الموضوع: طب حضرات السادة المواطنين و القوى السياسية خلاص باعوا البرلمان ولا ايه ؟

المشاركة الأصلية كتبت بواسطة hossaam

الموضوع فعلا مش سهل خااالص...ومحتاج تحرك وشغل

انا في منطقة جنب شغلي...الناس فيها لسه معلقين يفط الدعاية السابقة بتاعة نواب الحزب الوطني على ابواب بيوتهم وبلكوناتهم..!!!! وللمعلومة المنطقة دي فعلا بيحكمها شغل العائلات وكبير العيلة اللي رأيه بيمشي على الكل..!!!

ديه المشكلة الرئيسية ...

الاستفتاء عدى بسلام عشان مفيش اطراف محددة ..

لكن المجلس هيبقى فيه اطراف متعددة في المنطقة الواحدة ... و مندوب لكل مرشح في كل لجنة و دعاية على باب اللجنة و هيصة

و مناديب عند الفرز ..و ساعتها ما ينفعش السيد رئيس اللجنة يقول اللي عنده شك ان فيه حد صوت مرتين ابقى روح بلغ
زي ما حصل في الاستفتاء ...

هما مش بتوع الحزب معروفين
يبقى ليه نفترض ان الناس هتنجحهم

فى 2005 لو نفتكر 1/3 المجلس كان مُستقليين ودخلوا تبع الحزب الوطني ، الخوف من دول ، الخوف من كبار العائلات فى الأرياف والصعيد والخوف الأكتر إن اللجنة التأسيسية هتبقى من أعضاء مجلسي الشعب والشورى

الموضوع ده فى غاية الأهمية و أنا عمال افكر من مدة هاختار مين فى دايرتى لمجلس الشعب ولقيت ان فى تساؤلات كتيرة وهى كالأتى:
1- هل كل أعضاء الحزب الوطنى سيئين؟ الاجابة لا و خصوصا ان فيهم ناس كان الحزب بيضمهم علشان عارف ان ليهم شعبية فى دوايرهم يعنى مثلا حسام بدراوى لم يكن سيئا
2- أنا مع التيار الدينى ونفسى أنتخب مرشح يكون أول بند فى البرنامج بتاعه تطبيق الشريعة الإسلامية (مع تطبيق الشريعة النصرانية على الاقباط) بس للأسف أنا لست مع السلفيين ولست مع الإخوان ومش لاقى حد يقول أنا مسلم وأنتمى لجماعة المسلمين من غير ميحط قبلها سلفى او وهابى او اخوانى وهو بيبين انتماءه.
3- مثلا فى دايرتى على مقعد الفئات فيه رجل أعمال من أسرة خميس والناس بتقول فيه ماقاله مالك فى الخمر ولكن أسرة خميس فى مقابل ترشيح هذا الرجل تقوم بأعمال كثيرة لصالح الدائرة وبالفعل هناك خدمات كثيرة تقدم للدائرة منهم لم أرها فى حياتى تقدم من عضو مجلس شعب لدائرته حتى لما كنت فى شبرا زمان. والبديل اخوانى سابقا واعتقد حاليا سيكون بديل اخوانى وبديل سلفى. أما مقعد العمال والفلاحين لا أعرف اى واحد فيهم.
4- معظم المرشحين هيبقوا غير معروفين وهيبقى الانتخاب حسب انتمائهم الحزبى او الدينى وبالتالى وبما أنى لا انتمى لاى حزب وعدم ايضا انتمائى لعنصرى التيار الدينى فهعمل ايه
5- أيهما أفضل بالنسبة لى أن انتخب واعطى صوتى لمن قد لا يستحقه أم أن الأفضل هو عدم ذهابى للجنة الانتخابات فى الانتخابات القادمة والانتظار للانتخابات التى تليها بعد عدة سنوات حتى تكون الصورة اتضحت وجميع الاحزاب والأطياف قد ظهرت نواياها وأعمالها وخططها؟

لقد حسمت أمرى فى اختيار عمرو موسى للرئاسة ولكنى لم احسم أمرى فى الذهاب اصلا للجنة لانتخاب اعضاء مجلس الشعب
أما بالنسبة لمجلس الشورى فأنا حسمت امرى فى عدم الذهاب نهائيا للانتخاب و مقاطعته لأنى ضد وجود هذا المجلس من أساسه واتمنى ان يكون فى حملة على الانترنت لمقاطعة انتخاب مجلس الشورى.

طيب فين الاحزاب الجديدة اللي المفروض تتعمل...
انا شخصيا...قاعد ادور على حزب انضم له مش لاااااقي...

فين شباب الثورة والتحرير والفيس بوك؟؟؟!!!!!!
منتظرين ايه بس؟؟!!
لو عملوا حزب... من بكرة هانضم لهم ...ومتحمس انزل معاهم للقرى والنجوع
نكلم الناس

هو ده الحزب اللي انا عاوز ابقه جزء منه...عاوز اشتغل سياسة على الارض بجد :))