غيرت رأي في أخر يوم و هاقول لأ

**wael17** · 19-03-2011 09:20 AM

كنت مقتنع بنعم و كانت عائلتي مقسمة بين نعم ولا
أب و أم و اخين لأ
و أنا و أخ تاني نعم
بس امبارح اتكلمت مع والدي ساعتين اجيبه يمين اجيبه شمال...مفيش فايدة و غلبني و أقنعني برأيه بس مارضتش أقول قدامه اني غيرت رأي (نظام عند يعني)
و في وسط الجدال اشتركت معانا زوجة أخي اللي بيقول نعم و هي من عائلة اخوانية و ووصلت بينا في الاخر ان والدي مش عايز ينصر الاسلام عشان بيقول لأ!!!!! و قالتله الاسلام هاينتصر كده كده حتي لو قلنا كلنا لأ
بصراحة اسلوب الكلام خوفني و بعدين وأنا مروح شوفت اللافتات و الدعاية كلها نعم..نعم..نعم
مش عارف ليه حاسس اني مش عايز أقول نعم...مش عايز حد يفرض عليا اني مادام مسلم يبقي لازم أقول نعم
عقلي كان مع نعم (بعيد عن الاخوان) لمجرد الرغبة في الاستقرار و النتقال لحكم مدني
بس قلبي مع لأ دلوقتي و الدستور لازم يشترك فيه كل الاطياف الموجودة مش الاخوان بس و طبعا المادة الثانية لا مساس بها و هي محمية برأي الاغلبية

أنا هانزل دلوقتي و أقول لأ رغم اني عارف انها بالكتير قوي هتبقي 30% و أحترم جدا كل من يقول نعم لان بكل بساطة لو كان الاستفتاء اتعمل امبارح كنت هاقول نعم و بالفم المليان

و في الاخر بعد النتيجة ما تطلع عايزين كلنا نرضي بها و ماحدش يشمت في حد و نبص علي الخطوة الجاية عشان مصر تبقي أحسن

أشوفكم بعد الاستفتاء

سلام عليكم

**aly_hosny** · 19-03-2011 09:39 AM

:b4_388::b4_388::b4_388:
هو دا اقنع اخوك ال ناقص بقى عشان يبقى كلكو لا

**Moh.Abdelbaset** · 19-03-2011 09:40 AM

اللي أهم من نعم أو لا..المشاركة
و اللي يوافق أو يرفض يكون عن اقتناع
و ربنا يرزقنا الخير إن شاء الله

**tiger45** · 19-03-2011 10:06 AM

كلامك صح وتماماهم حاجه نروح نصوتبدل ما نلطم بعد كده

**zouba92** · 19-03-2011 10:18 AM

تحياتى, لحضرتك كل الأحترام و لكل برده بيقول نعم عن أقتناع و ليس لأسباب مثل نصرة الأسلام ... قصدى الأخوان

**A.Saad** · 19-03-2011 11:17 AM

عارف
ده اللى بيخوفنى من الاخوان والسلفيين وكل الجماعات اللى بيكون اساس تجمعها الدين
لان فى الاول بتشوف تيار معتدل
بعد كدة تلاقى المتشددين بانوا
وتلاقى اتهامات وشتائم للمعارض ليهم

**wael17** · 19-03-2011 03:11 PM

المشاركة الأصلية كتبت بواسطة aly_hosny

:b4_388::b4_388::b4_388:
هو دا اقنع اخوك ال ناقص بقى عشان يبقى كلكو لا

للأسف ما ينفعش...لما الحوار يوصل في النهاية للكلام عن العقيدة يبقي الاحسن نتفادي الجدال خصوصا انه أخويا
والدتي قالتلي ان زوجة أخويا حاولت تقنعها تقول نعم و في الاخر قالت لها (قولي نعم عشان تاخدي ثواب)

المشاركة الأصلية كتبت بواسطة moh.abdelbaset

اللي أهم من نعم أو لا..المشاركة
و اللي يوافق أو يرفض يكون عن اقتناع
و ربنا يرزقنا الخير إن شاء الله

