الموضوع: مواصفات الهيونداي i10 و سعرها في مصر

المشاركة الأصلية كتبت بواسطة shekoelprince

بص يا bubbles باشا وانا متأكد انها هتعجبك ;)

+100000000000

انا رحت إمبارح اتفرجت عليها.....تقييمي ليه كالأتي :

بالنسبه للماتور
طبعاً انا مشفتهوش بس بما انه هو بتاع الأتوس فهو جيد جداً وناعم ومناسب جداً للعربيه و للمشي في بلد زي بلدنا

بالنسبه للشكل الخارجي
الحقيقة تعديل ثوري فيها من الأمام حتي انها شبه الـ 307 من ادام جميله جداً بس الفوانيس تحس انه كبيره شويه علي العربيه (تقريباً واخده الرفرف كله ) وده حيخليها عرضه للكسر بسهوله خصوصاً انها بارزه كمان بس مفيش شك انها من ادام بقت جميله جداً
اما بالنسبه للخلف فالتعديل غير ملحوظ ولو انك تحسه اصغر قليلاً من الأتوس و يمكن ده عشان قللو إرتفاع السقف 4 سم ..بس من ورا فعلاً متغيرتش كتير اما من الجانب فنفس مقاس الأتوس بالفعل
بالنسبه للإكصدام الأسود فهو مش وحش وحيكون احلي ما يمكن علي اللون الأسود و الأبيض وفيه شئ ملاحظ هنا ان كل الألوان الي شفتها لحد دلوقتي ..سواء في القاهرة او الأسكندرية نفس اللون الرصاصي ده . بالنسبه للتقفيل فهو جيد جداً

بالنسبه للصالون
التابلوه الجديد إبداع بحق وفعلاً اول مره احس ان تابلوه الأتوس متواضع لما شفت ده .بصراحه التابلوه تحسه اوروبي مش اسياوي (ويمكن ده مقصود لأني حسب ما قرأت فهي لتغزوا اسواق اوروبا) كما انه بسيط وفي نفس الوقت شيك .حكاية الفتيس الي في التابلوه الي فالنصف مستغربه شويه بس اكيد لأني مش متعود عليه في عربيه صغيره .كمان غبور كان موفق في اختيار اللون الأسود للتابلوه مش البيج .اللون الأسود مديها فخامه غير عاديه واول مره يعمل حاجه عدله..بس للأسف بوظ الي هو عامله بأنه مجبش الكاسيت الأصلي بتاعها ومركب كاسيت تعبان تحسه لا ينتمي للتابلوه.
لاحظت عدم وجود عداد rpm كما لاحظت ان الشنطه تفتح من الخارج فقط (يعني مفيش البتاعه الي بتفتحه من جوه دي) والأخيره دي غبور ملوش زنب فيها لأنها نزله كده بالفعل في كل حته
بالنسبه للصالون فمساحته نفس مساحة صالون الأتوس علي الرغم من ان i10 اعرض من الأتوس بـ 7 سم إلا ان ده لم يترجم في مساحه اكبر .كمان الكراسي مش عاليه زي الأتوس (فيه إحساس بيجيلك لما تركب الأتوس وملاكها عرفينه بأنك قاعد في برج عالي اعلي من السيارات التانيه) وده بصراحه كان في صالح مجال الرؤيا في الأتوس .واعتقد ان العربيه دي حتعاني ما تعانيه الياريس في حكاية مجال الرؤيا و الأبعاد
التفنيش و المواد المستخدمه جيده جداً و التقفيل فوق الممتاز و فخم ومهتمين بالتفاصيل بعكس الأتوس ولكن الكراسي عاديه .بالنسبه للشنطه فهي اصغر من شنطة الأتوس بشكل ملحوظ (تقريباً اد بتاعت الماتيز و البيكانتو) .كمان فيه تعديل في اماكن السماعات ..في الأتوس فيه سماعتين في ورا كنت بتشوفهم لما تفتح الشنطه و فيه سمعتين في التابلوه..اما الـ i10 فالأربع سماعات في اللأبواب وفي رأيي ان ده احسن عشان الصوت كما ان السماعات بنفس القطر (توزيع متساوي)

السياره بشكل عام جميله ولكن سعرها كتير ويمكن ده لأن هيونداي منزلها عشان تكون بين الجيتس و الأتوس .انا الحقيقه كنت ناوي ابيع الأتوس و اشتريها بس وجدت ان الأتوس ليها شخصية و الـ i10 ليها شخصيه تانيه كمان ان عشان ادفع 10000 فرق مثلاً مش حأخد حاجه كبيره بالمقابل
كمان يا جماعه الفتره الي جايه حتشهد موديلات جديده في هذه الفئة من سوزوكي و ماركات اخري ...يعني المقارنه مش بس مع البيكانتو
لاكن لو قارنتها بالبيكانتو فالـ i10 حتكتسح بجدارة

المشاركة الأصلية كتبت بواسطة Khalid_Mostafa

انا شاكر ليك جداً علي الصور وربنا يباركلك فيها . وعلي فكره انا شايف ان الإكصدامات السوداء شكلها مش وحش كما انها عمليه اكتر من الألوان ...الف مبروك
بالنسبه ليه بصراحه الإنطباع الأول ليه محبط شويه ومكنتش متوقعها كده ...الصور علي الإنترنت حاجه تانيه خالص..بس انا حستني لما اشوفها علي الحقيقه الأول ...يا تري تكون نزلت إسكندريه ولا لأ

ياباشا العربيه نزلت فى اسكندريه موجوده عند اباظه اللى فى جليم واقفه جنب الهمر ولونها اسود

المشاركة الأصلية كتبت بواسطة sndbad111

ياباشا العربيه نزلت فى اسكندريه موجوده عند اباظه اللى فى جليم واقفه جنب الهمر ولونها اسود

ايوه يا باشا مأنا عارف وعامل عليها ريفيو كامل في المشاركه الي قبلك علي طول بس انت مأخدتش بالك :)

.بالنسبه للشنطه فهي اصغر من شنطة الأتوس بشكل ملحوظ (تقريباً اد بتاعت الماتيز و البيكانتو)

شنطة الاتوس =263 لتر
شنطة ال اي 10=225لتر
شنطة البيكانتو=220 لتر
شنطة الالتو 177 لتر
شنطة السبارك 170 لتر