الموضوع: سريعا جدا فيرنا ام لوجان

بص اولا العربيتين ولاد حلال ويؤدوا الغرض على اكمل وجه
لكن المميزات والعيوب بينهم هى اللى تحدد لك تشترى ايه بالنسبة لمتطلباتك الشخصية
1- بالنسبة للماتور .. ماتور الفيرنا اقوى من ماتور اللوجان ... ماتور الفيرنا صوته اهدى قليلا من ماتور اللوجان مع العلم ان صوت الاتنين بيوصل للكبينة خاصا بعد 3000 ار بى ام
2- قوة الصاج ... الصاج الخارجى للفيرنا اقوى من اللوجان .. لكن .. اللوجان كهيكل داخلى اقوى من الفيرنا بسبب التوزيع الجيد للدعامات التى تحمى العربية من كل مكان علشان اوضح اكتر ( الفيرنا فى الاصطدام ذات القوة القليلة لا تتاثر كثيرا مثل اللوجان بالنسبة للصاج الخارجى .. لكن فى الاصطدامات القوية .. قوة تحمل اللوجان للصدمات القوية افضل منه فى الفيرنا بالنسبة لوصول الصدمة للكبية او حوض الماتور ... فى اللوجان الصدمة القوية بتمتص فى الصاج الخارجى وتثبت عند الدعامة .. فى الفيرنا الصدمة القوية بتكمل ) وربنا يكفينا شر الحوادث
3- ملائمتها للطرق المصرية ... اللوجان افضل فى هذا الامر ودة بسبب علوها عن الارض وعفشتها الطرية ..صعب جدا مع اللوجان انك تحك فى مطب وعفشتها محترمة جدا وبتستحمل ... الفيرنا عفشتها ايضا جيدة ومعمرة ولكن يعيبها انخفاضها خاصتا مع التحميل ودة بيعرضها للحك فى المطبات اكثر منه فى اللوجان
4- الثبات ... بدون تحيز وبدون مبالغات .. الاتنين ثباتهم مقبول كسيارات مدينة .. لكن فى نفس الوقت اللوجان ثباتها احسن من الفيرنا يعنى مثلا على سبيل القياس لو قلنا ( اقصى سرعة تشعر بيها بالامان مع الفيرنا 100 ك/س لو اضفنا ليها بعض التعديل زى كاوتش نوع محترم مع جنوط حتكون السرعة 120 ك/س للفيرنا .. اقصى سرعة تشعر بيها بالامان مع اللوجان 120 ك/س والعربية استوك ماعرفش لو اتعمل لها تعديل حيكون ايه الوضع لانى لسة ماجربتش )
5- اسعار قطع الغيار .... مفيش شك ان الفيرنا قطع غيارها منتشرة اصلية وتقليد بالاضافة لرخصها النسبى عن اللوجان .. بالنسبة لقطع غيار اللوجان موجودة فى التوكيل وتظهر خارج التوكيل عن استحياء
6- التوكيل ... توكيل رينو افضل من غبووور ... رينو مريح جدا واى عيب صناعة بيظهر بيتغير على طول بدون مماطلة والمعاملة فيه محترمة جدا جدا ومستوى الصيانات ممتاز لكن توكيل رينو ماتدخلهوش وانت عامل حادثة (ساعتها الاسعار بتكون غالية )
7- العزل الداخلى للكبينة ... اللوجان تتفوق فى هذه النقطة بمراحل .. تقفل ازاز اللوجان تلاقى نفسك فى عالم اخر .. لكن بيعيب السيارتين العزل الارضى للصوت يعنى لو على طريق سريع لو ظلطة خبطت فى العربية من تحت بتسمعها
8- قوة الفرامل ... تتفوق فيها اللوجان عن الفيرنا
9- نظام التوجيه والباور ... تتفوق فيهم اللوجان ... الباور فى اللوجان جميل جدا وبيعطى تحكم جيد فى العربية خاصة على الطرق السريعة ولكن يعيبه انه تقيل بعض الشيئ
10- استهلاك البنزين .. اللوجان موفرة فى البنزين عن الفيرنا وممكن تاخد المتوسط دة كقياس (اللوجان تستهلك 8.5 لتر لكل 100 كيلو ... الفيرنا 10 لتر لكل 100 كيلو ) المتوسط دة يقل شوية او يزيد شوية على حسب السرعة والطريق وعوامل كتير جدا
11- التكييف جيد فى الاتنين ... ولكن تكييف الفيرنا افضل قليلا ولا يؤثر كثيرا على السحب وذلك لقوة الماتور
12- الوسع الداخلى .. اللوجان اوسع من الفيرنا خاصتا فى المقعد الخلفى
14- وضعية القيادة ... من وجه نظرى وضعية القيادة فى الفيرنا مريحة اكتر ودة بسبب انك بتكون كاشف الطريق اكتر منه فى الللوجان ودة راجع لابعاد اللوجان الصعبة بعض الشيئ لعلو الشنطة وكثرة الانحنائات فى الرفارف الخلفية .. لكن اى سائق جيد يقدر يتغلب على الموضوع دة بسهولة
وربنا يوفقك لما فيه الخير