش بتسحب وهوة جرب هيلاقى ان هية بتجرى على العموم انا لسة هاروح اكبس الموتور وناوى لو فى نصيب فى الموتور ده انى اغير بوجيهات ان جى كى بلاتينيوم وممكن فلتر سبور وسلوك رياضية وبالنسبة لاستهلاك البنزين افتكر انه ممتاز جدا يعنى انا مشيت عليه حوالى 320 كيلو ولما جيت افول تانى كان المؤشر عند الربع حطيت 26 ليتر انا حاطط زيت شل تقريبا الاحمر اللى هوة 3000 وبنزين 92 وان شاء الله ناوى على زيت كاسترول والبوجيهات كما ذكرت فى السابق وعلى فكرة انا مودى مش حلو خالص وخايف والله المستعان تحياتى