السلام عليكم
نزلت صوت على التعديلات بلا
قولت انزل بدرى خصوصا انى بقوم بدرى دايما قبل الدنيا ماتزحم
500 واحد ماتوا و5000 اتصابوا والبلد ادمر فيها حاجات كتير واقتصاد خرب كل ده ماتعاملشى علشان تعديل كام ماده والله اعلم حتغير فعلا زى ما بيقولوا ولا لا
قولت لا لان ال50 % عمال وفلاحين واللى حاجزين اماكنهم باستمرار فى مجلس الشعب بسسب نزاعات عائليه وتعصب فى الارياف خصوصا و اللى مابيعرفوش يقروا ولايكتبوا عمرهم ماحيعملوا حاجه صح للبلد ولاحيوافقوا على تعديل دستور يطور البلد

قولت لا لان مجلش الشورى اللى مالوش لازمه لازم يتلغى ويخفوا الحمل على ميزانية البلد او يدولوا اختصاصات محترمه تليق باسمه

قولت لا علشان الماده 141 اللى بتدى رئيس يعين ويشيل زى ماهو عايز فى النائب ورئيس الوزراء والوزراء على حسب مزاج البيه وماما سوزان وجمال بيه واصحابه (ماهو برده ممكن ييجى نسخه تانيه منهم )

قولت لا علشان الماده 162 والمجلس المحليه اللى مالهاش اى لازمه غير الفساد والسرقه

اخيرا قولت لا علشان رئيس الجمهوريه لازم يبقى صوره ورمز فقط وكفايه علينا اللى شوفناه

عمرى 32 سنه من اول ماوعيت على الدنيا مشوفتش البلد فى يوم ماشيه صح

الواحد منهم يينام ويحلم بحلم يقوم ينفذه على مزاجه ماهى اصلها عزبة ابوه

والتانى لو مراته معكننه عليه يقوم يعكننها على الشعب ماهو برده شعب ابوه

عموما ده رائى وبرده بحترم راىء كل القالوا نعم