مش كفايه ولادنا الي مش عارفين يروحوا مدارس
انا كنت اول واحد ضد الثوره..
كنت اول واحد يتريق علي الي نازلين يوم خمسه وعشرين
كنت اول واحد يكتب مقاله ..ويقول للناس متنزلوش يوم خمسه وعشرين
وقلت دول حيالله جماعه من علي النت ومتجمعين..والجيش مش معانا..والبس كوتشي عشان تعرف تجري..
--------------
لما الريس عين النائب عمر سليمان..واقال الحكومه......كنت بقول بيني وبين نفسي وفي بيتنا كده...طب نديهم فرصه...ليه لا !!
---------------
لما شفيق مسك الوزاره..قولت بس ..الراجل محترم وبيلبس بلوفر..ادوله فرصه يا جماعه..ليه لا !!
--------------
لما قالوا ان الريس يقعد لغايه اخر مدته.....عشان الفوضي والفراغ السياسي...قولت يبقي احنا كده هنضيع..خليك يا ريس..اخترناك اخترناك..استحملناك استحملناك
--------------
لما حصلت موقعه الجمل في الميدان..قولت بس !!..حرب اهليه وكنتاكي واخوان..ضعتي يا مصر ..كفايه مظاهرات
--------------
لما الريس اتنحي...قولت ينهار اسود..بس خلاص احنا هنحتل وجميع القوى الخارجيه بكل مخابراتها بجيوشها هيحتلونا
--------------
لما فضل شفيق ماسك الوزاره....قولت الراجل لسه لابس البلوفر وادوله فرصه واهو الريس اتنحي
ولكن ..قعدت اراجع نفسي...وكتبت مقاله الريس راجع بعد بكره...واستكشفت كام نقطه..عايزك تخلي باك وتركز كويس معايا :
1 – فاكر انا وانت لما كنا ضد الثوره من الاول...قولنا عشان وضعنا وجيشنا...والبلاد كلها هتحتلنا..والثوره اتعملت..وانا اشعر بكميه عار وخيبه امل فظيعه اني مشاركتش في اولها..ولما ادركت الحقيقه ونزلت التحرير..لقيته اخد روح الكرنفال...........وادينا دلوقتي بنرفع راسنا بمجرد الشعور اننا مصريين
2 – فاكر لما قولت خلي الريس ياخد الست شهور بتوعه...وبالمناسبه لما ادركت ليه ميقعدش الست شهور بتوعه نزلت التحرير.....خوفا من الفراغ السياسي والدستور ومش الدستور ...وعطلنا العمل بالدستور تماما بحنكه الجيش المصري
3 – فاكر لما قلت خلي شفيق...شفيق يا راجل..والراجل لابس بلوفر حلو جميل خالص..وحكومته لزيزه..وده عمل بلاوي في شركه الطيران..- مع العلم انها من ضمن اسوأ عشر شركات طيران في العالم - ..واديله فرصته
ولما مشي شفيق..قيادات ومراكز امن الدوله.....وزاره التعزيب اتحلت وحرقت وعملت وسوت
4 – فاكر الناس الكتير..الي كل همها ولادنا ومدارسهم..وشغلنا ومش عارفين ناكل ومش عارفين نعيش
مش هقعد اقولك في الكلام الي بتسمعه كتير والي واخد طبع الافلام وان الحريه ومش الحريه وولادنا هيعيشوا كويسين والديمقراطيه وكده
ولكن انا هقولك كلام موضوعي وركز فيه كويس :
لو ادركت ان الناس الي مش عارفه تروح مدارسها..كانت بتروح مدارسها عشان تتعلم في ابتدائي ان احمد بيزرع شجره...واقعد احفظ ان احمد بيزرع شجره..وخش ازرعها في الامتحان
وادركت في اعدادي وثانوي..انك تحفظ اتنين واربعين معادله كيميا في الدرس الاولاني عشان ترصهم في الامتحان ..هتقولي انا ادبي !!..اقولك لما علي بك الكبير ...قتل علي بك الصغير عشان علي بك الوسطاني كان مش موجود...ولازم تحفظ ده عشان ترصه في الامتحان..استفدت ايه انت متعرفش بس هو كده
وادركت ان الجامعات..دراسات وابحاث بتتعمل ورق طعميه للمطعم بتاع الجامعه ..وان مفيش جامعه عندنا من احسن خمسميه جامعه في العالم
وزعلان ان ولادك مش عارفين يروحوا مدارسهم..- لعلمك..الطفل الصيني وهو عنده تلت اربع سنين...بيصنع التكنولوجيا الي بيلعب بيها طفلك في موبايله وهو رايح المدرسه الصبح عشان المشوار طويل -
-------------------
لقمه العيش الي انت زعلان عليها ..الي كنت بتجيب بيها الطعميه الي ملفوف فيها ورق الابحاث بتاع الجامعات..وبتستلف من هنا ومن هنا...عشان تكمل كام قسط عندك في البيت...وزعلان علي لقمه العيش
----------------
شعورك كمصري...كلامك في السياسه...محو شخصيتك تماما..المهم تفكر ف اكل عيشك ..وفي التعليم بتاع ولادك وبتاعك...شعورك ان مش عارف تشارك في مين يحكمك...مكانش مضايقك فوق الاربعين خمسين سنه..
سبب كتابتي لهذا المقال..ان لقيت ناس معترضه ان في ناس معترضه علي التعديلات في الدستور ...
قايلين فيما معناه : عاجبكم الحال...يعني هو كده احنا في حاله فوضي...انت مش شايف البلد عامله ازاي !!!
سبب اخر ..كنت ماشي في الشارع واتوزع عليا منشور..لوقفه سلميه تؤيد الجيش..ومكتوب تحت بالخط الغلبان..."وكفايه بقي ولادنا الي مش عارفين يروحوا مدارسهم وكفايه مش عارفين نروح شغلنا"
هذا هو ما زرعه النظام السابق..فكر في نفسك وفي اكل عيشك .."وربي عيالك"...بلد ايه يا راجل
" وهو انا هقعد افر في كل حاجه في البلد.....يا راجل ...كبر مخك امال !! "
ولما كنت تتكلم عن الحريه يقولك.." حريه ايه يا جدع..مانت بتاكل وبتشرب وبتنام ..عايز حريه اكتر من كده ايه "
الهدف وخلاصه الكلام :
لو في تعديل دستوري مش عاجبك....حكومه مش عجباك......بواب عمارتكوا مش عاجبكوا....
متخافش من الاوهام الي بتتزرعلك....متخافش من الفوضي وحاله الاحتلال الي هتهج علينا لمجرد ان احنا معندناش دستور او لسه بنعدل فيه ..
السياسه الكبري للنظام الفاسد : خوفوهم عشان يعرفوا هما ليه محتاجنلنا !!
واظن كفايه كده.....مش كفايه ولادنا الي مش عارفين يروحوا مدارس !!!
هشام عفيفي
11 – مارس – 2011
قبل الصلاه..
منقول