بصراحة بغض النظر عن اختلاف الرأي انا كنت فرحان جدا بمنظر الناس و هي واقفة طابور عشان تدخل اللجنة...مش عارف ليه عندنا في أكتوبر في زحمة علي اللجان مع ان المفروض الكثافة السكانية مش عالية..انا وقفت ساعة و نص و كنت رايح 10 الصبح... علي الساعة 2 كان الطابور أطول بكتير...يعني في ناس هاتقف 3 ساعات مثلا...مع ان واحد صاحبي في المعادي قالي انه خلص في 5 دقايق و ماكانش في طابور اصلا

المهم الناس واقفة في في الطابور بمنتهي الاحترام و الصبر رغم الشمس و كل واحد فخور جدا انه بيقول رأيه ..و غالبية الناس اللي واقفة مش عايزة تقول هي داخلة تختار نعم او لا لتجنب الجدال ...
و كمان كان في شباب واقف ينظم الطابور و المرور قدام اللجنة في منهم اخوان و في منهم شباب عادي
و كان في ناس بتوزع مية علي اللي واقفين في الطابور..و انا من نفسي بعد ما خلصت رحت اشتريت مية ووزعتها علي الناس اللي واقفة
بصراحة حاجة تفرح و تحس ان الناس عايزة بلدها تبقي أحسن
ان شاء الله بغض النظر عن النتيجة الكل هايرضي بها و في الاخر كل واحد قال رأيه و كل واحد أكيد عايز مصر تبقي أحسن

**wael17** · 19-03-2011 03:23 PM

المشاركة الأصلية كتبت بواسطة a.saad

عارف
ده اللى بيخوفنى من الاخوان والسلفيين وكل الجماعات اللى بيكون اساس تجمعها الدين
لان فى الاول بتشوف تيار معتدل
بعد كدة تلاقى المتشددين بانوا
وتلاقى اتهامات وشتائم للمعارض ليهم

المشكلة فعلا ان في نوع من الارهاب للرأي المعارض بس باسم الدين
يعني صاحبي اللي في المعادي بيقولي امبارح بعد صلاة الجمعة الشيخ في الخطبة قالهم ان شاء كل المسلمين يقولوا نعم بكرة من أجل الاستقرار..و بعد الخطبة صاحبي كان عايز ياخد الميكروفون و يقول للشيخ ان المفروض ما نتكلمش عن الاستفتاء اليوم اللي قبله زي الجيش ما قال بس بعد الصلاة طلع مجموعة من الاخوان و خدوا الميكروفون و بدأوا يتكلموا عن الاستفتاء...صاحبي تراجع و بيقولي ان في ناس جيرانه رأيهم لأ و خافوا يتكلموا عشان ماحدش يحرجهم او يبان انهم شاذين عن رأي الجماعة...أنا شايف ان ده نوع من الارهاب الفكري...الكلام ده في المعادي..تخيل بقي ايه اللي بيحصل في القري و النجوع

**Amgad64** · 19-03-2011 03:49 PM

عفارم عليك , انا الحمد لله قلت لا و استطعت اقنع بعض الناس والبعض الاخر مقدرتش, بس بصراحه اللى مزعلنى هو ان فى ناس ملاهش رأى و بيتبعوا اللى بيقولوهم الاخوان. احنا كان عندنا فى الجامع امبارح فى خطبه الجمعه امام متقى مجابش سريه التعديلات اساسا وانما دعا لتلاحم الناس و تجاوز الاختلافات. لكن بعض ما خلصنا الصلاه لقينا واحد من الاخوان أو السليفين الله أعلم بيقوله يا امام قولهم عن التعديلات وان جميع العلماء بيقولوا ان ده فرض شرعى ان احنا نقول نعم. بصراحه ناس كتير وانا منهم قلناله لو احنا قلنا لا مش حنبق مسلمين و لا ايه وبصراحه انا مشيت علشان كان ورايا ميعا بس كان فيه خناقه جامده جدا بعد كده. ياريت نبعد عن اقوال العلماء فى المواضيع اللى زى ديه و نلجاء الى الحجه والبرهان.