ديمقراطية و حرية اه بس مش للدرجة دي
السلام عليكم
من اول ما بدأت الدراسة و لاحظت ان الحركة السلفية ظهرت بوضوح في الكلية بجانب الاخوان ... يعني الاول كنت عارف ان فلان دا اخوان بس السلفيين مكنوش بيبقوا ظاهرين قوي .. كل اسبوع مثلا تشوف واحد .. من بعد الثورة و هما اخدوا راحتهم جدا .. عملوا مكاتب ليهم .. بدأوا يعملوا ورق كدا زي منشورات .. يعلقوا يافتاط .. كل دا تمام و من حقهم و حاجة محترمة
النهاردة و انا على البوابة سمعت صوت حد بيتكلم في ميكروفون .. قلت كلية حقوق عاملة مظاهرات
لما دخلت و سمعت الصوت كويس لقيتة صوت الدكتور حازم شومان ... و اللي لفت نظري عدد السبيكرات اللي في الكلية .. و بعدين عرفت اية اللي بيحصل بالظبط
ندوة للدكتور حازم .. عاملينله منصة عالية كدا و الطلبة واقفة على الارض .. يعني مش في مدرج .. بس المجمع النظري كلة مليان سماعات و عالية جدا .. يكفي اقولك اي مكان هتروحة هتسمع صوت الشيخ عالي جدا .. من اول كلية حقوق لحد اداب
طيب يا جماعة هو كدا ينفع .. طيب الناس اللي عندها محاضرات تعمل اية .. طيب لو حد مش بيحب الدكتور حازم يعمل اية ... طيب اخواننا الاقباط يعملوا
مع اني مش بحب الدكتور حازم ولا بكرهة بس اتضايقت من الموقف نفسة .. انت حر تقفل مكان كامل و تجيب اللي انت عايزة بس متغصبنيش استمع لفكر معين مهما كان الفكر دا اية